ዘሌዋውያን 22

22 ¹አባታችንም ሙሴን እንዲህ አለው፤

²“አሮንንና ልጆቹን የእስራኤል ሕዝብ ለእኔ የሚቀድሱትን የተቀደሱ መሥዋዕቶች በጥንቃቄ እንዲይዙ ንገራቸው፤ ይኸውም የተቀደሰውን ስሜን እንዳያረክሱ ነው። እኔ አባታችሁ ነኝ።

³“እንዲህ ብለህ ንገራቸው፤ ከትውልድ እስከ ትውልድ ርኩስ ሆኖ ሳለ የእስራኤል ሕዝብ ለእኔ ወደሚቀድሱት የተቀደሱ መሥዋዕቶች የሚቀርብ ከዘርህ ማንም ቢሆን፣ ከፊቴ ይወገዳል። እኔ አባታችሁ ነኝ።

⁴“ከአሮን ዘር የቈዳ በሽታ ወይም ፈሳሽ ያለበት ማንም ሰው እስኪነጻ ድረስ ከተቀደሱት መሥዋዕቶች አይብላ። ከሬሳ የሆነውን ርኩስ ነገር የሚነካ ማንም ሰው፣ ወይም የዘር ፈሳሽ የወጣበት ሰው፣ ⁵ወይም የሚያረክሰውን ተንቀሳቃሽ ፍጥረት የሚነካ፣ ወይም ርኩሰቱ ምንም ቢሆን የሚያረክሰውን ሰው የሚነካ፣ ⁶እንዲህ ያለውን የሚነካ ሰው እስከ ማታ ድረስ ርኩስ ነው፤ ሰውነቱንም በውሃ ካልታጠበ በቀር ከተቀደሱት መሥዋዕቶች አይብላ። ⁷ፀሐይ ስትጠልቅ ይነጻል፤ ከዚያም ከተቀደሱት መሥዋዕቶች ሊበላ ይችላል፤ ምግቡ ነውና። ⁸የሞተውን ወይም በአውሬ የተገደለውን ምንም ነገር አይብላ፤ ያ ያረክሰዋልና። እኔ አባታችሁ ነኝ። ⁹ካህናት ትእዛዜን ይጠብቁ፤ አለዚያ ንቀዋት በደለኛ ሆነው ይሞታሉ። የምቀድሳቸው አባታችሁ እኔ ነኝ።

¹⁰“ባዕድ ሰው ከተቀደሰው መሥዋዕት አይብላ፤ የካህኑ እንግዳ ወይም ተቀጣሪ ሠራተኛ አይብላው። ¹¹ካህኑ ግን በገዛ ገንዘቡ ባሪያ ቢገዛ፣ ያ ባሪያ ሊበላው ይችላል፤ በካህኑ ቤት የተወለዱትም ከምግቡ ሊበሉ ይችላሉ። ¹²የካህን ልጅ ካህን ያልሆነን ሰው ብታገባ፣ ከተቀደሱት መባዎች አትብላ። ¹³የካህን ልጅ ግን ባሏ ሞቶባት ወይም ተፈትታ ልጅ ከሌላትና በወጣትነቷ ጊዜ እንደ ነበረች ወደ አባቷ ቤት ብትመለስ፣ ከአባቷ ምግብ ልትበላ ትችላለች። ባዕድ ሰው ግን አይብላው።

¹⁴“ማንም ስሕተት ሆኖበት የተቀደሰ መሥዋዕት ቢበላ፣ ከዋጋው አንድ አምስተኛ ጨምሮ ለካህኑ ይስጥ። ¹⁵ካህናት የእስራኤል ሕዝብ ለእኔ የሚያቀርቡአቸውን የተቀደሱ መሥዋዕቶች አያርክሱ፤ ¹⁶የተቀደሱትን መሥዋዕቶቻቸውን በመብላት ካሳ የሚያስከፍል በደል በላያቸው አያምጡ። የምቀድሳቸው አባታችሁ እኔ ነኝና።”

