Pita Edere Akwụkwọ nye Ndị Nwere Okwukwe Hakọrọ Ọnụ

Ịdọ aka ná ntị megide ndị nkuzi ụgha na ndị na-akwa emo, na oku ka anyị too n'amara mgbe anyị na-eche nlọghachi nke Onyenwe anyị.

Isi 1.

Saịmọn Pita, odibo na onyeozi nke Jisọs Kraịst, na-edegara ndị e nyere okwukwe dị oké ọnụahịa dịka nke anyị, site nʼezi omume nke Chineke anyị na Onye Nzọpụta anyị Jisọs Kraịst: Ka amara na udo baara unu ụba site nʼịmara Nna anyị na Jisọs Onyenwe anyị.

Ndị Na-eketa Oke nʼỌdịdị Nna

Ike ya nke dị nsọ enyela anyị ihe niile anyị chọrọ maka ndụ na ịsọpụrụ Chineke, site nʼịmara onye ahụ kpọrọ anyị site nʼebube ya na ịdị mma ya. Site na ihe ndị a o nyela anyị nkwa ya ndị dị oké ọnụahịa, ndị dịkwa ukwuu, ka unu wee site na ha keta oke nʼọdịdị dị nsọ ahụ, ebe unu gbapụrụ na mmebi nke ụwa nke si nʼọchịchọ ọjọọ. Ya mere, na-agba mbọ niile, tụkwasị ịdị mma nʼokwukwe unu, tụkwasịkwa ihe ọmụma nʼịdị mma; tụkwasị njide onwe nʼihe ọmụma; tụkwasị ntachi obi nʼnjide onwe; tụkwasị ịsọpụrụ Chineke nʼntachi obi, tụkwasị ịhụ ụmụnna nʼanya nʼịsọpụrụ Chineke; tụkwasị ịhụnanya nʼịhụ ụmụnna nʼanya. Ọ bụrụ na unu nwere àgwà ndị a, na-etokwa, ha ga-eme ka unu ghara ịbụ ndị na-abaghị uru maọbụ ndị na-amịghị mkpụrụ nʼịmara Onyenwe anyị Jisọs Kraịst. Onye ọbụla na-enweghị ihe ndị a bụ onye ìsì, onye adịghị ahụ ihe nke ọma, onye chefuru na e mere ka ọ dị ọcha site na mmehie ya gara aga. Ya mere, ụmụnna m, gbasienụ mbọ ike ime ka ọkpụkpọ unu na ịhọpụta unu guzosie ike; meenụ ihe ndị a, unu agaghịkwa asụ ngọngọ ma ọlị. Nʼụzọ dị otu a, a ga-enye unu nke ukwuu ohere ịba nʼalaeze ebighị ebi nke Onyenwe anyị na Onye Nzọpụta anyị Jisọs Kraịst.

Ya mere, aga m na-echetara unu ihe ndị a mgbe niile, ọ bụ ezie na unu maara ha, guzosiekwa ike nʼeziokwu ahụ unu ji ugbu a. Echere m na ọ ziri ezi ịnọgide na-akpali unu site nʼichetara unu ihe ndị a, oge ọbụla m ka nọ nʼụlọikwuu a, ^a ebe m maara na ọ ga-adịghị anya m ga-ewepụ ụlọikwuu m, dịka Onyenwe anyị Jisọs Kraịst gosiri m. Aga m agbakwa mbọ ka unu wee na-echeta ihe ndị a mgbe niile mgbe m pụsịrị.

Nʼihi na anyị esoghị akụkọ ifo ndị e ji aghụghọ chepụta mgbe anyị gwara unu banyere ike na ọbịbịa nke Onyenwe anyị Jisọs Kraịst—kama anyị ji anya anyị hụ ịdị ebube ya.

Ọ natara nsọpụrụ na ebube site nʼaka Nna anyị mgbe otu olu si nʼebe Ebube Dị Ebube ahụ bịakwute ya, sị, “Onye a bụ Ọkpara m, onye ahụ m hụrụ nʼanya; ihe ya na-atọ m ụtọ.” ^b

Anyị onwe anyị nụrụ olu a ka o si nʼeluigwe bịa, nʼihi na anyị na ya nọ nʼelu ugwu nsọ ahụ.

Anyị nwekwara okwu amụma ahụ nke e mere ka o sie ike karịa—ọ dị mma na unu na-aṅa ntị na ya, dịka oriọna na-enwu nʼebe gbara ọchịchịrị, ruo mgbe chi ga-abọ, kpakpando ụtụtụ ga-awalitekwa nʼobi unu. Nke kachasị, unu aghaghị ịghọta na ọ dịghị amụma ọbụla nke Akwụkwọ Nsọ nke si na nkọwa nke onye ọbụla nʼonwe ya. Ọ dịghị amụma ọbụla si nʼọchịchọ mmadụ bịa, kama ụmụ mmadụ kwuru okwu si nʼebe Nna anyị nọ, ka Mmụọ Nsọ na-ebugharị ha.