Bitrus Ya Rubuta ga Masu Bangaskiya Ɗaya da Mu

Gargaɗi game da malaman ƙarya da masu ba'a, da kira a yi girma cikin alheri yayin da ake jiran dawowar Ubangiji.

Babi na 1.

Saminu Bitrus, bawa da kuma manzon Yesu Almasihu, zuwa ga waɗanda aka ba su bangaskiya mai daraja kamar tamu, ta wurin adalcin Allahnmu da Mai Cetonmu Yesu Almasihu: Bari alheri da salama su ƙaru gare ku ta wurin sanin Ubanmu da Yesu Ubangijinmu.

Masu Tarayya a Ɗabi'ar Uba

Ikonsa na Allahntaka ya ba mu dukan abin da muke bukata domin rai da ibada ga Allah, ta wurin sanin wanda ya kira mu ta wurin ɗaukakarsa da nagartarsa. Ta wurin waɗannan ya ba mu alkawaransa masu daraja da girma ƙwarai, domin ta wurinsu ku sami tarayya a ɗabi'ar Allahntaka, bayan da kuka tsere wa lalacewar da take a duniya sakamakon muguwar sha'awa. Saboda haka, ku yi iyakar ƙoƙari, ku ƙara nagarta a kan bangaskiyarku, ku kuma ƙara sani a kan nagarta; a kan sani, ku ƙara kamun kai; a kan kamun kai, ku ƙara haƙuri; a kan haƙuri, ku ƙara ibada ga Allah, a kan ibada ga Allah, ku ƙara ƙauna ta 'yan'uwantaka; a kan ƙauna ta 'yan'uwantaka, ku ƙara ƙauna. Idan kuna da waɗannan halaye suna ƙaruwa, ba za su bar ku ku zama marasa amfani ko marasa 'ya'ya ba a cikin sanin Ubangijinmu Yesu Almasihu. Duk wanda ba shi da waɗannan abubuwa makaho ne, mai gajeren gani, ya manta cewa an tsarkake shi daga zunubansa na dā. Saboda haka, 'yan'uwa, ku yi ƙoƙari ku tabbatar da kiranku da zaɓenku; ku yi waɗannan abubuwa, ba kuwa za ku taɓa yin tuntuɓe ba. Ta haka za a ba ku shiga a yalwace cikin mulkin madawwami na Ubangijinmu da Mai Cetonmu Yesu Almasihu.

Saboda haka kullum zan tunatar da ku waɗannan abubuwa, ko da yake kun san su kuma kuna tsaye daram cikin gaskiyar da kuke riƙe da ita yanzu. Na ga ya dace in dinga tā da ku da tunatarwa muddin ina cikin wannan alfarwa, ^a da yake na san ba da daɗewa ba zan ajiye alfarwata, kamar yadda Ubangijinmu Yesu Almasihu ya nuna mini. Zan kuma yi ƙoƙari domin ku iya tunawa da waɗannan abubuwa kullum bayan na tafi.

Gama ba labarai na ƙaga da aka ƙera da wayo muka bi ba sa'ad da muka sanar da ku ikon Ubangijinmu Yesu Almasihu da zuwansa—mun zama shaidu da muka ga darajarsa da idanunmu.

Ya karɓi girma da ɗaukaka daga Ubanmu sa'ad da wata murya ta zo masa daga Ɗaukakar Mai Girma, “Wannan Ɗana ne, wanda nake ƙauna; ina jin daɗinsa.” ^b

Mu kanmu mun ji wannan murya ta zo daga Sama, gama muna tare da shi a kan dutse mai tsarki.

Muna kuma da kalmar annabci da ta ƙara tabbata—kuna kyautatawa in kun mai da hankali gare ta, kamar fitila mai haskakawa a wuri mai duhu, har sai da gari ya waye, tauraron asubahi kuma ya fito a cikin zukatanku. Gaba da kome, dole ku gane cewa babu wata annabci na Nassi da ta fito daga fassarar mutum ta kansa. Babu annabci da ya taɓa zuwa ta wurin nufin mutum, amma mutane sun yi magana daga Ubanmu, Ruhu Mai Tsarki yana bi da su.