Hafuurota Qorachuu

Hafuurota qoradhaa; warri Yesus foon ta'ee akka dhufe himan Abbaa keenya irraa ti. Jaalalli isa irraa dhufa, sababiin isaas Abbaan keenya jaalala; kunis Ilma isaa erguu isaatiin mirkanaa'e. Jaalalli guutuun sodaa ni ari'a, namni obboleessa isaa kan arge jibbu kamiyyuu Abbaa jaalladha jechuu hin danda'u.

Boqonnaa 4.

Yaa jaallatamtoota, hafuura hundumaa hin amaniinaa; hafuurotni sun kan Abbaa keenyaa ta'uu isaanii akka ilaaltaniif hafuurota qoradhaa, sababii raajonni sobaa baay'een gara addunyaatti ba'aniiru. Kanaan Hafuura Abbaa keenyaa in beektu: hafuurri Yesus Kristos foon uffatee akka dhufe himatu hundinuu kan Abbaa keenyaa dha, hafuurri Yesusin hin himanne hundinuu kan Abbaa keenyaa miti. Kun hafuura Kristos mormaa, akka inni dhufu dhageessan, amma illee addunyaa keessa jiru dha. Yaa ijoollee xixiqqoo, isin kan Abbaa keenyaa dha; isaanis mo'attaniirtu, sababii isa isin keessa jiru isa addunyaa keessa jiru caalaa guddaa dha. Isaan kan addunyaa dha; kanaaf kan addunyaa in dubbatu, addunyaanis isaan in dhaga'a. Nuti kan Abbaa keenyaa dha. Namni isa beeku nu in dhaga'a; namni kan isaa hin taane nu hin dhaga'u. Kanaan Hafuura dhugaa fi hafuura dogoggoraa in beekna.

Abbaan Keenya Jaalala Dha

Yaa jaallatamtoota, jaalalli kan Abbaa keenyaa waan ta'eef wal jaallannaa; nama jaallatu hundinuu isa irraa dhalatee, isas in beeka. Namni hin jaallanne Abbaa keenya hin beeku, sababii Abbaan keenya jaalala dha. ^a Jaalalli Abbaa keenyaa nu gidduutti kanaan mul'ate: Abbaan keenya akka nuti isa karaa isaatiin jiraannuuf Ilma isaa tokkicha gara addunyaatti erge. Jaalalli kana: nuti Abbaa keenya jaallachuu keenya osoo hin taane, inni nu jaallatee Ilma isaa aarsaa araarsituu cubbuu keenyaaf erguu isaa dha. ^b Yaa jaallatamtoota, Abbaan keenya akkas yoo nu jaallate, nutis wal jaallachuu qabna. Namni tokkollee Abbaa keenya yoomiyyuu hin argine; yoo wal jaallanne, Abbaan keenya nu keessa in jiraata, jaalalli isaas nu keessatti in guutama. Kanaan nuti isa keessa akka jiraannu, innis nu keessa akka jiraatu in beekna: Hafuura isaa nuuf kenneera. Abbaan Ilma isaa Fayyisaa addunyaa ta'ee akka erge arginee ragaa in baana. Namni Yesus Ilma Abbaa keenyaa ta'uu isaa himatu hundinuu, Abbaan keenya isa keessa in jiraata, innis Abbaa keenya keessa in jiraata. Nuti jaalala Abbaan keenya nuuf qabu beekneerra, amannelles jirra. Abbaan keenya jaalala dha; namni jaalala keessa jiraatu hundinuu isa keessa in jiraata, innis isaan keessa in jiraata. Akka nuti guyyaa murtii irratti ija jabina qabaannuuf, jaalalli akkasitti nu keessatti in guutama; sababii akkuma inni jiru, nutis addunyaa kana keessatti akkasuma jirra. Jaalala keessa sodaan hin jiru; jaalalli guutuun sodaa in baasa, sababii sodaan adabbii waliin walitti hidhata, namni sodaatu hundinuu jaalala keessatti hin guutamne. Nuti in jaallanna, sababii Abbaan keenya duraan nu jaallateef. Namni tokko «Abbaa keenya in jaalladha» jedhee, obboleessa isaa immoo yoo jibbe, sobduu dha. Namni obboleessa isaa isa arge hin jaallanne, Abbaa keenya isa hin argine jaallachuu hin danda'u. Ajajni nuti isa irraa qabnu kana dha: namni Abbaa keenya jaallatu obboleessa isaas jaallachuu qaba.