Petero Aandĩkĩra Arĩa Marĩ na Wĩtĩkio Ũiganaine na Witũ

Gũkaania ũhoro wa arutani a maheeni na anyũrũrania, na gwĩta andũ makũre thĩinĩ wa wega o makĩetereria gũcooka kwa Mwathani.

Gĩcunjĩ 1.

Niĩ Simoni Petero, ndungata na mũtũmwo wa Jesũ Kristũ, kũrĩ arĩa maaheirwo wĩtĩkio wa goro taarĩ witũ nĩ ũndũ wa ũthingu wa Ngai witũ na Mũhonokia witũ Jesũ Kristũ: Wega na thaayũ iroingĩhĩra harĩ inyuĩ nĩ ũndũ wa kũmenya Ithe witũ na Jesũ Mwathani witũ.

Agwatanĩri a Mũtugo wa Ithe witũ

Hinya wake wa ũngai nĩwatũheire maũndũ mothe marĩa twagĩrĩirwo nĩ kũgĩa namo ma muoyo na kwĩyamũra kũrĩ Ngai, nĩ ũndũ wa kũmũmenya we ũrĩa watwĩtire na riiri wake na ũega wake. Nĩ ũndũ wa maũndũ macio nĩatũheire ciĩranĩro ciake cia goro na nene mũno, nĩ geetha nĩ ũndũ wacio mũgwatanĩre mũtugo wa ũngai, mwarĩkia kũũrĩra ũbutu wa thĩ ũrĩa uumanaga na merirĩria mooru. Kwoguo, mũkĩĩrutanagĩria na hinya wanyu wothe, ongererai wega harĩ wĩtĩkio wanyu, na harĩ wega, ũmenyo; na harĩ ũmenyo, kwĩgirĩrĩria; na harĩ kwĩgirĩrĩria, gũkirĩrĩria; na harĩ gũkirĩrĩria, kwĩyamũra kũrĩ Ngai; na harĩ kwĩyamũra kũrĩ Ngai, wendani wa ũrũmwe; na harĩ wendani wa ũrũmwe, wendo. Angĩkorwo mũrĩ na maũndũ macio magĩthiĩ na mbere kũingĩha, nĩmekũmũgiria mũtuĩke a tũhũ kana mũage maciaro harĩ kũmenya Mwathani witũ Jesũ Kristũ. No mũndũ ũrĩa wothe ũtarĩ na maũndũ macio nĩ mũtumumu, ndaroonaga haraaya, nĩariganĩirwo atĩ nĩatheririo mehia make ma tene. Kwoguo, ariũ na aarĩ a ithe witũ, kĩrutanĩriei gwĩkĩra hinya gwĩtwo kwanyu na gũthuurwo kwanyu; ĩkai maũndũ macio na mũtikahĩngwo o na rĩ. Na ũndũ ũcio nĩmũkaheererwo na ũtaana mũingĩ gũtoonya ũthamakiinĩ wa tene na tene wa Mwathani witũ na Mũhonokia witũ Jesũ Kristũ.

Kwoguo nĩngũtũũra ndĩmũririkanagia maũndũ macio hĩndĩ ciothe, o na gũtuĩka nĩmũmamenyete na mũkarũgama wega ũhoroinĩ wa ma ũrĩa mũrĩ naguo rĩu. Ndĩĩciiragia nĩ kwagĩrĩire kũmwarahũra na ũndũ wa kũmũririkania maũndũ macio hĩndĩ ĩrĩa ndĩrĩ thĩinĩ wa hema ĩno, ^a tondũ nĩnjũũĩ atĩ ica ikuhĩ nĩngũiga hema yakwa thĩ, o ta ũrĩa Mwathani witũ Jesũ Kristũ anyoonirie. Na ningĩ nĩngwĩrutanĩria nĩ geetha hĩndĩ ciothe mũhotage kũririkana maũndũ macio thuutha wa gũthiĩ gwakwa.

Amu tũtiarũmĩrĩire ng'ano cia ũũgĩ wa andũ rĩrĩa twaamwĩraga ũhoro wa hinya wa Mwathani witũ Jesũ Kristũ na gũũka gwake—ithuĩ twarĩ aira arĩa meeyoneire riiri wake na maitho maao.

Nĩaaheirwo gĩtĩĩo na riiri kuuma kũrĩ Ithe witũ rĩrĩa mũgambo wamũkinyĩire kuuma kũrĩ Riiri ũrĩa Mũnene, ũkiuga atĩrĩ, “Ũyũ nĩ Mũũriũ wakwa, ũrĩa nyendete; nĩngenagĩra nĩ ũndũ wake.” ^b

Ithuĩ ene nĩtwaiguire mũgambo ũcio ũgĩũka kuuma igũrũ, nĩgũkorwo twarĩ hamwe nake kĩrĩmainĩ kĩrĩa gĩtheru.

Na ningĩ tũrĩ na kiugo kĩa ũnabii kĩrĩa kĩrĩkĩtie kwĩkĩrwo hinya makĩria—nĩmwĩkaga wega gũkĩrũmbũiya, taarĩ tawa ũrĩa ũraara handũ harĩ nduma, nginya gũgaakĩa na njata ya rũũciinĩ yumĩre ngoroinĩ cianyu. Mbere ya maũndũ mothe, no mũhaka mũmenye atĩ gũtirĩ ũnabii o na ũrĩkũ wa Maandĩko uumanaga na gũtaũra kwa mũndũ we mwene. Gũtirĩ ũnabii o na ũrĩkũ wookire na ũndũ wa kwenda kwa mũndũ, no andũ maaririe moimĩte kũrĩ Ithe witũ, magĩtwaragwo nĩ Roho Mũtheru.