Fitsapana ny Fanahy

Andramo ny fanahy; ireo manaiky fa tonga tamin'ny nofo i Jesosy dia avy amin'ny Raintsika. Avy Aminy ny fitiavana satria fitiavana ny Raintsika, voaporofo tamin'ny nanirahany ny Zanany. Ny fitiavana tanteraka mandroaka ny tahotra, ary izay mankahala rahalahy hitany dia tsy afaka milaza fa tia ny Ray.

Toko 4.

Ry malala, aza minoka ny fanahy rehetra, fa tsapao ny fanahy mba hahafantatra raha avy amin’i Raintsika izy, satria maro ny mpaminany sandoka efa nivoaka nankany amin’izao tontolo izao. Izao no ahafantaranareo ny Fanahin’i Raintsika: ny fanahy rehetra manaiky fa Jesosy Kristy dia tonga tamin’ny nofo dia avy amin’i Raintsika, ary ny fanahy rehetra tsy manaiky an’i Jesosy dia tsy avy amin’i Raintsika. Izany no fanahin’ny antikristy, izay renareo fa ho avy, ary efa eto amin’izao tontolo izao ankehitriny. Ianareo, ry zanaka kely, dia avy amin’i Raintsika ka efa resinareo ireo, satria Izay ao aminareo dia lehibe noho izay eo amin’izao tontolo izao. Avy amin’izao tontolo izao izy ireo; ary noho izany dia miteny araka izay avy amin’izao tontolo izao izy, ary mihaino azy ny tontolo. Avy amin’i Raintsika izahay. Izay mahalala Azy dia mihaino anay; izay tsy avy Aminy dia tsy mihaino anay. Izany no ahafantarantsika ny Fanahin’ny fahamarinana sy ny fanahin’ny fahadisoana.

Fitiavana i Raintsika

Ry malala, aoka isika hifankatia, fa avy amin’i Raintsika ny fitiavana, ary izay rehetra tia dia naterak’i Raintsika ary mahalala Azy. Izay tsy tia dia tsy mahalala an’i Raintsika, satria fitiavana i Raintsika. ^a Izao no nanehoana ny fitiavan’i Raintsika teo amintsika: nandefa ny Zanany Lahitokana ho amin’izao tontolo izao i Raintsika, mba ho velona isika amin’ny alalan’ny Zanaka. Izao no fitiavana: tsy ny nitiavantsika an’i Raintsika, fa ny nitiavan’Izy antsika sy nandefasany ny Zanany ho sorona fanonerana ny fahotantsika. ^b Ry malala, raha tia antsika toy izany i Raintsika, dia tokony hifankatia koa isika. Tsy misy olona nahita an’i Raintsika na oviana na oviana; raha mifankatia isika, dia mitoetra ao amintsika i Raintsika, ary tanteraka ao amintsika ny fitiavany. Izao no ahafantarantsika fa mitoetra Aminy isika ary Izy mitoetra amintsika: nomeny antsika ny Fanahiny. Efa hitanay ary vavolombelona izahay fa nirahin’i Raintsika ny Zanaka ho Mpamonjy ny tontolo. Izay rehetra manaiky fa Jesosy no Zanak’i Raintsika, dia mitoetra ao aminy i Raintsika, ary izy mitoetra amin’i Raintsika. Efa fantatsika ary ninoantsika ny fitiavana ananan’i Raintsika aminitsika. Fitiavana i Raintsika, ary izay mitoetra amin’ny fitiavana dia mitoetra Aminy, ary Izy mitoetra aminy. Izao no ahatanterahan’ny fitiavana aminitsika, mba hanana toky isika amin’ny andro fitsarana, satria araka ny maha-Izy Azy no itoetantsika eto amin’izao tontolo izao. Tsy misy tahotra ao amin’ny fitiavana; ny fitiavana tanteraka mandroaka ny tahotra, satria ny tahotra dia mitondra famaizana, ary izay matahotra dia tsy tanteraka amin’ny fitiavana. Tia isika satria i Raintsika no tia antsika aloha. Raha misy milaza hoe: «Tia an’i Raintsika aho,» nefa mankahala ny rahalahiny, dia mpandainga izy. Fa izay tsy tia ny rahalahiny hitany dia tsy mahay tia an’i Raintsika izay tsy hitany. Ary izao didy izao no azontsika avy Aminy: izay tia an’i Raintsika dia tsy maintsy tia ny rahalahiny koa.