زبور 111 FHB Father's Heart Bible™

111 ¹حمد و ثنا! زۀ به په خپل ټول زړۀ سره د خپل پلار ثنا وايم، د صادقانو په مجلس کښې او په ټولنه کښې. ²د زمونږ پلار کارونه لوئى دى، هغه ټول چې پرې خوشحاليږى په غور يې مطالعه کوى. ³د هغۀ کار ښائست او شان و شوکت لرى، او د هغۀ صداقت تل دپاره قائم دے. ⁴هغۀ خپل عجائبات داسې کړل چې يادولے شى. زمونږ پلار فضل والا دے، او زړۀ يې د رحم نه ډک دے. ⁵هغه هغه چا ته خوراک ورکوى چې ترې يرېږى. ⁶هغۀ خپل قوم ته د خپلو کارونو قوت وښودو، او د قومونو ميراث يې ورکړو. ⁷د هغۀ د لاسونو کارونه وفادار او عادل دى، د هغۀ ټول حُکمونه د اعتبار وړ دى. ⁸دا تل تر تله قائم ساتلى شوى دى، او په وفادارۍ او راستۍ سره عملى شوى دى. ⁹هغۀ خپل قوم ته خلاصون ولېږلو، او خپل لوظ يې تل دپاره مقرر کړو. د هغۀ نوم پاک او د ويرې وړ دے. ¹⁰د زمونږ پلار ويره د حکمت شروع ده، هغه ټول چې پرې عمل کوى ښۀ سوچه عقل مومى. د هغۀ ثنا تل دپاره قائمه ده. ^a a v10 دلته ويره د احترام او درناوى په معنىٰ ده، نۀ د وحشت او ډار.