ዘሌዋውያን 21

21 ¹አባታችን ሙሴን እንዲህ አለው፤ “ካህናትን፣ የአሮንን ልጆች እንዲህ ብለህ ንገራቸው፦ ከወገኖቹ መካከል በሞተ ሰው ማንም ራሱን አያርክስ፤ ²ነገር ግን ለቅርብ ዘመዶቹ፤ ለእናቱ፣ ለአባቱ፣ ለወንድ ልጁ፣ ለሴት ልጁ፣ ለወንድሙ፣ ³ወይም ለእርሱ ቅርብ ለሆነችው፣ ገና ላላገባች ድንግል እኅቱ ራሱን ሊያረክስ ይችላል። ⁴በወገኖቹ መካከል አለቃ ሆኖ ሳለ ራሱን አያርክስ፤ ራሱንም አያዋርድ።

⁵ራሳቸውን ተላጭተው አይመለጡ፤ የጢማቸውንም ዳር አይከርክሙ፤ ሰውነታቸውንም አይተልትሉ። ⁶ለአባታቸው ቅዱሳን ይሁኑ፤ ስሙንም አያርክሱ፤ የአባታችንን የእሳት መሥዋዕት፣ እንጀራውን ያቀርባሉና ቅዱሳን ይሁኑ።

⁷ጋለሞታ ሴትን ወይም የረከሰችውን ወይም ከባሏ የተፈታችውን አያግቡ፤ ካህኑ ለአባቱ ቅዱስ ነውና። ⁸ቅዱስ አድርጋችሁ ቍጠሩት፤ የአባታችሁን እንጀራ ያቀርባልና። የምቀድሳችሁ፣ የምለያችሁ አባታችሁ እኔ ቅዱስ ስለ ሆንሁ ለእናንተ ቅዱስ ይሁን። ⁹ራስዋን በጋለሞትነት የምታረክስ የካህን ሴት ልጅ አባቷን ታረክሳለች፤ በእሳት ትቃጠል።

¹⁰ከወንድሞቹ የሚበልጠው፣ የቅብዐ ዘይት በራሱ ላይ የፈሰሰለት፣ ልብሱን ለመልበስም የተሾመው ሊቀ ካህናት ጠጕሩን አይበጥር፤ ልብሱንም አይቅደድ። ¹¹ወደ ማንኛውም በድን አይቅረብ፤ ስለ አባቱ ወይም ስለ እናቱ ስንኳ ራሱን አያርክስ። ¹²ከመቅደሱ አይውጣ፤ የአባቱንም መቅደስ አያርክስ፤ የመቀባቱ ዘይት ለይቶታልና። አባትህ እኔ ነኝ።

¹³እርሱ ድንግልን ብቻ ያግባ። ¹⁴መበለትን ወይም የተፈታችውን ወይም በጋለሞትነት የረከሰችውን ሴት አያግባ፤ ከወገኑ ድንግልን ብቻ ያግባ እንጂ። ¹⁵ይህም በወገኑ መካከል ዘሩን እንዳያረክስ ነው፤ የምቀድሰው አባታችሁ እኔ ነኝ፤ የሚለየውም አባቱ እኔ ነኝ።”

¹⁶አባታችንም ሙሴን እንዲህ አለው፤

¹⁷“አሮንን እንዲህ ብለህ ንገረው፦ ከዘርህ በትውልዳቸው ሁሉ ነውር ያለበት ማንም ሰው የአባቱን መብል ለማቅረብ አይቅረብ። ¹⁸ነውር ያለበት ማንም ሰው አይቅረብ፤ ዕውር፣ አንካሳ፣ ፊቱ የተበላሸ ወይም አካሉ የተበላሸ፣ ¹⁹ወይም እግሩ የተሰበረ ወይም እጁ የተሰበረ ሰው፣ ²⁰ወይም ጐባጣ፣ ድንክ፣ ዓይኑ የታመመ፣ የሚመግል ቍስል ያለበት፣ እከክ ያለበት ወይም ኀፍረተ ገላው የተቀጠቀጠ። ²¹ነውር ያለበት ከካህኑ ከአሮን ዘር ማንም የአባታችንን የእሳት መሥዋዕት ለማቅረብ አይቅረብ፤ ነውር ስላለበት የአባቱን እንጀራ ለማቅረብ አይቅረብ። ²²ነገር ግን የአባቱን እንጀራ፣ እጅግ ቅዱስ የሆነውንም ቅዱሱንም ይብላ። ²³ነገር ግን ነውር ስላለበት ወደ መጋረጃው አይቅረብ፤ ወደ መሠዊያውም አይደርስ፤ ይህም መቅደሴን እንዳያረክስ ነው፤ የምቀድሳቸው አባታችሁ እኔ ነኝ፤ የሚለያቸውም አባታቸው እኔ ነኝ።” ^a a v23 መጋረጃው በድንኳኑ ውስጥ ቅዱሱን ስፍራ ከቅድስተ ቅዱሳኑ የሚለየው የውስጠኛው መጋረጃ ነው።

²⁴ሙሴም ይህን ለአሮንና ለልጆቹ፣ ለእስራኤልም ሕዝብ ሁሉ ተናገረ።