2 Peter 1

1 ¹Jishu Khristawui rao kala paokazata Simon Peterna, ithumwui Vare kala Huikhame Jishu Khristawui khamashung khangarong athishurda ithumwuili ngaraichā aman kasak shitkasang samphang kahaibingli: ²Ithumwui Avā kala ithumwui Proho Jishuli theikakhui eina lukhamashan kala chingri kahai chi nathumli mataisangmiranu.

Avāwui Khangachāli Khangarumbing

³Awui tharkhamathengwui pangshapna ithumli awui khayākakā kala magun eina hokhui kahai ali theikakhui eina, mirin kala Vareli kaphaning khavai darkar khalei saikora mihaira. ⁴Nathumna makaphā ningkachāng eina kharā okathuiwui makaphā-makhayā eina nganaishokhailaga, ngashit chi eina tharkhamathengwui khangachāli khangarum khavai, chibing eina ana awui aman kasak kala hakkhamahā ngashit kahaibing ithumli mihaira. ⁵Chiwui vang eina, chotlak saikora eina, nathumwui shitkasangli khamathā ngarumsanglu, kala khamathāli theikakhui ngarumsanglu; ⁶theikakhuili khalatta khangarin; khalatta khangarinli khāngkathei; khāngkatheili Vareli kaphaning, ⁷Vareli kaphaningli chinaongarāwui leikashi, kala chinaongarāwui leikashili leikashi ngarumsanglu. ⁸Hi magunbing nathumli leida mataisangda leiakha, nathumli ithumwui Proho Jishu Khristali theikakhuiwui pongli makannā kala mahut makhalei mi ngasakmara. ⁹Hibing makhuikasang mi china awui thuikahai moreiwui eina tharzāhai kaji malaihailaga, mik khangapeo kala shorkarna. ¹⁰Chiwui vang eina, ivānaobing, nathumwui kaho kala kapangkakhui singpapam khavai kashap eina sālu; hibing sāakha nathum katangkha mangaphokmara. ¹¹Chithākha ithumwui Proho kala Huikhame Jishu Khristawui wungram katang makhavai chili kazangwui apong nathumli pemting eina mira.

¹²Chieina, nathumna theida ara nathumna singtit khalei khamashungli nganingtitta leilala, hibingwui pongli ina nathumli atam kachida phaningung ngasakra. ¹³Ina kachonshim hili leiphailakha eina, phaningung eina nathumli ngatha̱ ngasak khavai phāmeira da phaninga, ^a a v13 Peterna awui phasā khamathang chi 'kachonshim' da hoi—ana thākta horkhavai kasha̱kha pamkhavai apamna (2 Corinthians 5:1–4 yanglu). ¹⁴Kaja ithumwui Proho Jishu Khristana ili chitheimi kahai thada, ina thākta iwui kachonshim chi horhaira da thei. ¹⁵Ina kānthuihai kajiwui thili nathumna hibing atam kachida phaningung khavai, inala kashap eina sāra.

¹⁶Kaja ithumna ithumwui Proho Jishu Khristawui pangshap kala awui kharā chi nathumli hāngkhavai thangkhamei eina semkahai khararchān mashurmana. Kha ithumna awui khayā kakā chi mik eina thei samphang kahaibingna.

¹⁷Ithumwui Avāwui eina ana khayāshi kala tekhamatei samphanga, chitharan Tekhamatei Hakkhamahāwui eina akhon akhana ali rāda hānga: "Hi iwui Anaomayara, ina leishi kaje; ina awuili ningyāng unga." ^b b v17 Hibing hi phungreili Avā khalattawui tuibingna—ana awui Anaomayarali ningyāng ungda ali leikashe da hoi, Jishuwui khangachā mangachei atamli Peter, James kala Johnna khuisang kahai kahāng chichingana.

¹⁸Ithum khalattana kazingramwui eina kharā akhon hi shai, kaja ithum kathara kaphungli ali ngasopamsai.

¹⁹Chili lāngda, marānbingwui tui khamashungmei sākahai chi ithumwuili lei. Kazing mathang kala zingthanwo nathumwui wuklungli mashokranglakha eina tangda, tangkhamang apamli horkahai thaomei kathāna, nathumna chili nganaakha khamathāna. ²⁰Saikorawui reili, Kathara lairikwui marānkhami akhala mi kachichāwui kakhalat eina makharāmana kaji nathumna theishingkhui phalungra. ²¹Marānkhami akhala miwui ning eina makharāhaimana, kha Manglā Katharana ngazatlaga mibingna ithumwui Avāwui eina hānga.