1 ጴጥሮስ 5

5 ¹በመካከላችሁ ያሉትን ሽማግሌዎች፣ ባልንጀራ ሽማግሌ እንደ መሆኔ፣ የክርስቶስን መከራ ምስክር እንደ መሆኔ፣ ሊገለጥ ባለው ክብር ተካፋይ እንደ መሆኔ እማልዳቸዋለሁ፤ ²በመካከላችሁ ያለውን የአባታችንን መንጋ ጠብቁት፤ አባታችን እንደሚወድደው በግዴታ ሳይሆን በውዴታ፣ በሚያሳፍር ረብ ሳይሆን በትጋት እየጠበቃችሁት፤ ³ለእናንተ በአደራ የተሰጧችሁን በመግዛት ሳይሆን፣ ለመንጋው ምሳሌ በመሆን ጠብቁት። ⁴ዋናው እረኛ በሚገለጥበትም ጊዜ የማይጠፋውን የክብር አክሊል ትቀበላላችሁ። ^a a v4 ዋናው እረኛ ኢየሱስ ነው፤ ታማኝ ሽማግሌዎች ከእርሱ በታች የሚያገለግሉት፣ በሚገለጥበትም ጊዜ የሚከፍላቸው እርሱ ነው።

⁵እንዲሁም እናንተ ታናናሾች ለሽማግሌዎች ተገዙ። ሁላችሁም እርስ በርሳችሁ ትሕትናን ልበሱ፤ አባታችን ትዕቢተኞችን ይቃወማል፤ ለትሑታን ግን ጸጋን ይሰጣል። ⁶እንግዲህ በተገቢው ጊዜ ከፍ ከፍ እንዲያደርጋችሁ፣ ከአባታችን ኀያል እጅ በታች ራሳችሁን ዝቅ አድርጉ፤ ⁷እርሱ ስለ እናንተ ያስባልና ጭንቀታችሁን ሁሉ በአባታችን ላይ ጣሉ።

⁸በመጠን ኑሩ፤ ንቁ፤ ጠላታችሁ ዲያብሎስ የሚውጠውን ፈልጎ እንደሚያገሳ አንበሳ ይዞራል። ⁹በዓለም ያሉ ወንድሞቻችሁ ያንኑ መከራ እንደሚቀበሉ እያወቃችሁ፣ በእምነት ጸንታችሁ ተቃወሙት።

¹⁰በክርስቶስ ወደ ዘላለማዊ ክብሩ የጠራችሁ የጸጋ ሁሉ አባታችን፣ ለጥቂት ጊዜ መከራን ከተቀበላችሁ በኋላ፣ እርሱ ራሱ ፍጹማን ያደርጋችኋል፣ ያጸናችኋል፣ ያበረታችኋል፣ መሠረትም ይጥልላችኋል። ¹¹ለእርሱ ለዘላለም ግዛት ይሁን። አሜን።

¹²እኔ እንደማስበው ታማኝ ወንድም በሆነው በስልዋኖስ እጅ በአጭሩ ጻፍሁላችሁ፤ ይህም የአባታችን እውነተኛ ጸጋ መሆኑን እየመሰከርሁ አበረታታኋችሁ። በእርሱ ጽኑ።

የመጨረሻ ሰላምታ

¹³ከእናንተ ጋር አብራ የተመረጠችው በባቢሎን ያለችው ሰላምታ ታቀርብላችኋለች፤ ልጄ ማርቆስም እንዲሁ። ^b b v13 እዚህ ላይ “ባቢሎን” ለጥንቷ ከተማ ሳይሆን፣ ጴጥሮስ የጻፈባት የግዛት ማዕከል ለሆነችው ለሮም የተሰወረ ስም ሳይሆን አይቀርም። ¹⁴እርስ በርሳችሁ በፍቅር መሳሳም ሰላምታ ተሰጣጡ። በክርስቶስ ላላችሁ ለሁላችሁ ሰላም ይሁን።