1 Peteru 4

4 ¹Nítorí náà, bí Kristi ti jìyà nínú ara, ẹ fi èrò inú kan náà hámọ́ra pẹ̀lú: ẹnikẹ́ni tí ó bá jìyà nínú ara ti fi ẹ̀ṣẹ̀ sílẹ̀. ²Nítorí náà, ẹ kì yóò fi àkókò yín tí ó ṣẹ́kù nínú ara ṣe fún ìfẹ́kúfẹ̀ẹ́ ènìyàn mọ́, bí kò ṣe fún ìfẹ́ Baba wa. ³Ẹ ti lo àkókò tí ó tó tẹ́lẹ̀ láti máa ṣe ohun tí àwọn tí kò mọ Baba fẹ́: gbígbé nínú wọ̀bìà, ìfẹ́kúfẹ̀ẹ́, ọ̀mùtí, ariya àṣejù, ìmutí yó, àti ìbọ̀rìṣà aláìlófin. ⁴Ó ya wọ́n lẹ́nu pé ẹ kì í bá wọn sáré wọ inú àkúnya ìwà rúdurùdu kan náà mọ́, nítorí náà wọ́n ń kẹ́gàn yín. ⁵Ṣùgbọ́n wọn yóò jíhìn fún ẹni tí ó ti múra tán láti ṣe ìdájọ́ alààyè àti òkú. ⁶Ìdí nìyí tí a fi wàásù ìhìnrere fún àwọn tí ó ti kú nísinsìnyí pẹ̀lú: kí a lè ṣe ìdájọ́ wọn nínú ara gẹ́gẹ́ bí gbogbo ènìyàn, ṣùgbọ́n kí wọ́n lè wà láàyè nínú ẹ̀mí gẹ́gẹ́ bí Baba wa.

⁷Òpin ohun gbogbo ti súnmọ́. Nítorí náà, ẹ ní èrò inú tí ó mọ́ gaara, kí ẹ sì kó ara yín níjàánu, kí ẹ lè gbàdúrà. ⁸Ju gbogbo rẹ̀ lọ, ẹ máa fẹ́ ara yín lẹ́nì kíní kejì jinlẹ̀, nítorí ìfẹ́ a máa bo ọ̀pọ̀lọpọ̀ ẹ̀ṣẹ̀ mọ́lẹ̀. ⁹Ẹ máa ṣe àlejò sí ara yín láìkùn. ¹⁰Olúkúlùkù yín, ẹ fi ẹ̀bùn yòówù tí ẹ ti gbà sìn àwọn ẹlòmíràn, gẹ́gẹ́ bí ìríjú rere oore-ọ̀fẹ́ Baba wa tí ó ní oríṣiríṣi. ¹¹Ẹnikẹ́ni tí ó bá sọ̀rọ̀, kí ó sọ̀rọ̀ gẹ́gẹ́ bí ẹni tí ń sọ ọ̀rọ̀ Baba wa gan-an. Ẹnikẹ́ni tí ó bá ń sìn, kí ó sìn nípa agbára tí Baba wa ń pèsè, kí a lè yìn ín lógo nínú ohun gbogbo nípasẹ̀ Jesu Kristi. Tirẹ̀ ni ògo àti agbára láé àti láéláé. Àmín.

Ìjìyà nínú Orúkọ Baba

¹²Ẹ̀yin ọ̀rẹ́ mi ọ̀wọ́n, ẹ má ṣe jẹ́ kí ó yà yín lẹ́nu nípa ìdánwò gbígbóná tí ń dán yín wò, bí ẹni pé ohun àjèjì kan ṣẹlẹ̀ sí yín. ¹³Dípò bẹ́ẹ̀, ẹ máa yọ̀ níwọ̀n bí ẹ ti ń pín nínú ìjìyà Kristi, kí ẹ lè yọ̀ pẹ̀lú ayọ̀ pẹ̀lú nígbà tí a bá fi ògo rẹ̀ hàn. ¹⁴Bí a bá kẹ́gàn yín nítorí orúkọ Kristi, alábùkún-fún ni yín, nítorí Ẹ̀mí ògo àti ti Baba wa ń bà lé e yín. ¹⁵Kí ẹnikẹ́ni nínú yín má ṣe jìyà gẹ́gẹ́ bí apànìyàn, olè, arúfin, tàbí ẹni tí ń dá sí ọ̀rọ̀ àwọn ẹlòmíràn. ¹⁶Ṣùgbọ́n bí ẹ bá jìyà gẹ́gẹ́ bí Kristiẹni, ojú kí ó má ṣe tì yín, ṣùgbọ́n ẹ yin Baba wa pé ẹ ru orúkọ náà. ¹⁷Nítorí àkókò ti tó fún ìdájọ́ láti bẹ̀rẹ̀ láti ọ̀dọ̀ ìdílé Baba wa; bí ó bá sì bẹ̀rẹ̀ láti ọ̀dọ̀ wa, kí ni yóò dé bá àwọn tí kò gbọ́ràn sí ìhìnrere Baba wa? ¹⁸Àti pé, “Bí olódodo bá fi ìnira là, kí ni yóò ṣẹlẹ̀ sí aláìwà-bí-Ọlọ́run àti ẹlẹ́ṣẹ̀?” ¹⁹Nítorí náà, àwọn tí ó ń jìyà gẹ́gẹ́ bí ìfẹ́ Baba wa, kí wọ́n fi ọkàn wọn lé Ẹlẹ́dàá olóòótọ́ wọn lọ́wọ́, kí wọ́n sì máa ṣe rere.