1 Pedro 4

4 ¹Busa, tungod kay si Cristo nag-antos diha sa unod, sangkapi usab ninyo ang inyong kaugalingon sa samang panghunahuna: si bisan kinsa nga mag-antos diha sa unod nahuman na sa sala. ²Busa dili na ninyo gugolon ang nahibilin ninyong panahon diha sa unod alang sa mga pangibog sa tawo, kondili alang sa kabubut-on sa atong Amahan. ³Igo na ang panahon nga inyong gigugol sa pagbuhat sa gusto niadtong wala makaila sa Amahan: ang pagpuyo sa kaulag, kaibog, paghuboghubog, mga mabangis nga kombira, mga inom-inom, ug pagsimba sa mga dios-dios nga supak sa balaod. ⁴Natingala sila nga dili na kamo mouban kanila ngadto sa samang baha sa mabangis nga pagkinabuhi, busa gibugalbugalan nila kamo. ⁵Apan manubag sila ngadto sa usa nga andam maghukom sa mga buhi ug sa mga patay. ⁶Mao kini ang hinungdan nga ang maayong balita giwali bisan ngadto sa mga patay na karon: gihukman diha sa unod sama sa tanang tawo, apan mabuhi sila diha sa espiritu sama sa atong Amahan.

⁷Haduol na ang kataposan sa tanang butang. Busa pagtin-aw ug panghunahuna ug pagpugong sa inyong kaugalingon aron makaampo kamo. ⁸Labaw sa tanan, padayon kamo sa paghigugmaay pag-ayo, kay ang gugma nagtabon sa daghang mga sala. ⁹Pagmaabiabihon kamo sa usag usa nga walay bagulbol. ¹⁰Ang matag usa kaninyo, gamita ang bisan unsang gasa nga inyong nadawat sa pag-alagad sa uban, ingon nga maayong mga piniyalan sa nagkadaiyang grasya sa atong Amahan. ¹¹Si bisan kinsa nga mosulti kinahanglan mosulti ingon nga usa nga nagdala sa mismong mga pulong sa atong Amahan. Si bisan kinsa nga mag-alagad kinahanglan mag-alagad pinaagi sa kusog nga iyang gihatag, aron sa tanang butang mahimaya siya pinaagi kang Jesu-Cristo. Iya ang himaya ug ang gahom hangtod sa kahangtoran. Amen.

Pag-antos sa Ngalan sa Amahan

¹²Hinigugma kong mga higala, ayaw kamo katingala sa nagdilaab nga pagsulay nga nagsulay kaninyo, nga daw adunay katingalahang nahitabo kaninyo. ¹³Hinunoa, pagmaya kamo samtang nakaambit kamo sa mga pag-antos ni Cristo, aron magmaya usab kamo nga may dakong kalipay kon ipadayag na ang iyang himaya. ¹⁴Kon bugalbugalan kamo tungod sa ngalan ni Cristo, bulahan kamo, kay ang Espiritu sa himaya ug sa atong Amahan nagapahulay diha kaninyo. ¹⁵Walay usa kaninyo nga kinahanglan mag-antos ingon nga mamumuno, kawatan, kriminal, o manghilabot sa mga buluhaton sa uban. ¹⁶Apan kon mag-antos kamo ingon nga Cristohanon, ayaw kamo kaulaw, kondili dayega ninyo ang atong Amahan nga nagdala kamo nianang ngalana. ¹⁷Kay panahon na nga ang paghukom magsugod sa panimalay sa atong Amahan; kon magsugod kini kanato, unsa may maghulat niadtong wala motuman sa maayong balita sa atong Amahan? ¹⁸Ug, “Kon ang matarong halos maluwas, unsa may mahitabo sa dili diosnon ug sa makasasala?” ¹⁹Busa, kadtong nag-antos sumala sa kabubut-on sa atong Amahan kinahanglan magtugyan sa ilang mga kalag ngadto sa ilang matinud-anong Magbubuhat, nga nagabuhat ug maayo.