1 ጴጥሮስ 4

4 ¹እንግዲህ ክርስቶስ በሥጋ መከራ ስለተቀበለ፣ እናንተም በዚሁ አሳብ ታጠቁ፤ በሥጋ መከራ የተቀበለ ከኀጢአት ተለይቷልና። ²ስለዚህ ከእንግዲህ የቀረውን ዘመን በሥጋ ሳላችሁ ለሰው ምኞት ሳይሆን ለአባታችን ፈቃድ ኑሩ። ³አብን የማያውቁ ሰዎች የሚፈልጉትን ስታደርጉ ያሳለፋችሁት ዘመን ይበቃል፤ በመዳራት፣ በክፉ ምኞት፣ በስካር፣ በዘፈናማ ግብዣ፣ በመጠጥ ዝንፍያና በዓመፀኛ ጣዖት አምልኮ ኖራችኋል። ⁴ከእንግዲህ ከእነርሱ ጋር ወደዚያው የመዳራት ጎርፍ ስለማትሮጡ ይደነቃሉ፤ ስለዚህ ይሰድቧችኋል። ⁵እነርሱ ግን በሕያዋንና በሙታን ሊፈርድ ተዘጋጅቶ ላለው መልስ ይሰጣሉ። ⁶ወንጌል አሁን ለሞቱትም የተሰበከበት ምክንያት ይህ ነው፤ እንደ ሰው ሁሉ በሥጋ ይፈረድባቸው ዘንድ፣ ነገር ግን እንደ አባታችን በመንፈስ ይኖሩ ዘንድ ነው።

⁷የሁሉም ነገር መጨረሻ ቀርቧል። ስለዚህ ትጸልዩ ዘንድ ልባሞችና ራሳችሁን የምትገዙ ሁኑ። ⁸ከሁሉም በላይ እርስ በርሳችሁ አጥብቃችሁ ተዋደዱ፤ ፍቅር የኀጢአትን ብዛት ይሸፍናልና። ⁹ያለ ማጉረምረም እርስ በርሳችሁ እንግዳ ተቀባዮች ሁኑ። ¹⁰እያንዳንዳችሁ የተለያየውን የአባታችንን ጸጋ እንደሚያስተዳድሩ መልካም መጋቢዎች፣ የተቀበላችሁትን ስጦታ ሌሎችን ለማገልገል ተጠቀሙበት። ¹¹የሚናገር ቢኖር የአባታችንን ቃል እንደሚያስተላልፍ ሆኖ ይናገር፤ የሚያገለግል ቢኖር እርሱ በሚሰጠው ኀይል ያገልግል፤ ይህም በኢየሱስ ክርስቶስ በኩል በሁሉ ነገር እርሱ እንዲከብር ነው። ክብርና ኀይል ከዘላለም እስከ ዘላለም ለእርሱ ይሁን። አሜን።

በአብ ስም መከራ መቀበል

¹²ወዳጆች ሆይ፤ የሚፈትናችሁ የእሳት መከራ እንግዳ ነገር እንደ ደረሰባችሁ አድርጋችሁ አትደነቁ። ¹³ነገር ግን የክርስቶስን መከራ በተካፈላችሁ መጠን ደስ ይበላችሁ፤ ክብሩ ሲገለጥ በታላቅ ሐሤት ደስ እንዲላችሁ ነው። ¹⁴ስለ ክርስቶስ ስም ብትሰደቡ ብፁዓን ናችሁ፤ የክብርና የአባታችን መንፈስ በእናንተ ላይ ያርፋልና። ¹⁵ከእናንተ ማንም ነፍሰ ገዳይ ወይም ሌባ ወይም ክፉ አድራጊ ወይም በሌሎች ጒዳይ ጣልቃ ገብ ሆኖ መከራ አይቀበል። ¹⁶ክርስቲያን ሆናችሁ መከራ ብትቀበሉ ግን አትፈሩ፤ ነገር ግን ያን ስም ስለተሸከማችሁ አባታችንን አመስግኑ። ¹⁷ፍርድ ከአባታችን ቤተ ሰብ የሚጀምርበት ጊዜ ነውና፤ ከእኛ ቢጀምር፣ የአባታችንን ወንጌል የማይታዘዙትን ምን ይጠብቃቸዋል? ¹⁸ደግሞም፣ “ጻድቅ እንኳ በጭንቅ የሚድን ከሆነ፣ ዓመፀኛውና ኀጢአተኛው ምን ይሆናሉ?” ¹⁹እንግዲህ በአባታችን ፈቃድ መከራ የሚቀበሉ መልካም እያደረጉ ነፍሳቸውን ለታመነው ፈጣሪ ያደራ ይስጡ።