१ पेत्र 4

4 ¹ म्हणून, ख्रिस्ताने देहात दुःख सहन केले, यास्तव तुम्हीही त्याच मनोवृत्तीने सज्ज व्हा: जो देहात दुःख सहन करतो तो पापापासून मुक्त झाला आहे. ² यासाठी की, तुम्ही देहातील उरलेला काळ यापुढे मानवी वासनांसाठी न घालवता आमच्या पित्याच्या इच्छेसाठी घालवावा. ³ जे पित्याला ओळखत नाहीत त्यांच्या इच्छेप्रमाणे वागण्यात तुम्ही आधीच पुरेसा काळ घालवला आहे: कामातुरता, वासना, मद्यपान, धुंद मौजमजा, दारूचे थैमान आणि अनाचारी मूर्तिपूजा यांत जगण्यात. ⁴ तुम्ही आता त्यांच्याबरोबर त्याच स्वैराचाराच्या पुरात धावत नाही याचे त्यांना आश्चर्य वाटते, म्हणून ते तुमची निंदा करतात. ⁵ पण जो जिवंतांचा व मेलेल्यांचा न्याय करण्यास सिद्ध आहे त्याला ते जाब देतील. ⁶ यासाठीच मेलेल्यांनासुद्धा सुवार्ता सांगण्यात आली: माणसांप्रमाणे देहात त्यांचा न्याय व्हावा, पण आमच्या पित्याप्रमाणे ते आत्म्यात जिवंत राहावेत.

⁷ सर्व गोष्टींचा शेवट जवळ आला आहे. म्हणून सावध व संयमी असा, यासाठी की तुम्ही प्रार्थना करू शकाल. ⁸ सर्वांहून महत्त्वाचे म्हणजे, एकमेकांवर मनापासून प्रीती करत राहा, कारण प्रीती पापांच्या समुदायाला झाकते. ⁹ कुरकुर न करता एकमेकांचे आदरातिथ्य करा. ¹⁰ तुमच्यापैकी प्रत्येकाने, आमच्या पित्याच्या नानाविध कृपेचे चांगले कारभारी या नात्याने, आपल्याला मिळालेल्या देणगीचा उपयोग एकमेकांची सेवा करण्यासाठी करावा. ¹¹ जो कोणी बोलतो त्याने आमच्या पित्याचीच वचने सांगणाऱ्याप्रमाणे बोलावे. जो कोणी सेवा करतो त्याने तो पुरवतो त्या सामर्थ्याने सेवा करावी, यासाठी की सर्व गोष्टींत येशू ख्रिस्ताद्वारे त्याचे गौरव व्हावे. गौरव व सामर्थ्य युगानुयुग आमच्या पित्याचेच आहे. आमेन.

पित्याच्या नावासाठी दुःखसहन

¹² प्रिय मित्रांनो, तुमची परीक्षा घेणाऱ्या अग्निपरीक्षेचे आश्चर्य मानू नका, जणू काही तुमच्यावर काहीतरी विचित्र घडत आहे. ¹³ उलट, तुम्ही ख्रिस्ताच्या दुःखात जितके वाटेकरी होता तितका आनंद करा, यासाठी की त्याचे गौरव प्रकट होईल तेव्हा तुम्हीही उल्हासाने आनंद कराल. ¹⁴ ख्रिस्ताच्या नावासाठी तुमची निंदा झाली, तर तुम्ही धन्य आहात, कारण गौरवाचा व आमच्या पित्याचा आत्मा तुमच्यावर वास करतो. ¹⁵ तुमच्यापैकी कोणीही खुनी, चोर, दुष्कर्मी किंवा दुसऱ्यांच्या कारभारात ढवळाढवळ करणारा म्हणून दुःख सहन करू नये. ¹⁶ पण ख्रिस्ती म्हणून तुम्ही दुःख सहन करत असाल, तर लाज बाळगू नका, उलट तुम्ही ते नाव धारण करता म्हणून आमच्या पित्याचे स्तवन करा. ¹⁷ कारण न्याय आमच्या पित्याच्या घराण्यापासून सुरू होतो; तो जर आमच्यापासून सुरू होतो, तर आमच्या पित्याच्या सुवार्तेची अवज्ञा करणाऱ्यांची काय गत होईल? ¹⁸ आणि, “नीतिमान जर कसाबसा तारला जातो, तर भक्तिहीन व पापी यांचे काय होईल?” ¹⁹ तर मग, आमच्या पित्याच्या इच्छेने जे दुःख सहन करतात त्यांनी सत्कर्म करत आपले जीव आपल्या विश्वासू निर्माणकर्त्याच्या हाती सोपवावेत.