Thükkabou Sanlombou phanga Sanlombou shuong
Jaishou shuong to seneibü Bou sanshuong dongebü nei, shamma peisilei shanga aying hoba aoei thüka songdakko aying, lomashi dogo lenda. Lubü pendou to sembüambü nei aneishi hoba kaneibü maangshatbü, kan shanga dambü, seneibü Bou thüka phoyoshi dogo lenda. Molosaonyu pailamda, lausikei phea kho chalou hanbü shanga naei ki hoba kaodak pendoua ki.
5 1Jaishou jeteibü, Khrista khonkubü aukabü, hoba tang khitla kibü soneikangbü yoabou yingsije, ngei kan yoa kibü jaishou shuong to kaangkosekko lenda: 2Kan yoa kibü seneibü Bou sanshuong lomashi, kho thounouko—kongsepan aying lausikei dongebü, Bouei maangangbü tegü; shamma peisilei shanga aying lausikei haiyeiko, 3kan la kubü shuong thüka asongdakko, lausikei sanshuong la lamyobü kishi. 4Hobaje Thükkabou Sanlombou tang khitan chühsi, kanei ladangkei amaulabü aying soneikangbü khun sungletlabü. a a v4 Thükkabou Sanlombou kho Jisu ki—maanglembü jaishou shuongei haoei phanga khangenda, hoba haoei tang khitlaje haoen la kayang kuda.
5Kho tegütham, younakshang shuong, kanei jaishou shuong phanga natenko kishi. Kan pendou, cheei che to sembüambü nei aneishi, aishanga Bouei lilibü shuong to dangda, lausikei sembüambü shuong to onou kuda. 6Khoei, haoei tükdebü jiha kan tonenla shanga, seneibü Bou hau kibü ik phanga kan lolo khonsakjan, 7kaneibü maangshatbü pendou seneibü Bou thüka phoyoko, aishanga haoei kan shanga damda.
8Kan lolo kaontishi hoba chühko kishi; kaneibü dangbou shieikoebü ngühkubü molosaonyu tegü pailamko, haoei shaula müt che phanda. 9Kaodak pendoua kibü kaneibü jaisina mailembü shuongei jeteibü khonku natenda dogo ngeko, mailema kaangkhühtham loan, hao to shekashi.
10Hobaje onou pendoueibü seneibü Bou, aoei Khrista danko hao ponpen soneikangbü to kan ngakei, haoei lolo kan longche khonkubü phaia kan la sungngaikulabü, senetlabü, hau kutilabü hoba yaütilabü. 11Hao la ponpen thon akiko hau kishi. Amen.
12Silvana, ngei ngebü tegü maanglembü jaisina che danko, ngei kan to longche le doa—kan thungeijangeiko hoba ho kho seneibü Bou ngühmai onou ki dogo aukabü kuko. Kho a kaangkhühtham loashi.
Thonbü Salem Shuong
13Babilona kibü, kan yoa liko pienbü saoei, kan la salem kuda, hoba kü shou Markeikei kho tegü kuda. b b v13 Chunga 'Babilon' ho Rom shanga mangsenbü nyen che yinglabü—Peterei dobü, choba leko kibü sangnyu kho ki, lausikei jih tuishobü sangnyu aying. 14Cheei che to sanou sembungei salem kushi. Khrista a kibü kan pendou la haülabü yingshi.
