Levitiko 20 FHB Father's Heart Bible™

20 ¹Baba wathu alonga na Mozese:

²“Panga Aizarayeli kuti: Mwizarayeli onsene, peno mulendo anakhala mu Izarayeli, ule anapereka m'bodzi wa anace kuna Moleki, asafunika kuphiwa kakamwe—anthu a dziko ineyi anamuponya miyala. ^a a v2 Moleki akhali mulungu wa Akanani, wakuti kunlambira kukhaphataniza kupereka ana ninga ntsembe pa moto. ³Ine ndinaikha nkhope yanga kutsutsa munthu unoyu, mbandinsudzula pakati pa mbumba yace, thangwi yakupereka m'bodzi wa anace kuna Moleki, mbapswipisa mbuto yanga yakucena na kunyazitsa dzina yanga yakucena. ⁴Anthu a dziko angacita ninga akuti nkhabe kuona munthu unoyu mukupereka m'bodzi wa anace kuna Moleki, mbakhonda kumupha, ⁵Ine ndinaikha nkhope yanga kutsutsa munthu unoyu na banja yace, mbandinsudzula—pabodzi na onsene anamutowera mu upombo wakuenda kuna Moleki—pakati pa mbumba yawo.

⁶“Munthu onsene anaenda kuna anyakulotera peno anyakuwombeza mizimu, mbacita upombo mukuatowera, Ine ndinaikha nkhope yanga kutsutsa munthu unoyu, mbandinsudzula pakati pa mbumba yace.

⁷“Na tenepo, cenesani miyoyo yanu, mbakhalani akucena, thangwi Ine ndine Baba wanu. ⁸“Koyani mitemo yanga mbamuicita. Ine ndine Baba wanu, ule anakucenesani.

⁹“Munthu onsene anaxinga baba wace peno mai wace asafunika kuphiwa; iye axinga baba wace peno mai wace—ciropa cace ciri pa iye ene.

¹⁰“Mamuna angacita upombo na nkazi wa mamuna unango—nkazi wa ndzace—onsene awiri, mamuna na nkazi anacita upombo, asafunika kuphiwa kakamwe.

¹¹“Mamuna anagona na nkazi wa baba wace afukula manyadzo a baba wace; onsene awiri asafunika kuphiwa; ciropa cawo ciri pa iwo.

¹²“Mamuna angagona na nkazi wa mwana wace, onsene awiri asafunika kuphiwa; acita cinthu cakunyansa; ciropa cawo ciri pa iwo.

¹³“Mamuna angagona na mamuna ndzace ninga munagonera munthu na nkazi, onsene awiri acita cinthu cakunyansa; asafunika kuphiwa kakamwe; ciropa cawo ciri pa iwo.

¹⁴“Mamuna angakwatira nkazi pabodzi na mai wace, pyenepi ndi pyakuipa; mupiseni iye na iwo na moto, toera kuipa kukhonde kutsalira pakati panu.

¹⁵“Mamuna angagona na cinyama, asafunika kuphiwa, pontho imwe munafunika kupha cinyama ceneci.

¹⁶“Nkazi angaenda kuna cinyama toera kugona naco, phani nkazi na cinyama; onsene awiri asafunika kuphiwa; ciropa cawo ciri pa iwo.

¹⁷“Mamuna angakwatira mulongo wace, mwana wankazi wa baba wace peno wa mai wace, mbagonana, pyenepi ndi manyadzo; asafunika kusudzulwa pamaso pa mbumba yawo. Iye afukula mulongo wace; iye anathukula mulando wace.

¹⁸“Mamuna angagona na nkazi mu n'dzidzi wace wakutombola, iye afukula kutombola kwace, nkazi afukulambo ciropa cace; onsene awiri asudzulwa pa mbumba yawo.

¹⁹“Lekani kugona na mulongo wa mai wanu peno mulongo wa baba wanu—pyenepi ndi kupwaza wacibale wa pafupi; iwo anadzathukula mulando wawo. ²⁰Mamuna anagona na nkazi wa babakulu wace apwaza babakulu wace; iwo anadzathukula madawo awo, mbafa mwakukhonda kubala ana.

²¹“Mamuna angakwatira nkazi wa m'bale wace, pyenepi ndi pyakupswipa; iye afukula manyadzo a m'bale wace; iwo anadzakhala mwakukhonda kubala ana.

²²“Koyani mitemo yanga yonsene na matongero anga onsene, mbamuicita, toera dziko inakuendesani Ine toera mukakhale, ikhonde kukusanzani. ²³Lekani kutowezera miyambo ya mbumba inathamangisa Ine patsogolo panu, thangwi iwo acita pinthu pyenepi pyonsene, na tenepo Ine ndaaida. ²⁴Ine ndakupangani kale: imwe munadzatambira dziko yawo ninga unthaka; Ine ene ndinakupasani iyo toera ikhale yanu, dziko yakudzala na mkaka na uci. Ine ndine Baba wanu, ule adakusankhulani pakati pa mbumba zinango.

²⁵“Na tenepo, siyanisani pinyama pyakucena na pyakupswipa, na mbalame zakupswipa na zakucena. Lekani kudzipswipisa thangwi ya cinyama consene, mbalame, peno cinthu cinakwaza pantsi, cidasankhula Ine toera kukhala cakupswipa kwa imwe. ²⁶Khalani akucena kwa Ine, thangwi Ine, Baba wanu, ndine wakucena, pontho ndakusankhulani pakati pa mbumba zinango toera mukhale anga.

²⁷“Mamuna peno nkazi ule ndi nyakulotera peno nyakuwombeza mizimu asafunika kuphiwa—kuponywa miyala; ciropa cawo ciri pa iwo.”