ዘሌዋውያን 20

20 ¹አባታችንም ሙሴን እንዲህ አለው፤

²“ለእስራኤላውያን እንዲህ ብለህ ንገራቸው፤ ከእስራኤላውያን ወይም በእስራኤል ከሚኖረው መጻተኛ መካከል ማንም ከልጆቹ አንዱን ለሞሎክ ቢሰጥ ፈጽሞ ይገደል፤ የአገሩ ሕዝብ በድንጋይ ይወግሩት። ^a a v2 ሞሎክ አምልኮቱ ልጆችን በእሳት መሥዋዕት ማድረግን የሚያካትት የከነዓን አምላክ ነበር። ³እኔ ራሴ ፊቴን በዚያ ሰው ላይ አኖራለሁ፤ ከልጆቹ አንዱን ለሞሎክ ስለ ሰጠ፣ መቅደሴን ስላረከሰና ቅዱስ ስሜን ስላሳደፈ ከሕዝቡ መካከል አጠፋዋለሁ። ⁴የአገሩ ሕዝብ ያ ሰው ከልጆቹ አንዱን ለሞሎክ በሚሰጥበት ጊዜ ዐይናቸውን ሸፍነው ባይገድሉት፣ ⁵ፊቴን በዚያ ሰውና በቤተ ሰቡ ላይ አኖራለሁ፤ እርሱንና ለሞሎክ በማመንዘር የሚከተሉትን ሁሉ ከሕዝባቸው መካከል አጠፋለሁ።

⁶“መናፍስት ጠሪዎችን ወይም መተተኞችን የሚከተል፣ እነርሱን ተከትሎ የሚያመነዝር ማንም ቢኖር፣ ፊቴን በዚያ ሰው ላይ አኖራለሁ፤ ከሕዝቡ መካከል አጠፋዋለሁ።

⁷“ስለዚህ ራሳችሁን ለዩ፤ ቅዱሳንም ሁኑ፤ እኔ አባታችሁ ነኝና። ⁸ሥርዐቴን ጠብቃችሁ አድርጓቸው። የምቀድሳችሁ አባታችሁ እኔ ነኝ።

⁹“አባቱን ወይም እናቱን የሚረግም ማንም ቢኖር ይገደል፤ አባቱን ወይም እናቱን ረግሞአልና ደሙ በራሱ ላይ ነው።

¹⁰“ማንም ሰው ከሌላ ሰው ሚስት ጋር፣ ከባልንጀራው ሚስት ጋር ቢያመነዝር፣ አመንዝራው ወንድና አመንዝራዪቱ ሴት ሁለቱም ፈጽሞ ይገደሉ።

¹¹“ከአባቱ ሚስት ጋር የሚተኛ ሰው የአባቱን ኀፍረተ ሥጋ ገልጦአል፤ ሁለቱም ይገደሉ፤ ደማቸው በእነርሱ ላይ ነው።

¹²“ማንም ሰው ከምራቱ ጋር ቢተኛ ሁለቱም ይገደሉ፤ ጸያፍ ነገር አድርገዋል፤ ደማቸው በእነርሱ ላይ ነው።

¹³“ማንም ሰው ከሴት ጋር እንደሚተኛ ከወንድ ጋር ቢተኛ፣ ሁለቱም አስጸያፊ ነገር አድርገዋል፤ ፈጽሞ ይገደሉ፤ ደማቸው በእነርሱ ላይ ነው።

¹⁴“ማንም ሰው አንዲት ሴትና እናቷን ቢያገባ ክፋት ነው፤ በመካከላችሁ ክፋት እንዳይቀር እርሱንና እነርሱን በእሳት አቃጥሉ።

¹⁵“ማንም ሰው ከእንስሳ ጋር ቢገናኝ ይገደል፤ እንስሳውንም ግደሉ።

¹⁶“ማንኛዋም ሴት ከእንስሳ ጋር ለመጋባት ወደ እርሱ ብትቀርብ፣ ሴቲቱንና እንስሳውን ግደሉ፤ ሁለቱም ይገደሉ፤ ደማቸው በእነርሱ ላይ ነው።

¹⁷“ማንም ሰው እኅቱን፣ የአባቱን ወይም የእናቱን ልጅ አግብቶ ቢገናኙ፣ ነውር ነው፤ በሕዝባቸው ፊት ይጥፉ። እኅቱን ገልጦአል፤ በደሉን ይሸከማል።

¹⁸“ማንም ሰው በወር አበባዋ ጊዜ ከሴት ጋር ቢተኛ፣ ፈሳሿን ገልጦአል፤ እርሷም ምንጩን ገልጣለች፤ ሁለቱም ከሕዝባቸው ይጠፉ።

¹⁹“ከእናትህ እኅት ወይም ከአባትህ እኅት ጋር አትገናኝ፤ ይህ የቅርብ ዘመድን ማዋረድ ነውና፤ በደላቸውን ይሸከማሉ። ²⁰ከአጎቱ ሚስት ጋር የሚተኛ ሰው አጎቱን አዋርዶአል፤ ኀጢአታቸውን ይሸከማሉ፤ ልጅ ሳይወልዱ ይሞታሉ።

²¹“ማንም ሰው የወንድሙን ሚስት ቢያገባ፣ ርኩሰት ነው፤ የወንድሙን ኀፍረተ ሥጋ ገልጦአል፤ ልጅ አይወልዱም።

²²“ሥርዐቴን ሁሉና ፍርዴን ሁሉ ጠብቃችሁ አድርጓቸው፤ ትኖሩበት ዘንድ የማስገባችሁ ምድር እንዳታስመልሳችሁ። ²³ከፊታችሁ የማባርራቸውን ሕዝብ ልማድ አትከተሉ፤ እነርሱ ይህን ሁሉ አድርገዋልና፣ እኔም ተጸየፍኋቸው። ²⁴ነገርኋችሁ፤ ምድራቸውን ትወርሳላችሁ፤ ወተትና ማር የምታፈስ ምድር ትወርሷት ዘንድ እኔ ራሴ እሰጣችኋለሁ። ከአሕዛብ የለየኋችሁ አባታችሁ እኔ ነኝ።

²⁵“ስለዚህ ንጹሕ እንስሳትን ከረከሰ፣ ርኩስ ወፎችንም ከንጹሑ ለዩ። ርኩስ እንደሆነ ለእናንተ በለየሁት በማንኛውም እንስሳ፣ ወፍ ወይም በምድር ላይ በሚሳብ ነገር ራሳችሁን አታስጸይፉ። ²⁶እኔ አባታችሁ ቅዱስ ነኝና ለእኔ ቅዱሳን ሁኑ፤ የእኔ ትሆኑ ዘንድ ከአሕዛብ ለይቻችኋለሁ።

²⁷“መናፍስት ጠሪ ወይም መተተኛ የሆነ ወንድ ወይም ሴት ይገደል፤ በድንጋይ ይወገር፤ ደማቸው በእነርሱ ላይ ነው።”