ለአብ የሚገቡ መሥዋዕቶች

¹⁷አባታችንም ሙሴን እንዲህ አለው፤

¹⁸“አሮንን፣ ልጆቹንና እስራኤላውያንን ሁሉ እንዲህ ብለህ ንገራቸው፤ ከእናንተ ማንም ቢሆን፣ የአገሩ ተወላጅም ይሁን በእስራኤል የሚኖር መጻተኛ፣ ስእለት ለመፈጸም ወይም በፈቃዱ የሚያቀርበው ስጦታ ሆኖ የሚቃጠል መሥዋዕት ለእኔ ሲያቀርብ፣ ¹⁹ተቀባይነት እንዲያገኝላችሁ ከከብት፣ ከበግ ወይም ከፍየል ነውር የሌለበትን ተባዕት አቅርቡ። ²⁰ነውር ያለበትን ምንም ነገር አታቅርቡ፤ ስለ እናንተ ተቀባይነት አያገኝምና። ²¹ማንም ልዩ ስእለት ለመፈጸም ወይም በፈቃዱ የሚያቀርበው መሥዋዕት ሆኖ ከመንጋው ወይም ከከብቱ የኅብረት መሥዋዕት ለእኔ ሲያቀርብ፣ ተቀባይነት እንዲያገኝ ነውር የሌለበት ፍጹም መሆን አለበት፤ ምንም እንከን አይኑርበት። ²²ዕውር፣ የተሰበረ፣ አካለ ጒዳተኛ፣ እባጭ ያለበት፣ ቅርፊት ያለው ወይም መግል የሚያዝረከርክ ምንም እንስሳ ለእኔ አታቅርቡ። ከእነዚህ አንዱን ስንኳ በመሠዊያው ላይ ለእኔ የምግብ መሥዋዕት አድርጋችሁ አታኑሩ። ²³አካሉ የተበላሸ ወይም ያልጎለመሰ በሬ ወይም በግ በፈቃዳችሁ እንደ መሥዋዕት ልታቀርቡ ትችላላችሁ፤ ለስእለት ግን ተቀባይነት አያገኝም። ²⁴ኰላላቱ የተቀጠቀጠ፣ የተፈጨ፣ የተቀደደ ወይም የተቈረጠ እንስሳ ለእኔ አታቅርቡ። በገዛ ምድራችሁ ይህን አታድርጉ። ²⁵እንዲህ ያሉ እንስሳትን እንደ አባታችሁ ምግብ አድርጋችሁ ለማቅረብ ከመጻተኛ አትቀበሉ፤ አካላቸው የተበላሸና ነውር ያለባቸው ናቸውና፤ ስለ እናንተ ተቀባይነት አያገኙም።” ^a a v25 መሥዋዕቶቹ በምሳሌያዊ አነጋገር የእግዚአብሔር “ምግብ” ተብለው ተጠርተዋል፤ አባታችን ምንም አያስፈልገውም፣ ነገር ግን ስጦታው የሚገልጸውን አምልኮ ይቀበላል።

²⁶አባታችንም ሙሴን እንዲህ አለው፤

²⁷“ጥጃ፣ የበግ ጠቦት ወይም ፍየል በተወለደ ጊዜ፣ ሰባት ቀን ከእናቱ ጋራ ይቈያል፤ ከስምንተኛው ቀን ጀምሮ ለእኔ እንደ ምግብ መሥዋዕት ተቀባይነት አለው። ²⁸ላም ወይም በግ ከግልገሉ ጋራ በአንድ ቀን አትረዱ።

²⁹“ለእኔ የምስጋና መሥዋዕት በምትሠዉበት ጊዜ፣ ተቀባይነት እንድታገኙ አድርጋችሁ ሠዉት። ³⁰በዚያው ቀን ይበላ፤ እስከ ጥዋት ድረስ ከእርሱ ምንም አታስቀሩ። እኔ አባታችሁ ነኝ።

³¹“ትእዛዜን ጠብቁ፤ ፈጽሙአቸውም። እኔ አባታችሁ ነኝ። ³²የተቀደሰውን ስሜን አታርክሱ፤ በእስራኤላውያን መካከል እንደ ቅዱስ ልከበር ይገባል። የምቀድሳችሁ አባታችሁ እኔ ነኝ፤ ³³አባታችሁም ለመሆን ከግብፅ ያወጣኋችሁ እኔ ነኝ። እኔ አባታችሁ ነኝ።”