彼得前書 4

4 ¹所以,既然基督喺肉身受過苦,你哋都要用同樣嘅心志武裝自己:因為喺肉身受過苦嘅人,就同罪斷絕咗。 ²咁樣,你哋喺肉身餘下嘅日子,就唔再順從人嘅私慾,而係遵行我哋嘅父嘅旨意。 ³因為你哋以往已經花咗夠多時間,去做嗰啲唔認識天父嘅人所鍾意做嘅事:好色、放縱情慾、醉酒、荒宴、狂飲,同埋可憎嘅拜偶像。 ⁴佢哋見你哋唔再同佢哋一齊投入同樣放蕩嘅洪流,就覺得出奇,於是譭謗你哋。 ⁵但係佢哋要向嗰位預備好審判活人同死人嘅主交代。 ⁶就係為咗呢個緣故,福音都傳埋畀而家已經死咗嘅人:佢哋雖然好似所有人一樣,喺肉身受咗審判,但係可以喺靈裏面好似我哋嘅父咁樣活着。

⁷萬物嘅結局近咗。所以你哋要頭腦清醒、自我節制,好等你哋可以禱告。 ⁸最緊要嘅係,你哋要繼續彼此深切相愛,因為愛可以遮蓋許多嘅罪。 ⁹你哋要彼此接待,唔好發怨言。 ¹⁰你哋各人要按住自己所領受嘅恩賜,彼此服事,好好做我哋嘅父各樣恩典嘅好管家。 ¹¹講道嘅,就要好似傳講我哋嘅父嘅話語咁講;服事嘅,就要靠住佢所賜嘅力量去服事,好等佢喺凡事上,藉住耶穌基督得着榮耀。願榮耀同權能都歸畀佢,直到永永遠遠。阿們。

為天父嘅名受苦

¹²親愛嘅朋友,當有火一般嘅試煉臨到、考驗你哋嘅時候,唔好覺得出奇,好似有啲奇怪嘅事發生喺你哋身上咁。 ¹³相反,你哋越係有份於基督嘅苦難,就越應該歡喜,好等佢嘅榮耀顯現嘅時候,你哋都可以歡喜快樂。 ¹⁴你哋若果為咗基督嘅名受譭謗,你哋就有福喇,因為榮耀嘅靈,亦即我哋父嘅靈,安息喺你哋身上。 ¹⁵你哋當中,唔應該有人因為做兇手、做賊、做犯法嘅人,或者好管人閒事而受苦。 ¹⁶但係你哋若果因為做基督徒而受苦,就唔好覺得羞恥,反而要因為擔當呢個名,而讚美我哋嘅父。 ¹⁷因為時候到喇,審判要從我哋嘅父嘅家開始;若果先從我哋開始,咁,嗰啲唔順從我哋嘅父嘅福音嘅人,又會有咩結局呢? ¹⁸又話:「若果義人僅僅得救,咁,不敬虔嘅人同罪人又會點呢?」 ¹⁹所以,嗰啲按住我哋嘅父嘅旨意受苦嘅人,應該一面行善,一面將自己嘅靈魂交託畀嗰位信實嘅造物主。