መዝሙር 111

111 ¹ሃሌ ሉያ! አባታችንን በፍጹም ልቤ አመሰግናለሁ፤ በቅኖች ማኅበርና በጉባኤ መካከል። ²የአባታችን ሥራዎች ታላላቅ ናቸው፤ በእነርሱ ደስ የሚላቸው ሁሉ ይመረምሩአቸዋል። ³ሥራው በግርማና በክብር የተሞላ ነው፤ ጽድቁም ለዘላለም ጸንቶ ይኖራል። ⁴ተአምራቱ እንዲታሰቡ አድርጓል፤ አባታችን ባለ ጸጋ ነው፤ ልቡም በርኅራኄ የተሞላ ነው። ⁵ለሚፈሩት ምግብን ይሰጣል፤ ኪዳኑንም ለዘላለም ያስባል። ⁶የሥራውን ኀይል ለሕዝቡ አሳይቷል፤ የአሕዛብንም ርስት ሰጥቷቸዋል። ⁷የእጆቹ ሥራ የታመነና የቀና ነው፤ ትእዛዛቱም ሁሉ የሚታመኑ ናቸው። ⁸ለዘላለም ጸንተው ይኖራሉ፤ በታማኝነትና በቅንነት የተፈጸሙ ናቸው። ⁹ለሕዝቡ ቤዛን ላከ፤ ኪዳኑን ለዘላለም አዘዘ። ስሙ ቅዱስና የተፈራ ነው። ¹⁰አባታችንን መፍራት የጥበብ መጀመሪያ ነው፤ ይህን የሚያደርጉ ሁሉ መልካም ማስተዋልን ያገኛሉ። ምስጋናውም ለዘላለም ጸንቶ ይኖራል። ^a a v10 እዚህ ላይ “መፍራት” ማለት አክብሮት የተሞላበት አድናቆትና ጥልቅ ክብር ማለት ነው እንጂ ድንጋጤ ወይም መደንገጥ አይደለም።