Babu Inda Ba Ya Kaiwa

Don shugaban mawaƙa. Zabura ta Dawuda.

Babu wurin da yake waje da sanin Ubansa: sama, kabari, can ƙarshen teku, ko duhun da ya zama ba duhu ba ne. Har da cikin uwa, inda aka saƙa marubucin. Ya ƙare da gayyatar bincike: ka san zuciyata.

Babi na 139.

Ka bincike ni, ya Ubana, ka kuma san ni. Ka san sa'ad da nake zama da sa'ad da nake tashi; ka gane tunanina tun daga nesa. Ka bincika hanyata da hutuna, ka kuma saba da dukan hanyoyina. Tun ma kafin magana ta kasance a harshena, ka san ta sarai, ya Ubana. Ka kewaye ni, a baya da a gaba, ka kuma ɗora hannunka a kaina. Irin wannan sani abin mamaki ne ƙwarai a gare ni; ya yi can sama, ba zan iya kaiwa gare shi ba.

Ina zan tafi in guje wa Ruhunka? Ina zan gudu in rabu da gabanka? In na hau zuwa sammai, kana nan; in na shimfiɗa gadona a cikin kabari, kana nan. In na hau fikafikan asuba, na kuma zauna a can gefen teku mai nisa, a can ma hannunka zai bi da ni, hannunka na dama kuma zai riƙe ni kam. In na ce, “Lalle duhu zai rufe ni, hasken da yake kewaye da ni kuma zai zama dare,” duhu ma ba duhu ba ne a gare ka; dare yana haskakawa kamar rana, gama duhu kamar haske yake a gare ka.

Gama kai ne ka halicci zuciyata ta ciki; ka saƙa ni a cikin mahaifar mahaifiyata. ^a Ina yabonka, gama an halicce ni da bantsoro da banmamaki; ayyukanka abubuwan mamaki ne, raina kuma ya san haka sarai. Jikina bai ɓoye daga gare ka ba, sa'ad da aka halicce ni a ɓoye, da aka saƙa ni daidai a cikin zurfin ƙasa. Idanunka sun ga jikina tun kafin a gama halittarsa; an rubuta dukan kwanakina a littafinka, aka kuma ƙaddara su domina, tun kafin ko ɗayansu ya kasance. Yadda tunaninka yake da daraja a gare ni, ya Ubana! Yawansu kuma, ba a iya ƙidayawa! In zan iya ƙidaya su, za su fi yashi yawa. Sa'ad da na farka, har yanzu ina tare da kai.

Da ma za ka kashe mugaye, ya Ubana! Ku rabu da ni, ku masu ƙishirwar jini! Suna maganarka da mugun nufi; abokan gābanka suna ɗaukar sunanka a banza. Ashe, ba na ƙin masu ƙinka ba, ya Ubana? Ba na ƙyamar masu tāsa maka ba? Ina ƙinsu da cikakkiyar ƙiyayya; na ɗauke su a matsayin abokan gābana.

Ka bincike ni, ya Ubana, ka san zuciyata; ka gwada ni, ka san damuwar tunanina, ka kuma gani ko akwai wata muguwar hanya a cikina, ka bi da ni a hanya madawwamiya.