ዘሌዋውያን 20 FHB Father's Heart Bible™

20 ¹ኣቦና ድማ ንሙሴ ከምዙይ ኢሉ ተዛረቦ፦

²“ንደቂ እስራኤል ከምዙይ በሎም፦ ካብ ደቂ እስራኤል ዝኾነ ሰብ፥ ወይ ኣብ እስራኤል ዝነብር ጓና፥ ካብ ደቁ ንሞሎኽ ዝህብ፥ ፈፂሙ ይቀተል፤ እቶም ህዝቢ እታ ምድሪ ብእምኒ ቐጥቂጦም ይቕተልዎ። ^a a v2 ሞሎኽ ናይ ከነዓናውያን ጣዖት ኮይኑ፥ ኣምልኾቱ ንውሉድ ብሓዊ ምስዋእ የጠቓልል ነበረ። ³ኣነ ድማ ባዕለይ ኣብቲ ሰብ እቱይ ገፀይ ከቕንዕ፥ ካብ ማእኸል ህዝቡ ኸዓ ክፈልዮ እየ፤ ካብ ደቁ ንሞሎኽ ሂቡ መቕደሰይ ስለ ዘርከሰ፥ ቅዱስ ስመይውን ስለ ዘርከሰ። ⁴እቲ ሰብ እቱይ ካብ ዘርኡ ንሞሎኽ ኣብ ዝህበሉ እዋን፥ እቶም ህዝቢ እታ ምድሪ ዓይኖም ዓሚቶም ሸለል እንተ በልዎ እሞ እንተ ዘይቀተልዎ፥ ⁵ኣነ ድማ ኣብቲ ሰብ እቱይን ኣብ ስድራኡን ገፀይ ከቕንዕ፥ ንእኡን ነቶም ንሞሎኽ እናዘመዉ ዝስዕብዎ ዅሎምን ካብ ማእኸል ህዝቦም ክፈልዮም እየ።

⁶“ዝኾነ ሰብ ናብ ፀዋዕቲ መናፍስትን ጠንቈልትን ዝዘውር፥ ደድሕሪኦም እናዘመወ፥ ኣብቲ ሰብ እቱይ ገፀይ ከቕንዕ፥ ካብ ማእኸል ህዝቡ ድማ ክፈልዮ እየ።

⁷“እምበኣር ንርእስኹም ፈለዩ፤ ቅዱሳን ድማ ኩኑ፤ ኣነ ኣቦኻትኩም እየ እሞ። ⁸ሕግጋተይ ሓልዉ፥ ግበርዎውን። ኣነ እቲ ዝቕድሰኩም ኣቦኻትኩም እየ።

⁹“ነቦኡ ወይ ንኖኡ ዝፀረፈ ዅሉ ፈፂሙ ይቀተል፤ ነቦኡ ወይ ንኖኡ ፀሪፉ እዩ፤ ደሙ ኣብ ርእሱ ይኹን።

¹⁰“ሓደ ሰብ ምስ ሰበይቲ ካልእ ሰብኣይ፥ ምስ ሰበይቲ ብፃዩ፥ እንተ ዘመወ፥ እቲ ዘማዊ ሰብኣይን እታ ዘማዊት ሰበይትን ክልቲኦም ፈፂሞም ይቀተሉ።

¹¹“ሰብኣይ ምስ ሰበይቲ ኣቦኡ እንተ ደቀሰ፥ ሕፍረት ኣቦኡ ቐሊዑ እዩ፤ ክልቲኦም ድማ ይቀተሉ፤ ደሞም ኣብ ርእሶም ይኹን።

¹²“ሓደ ሰብ ምስ ሰበይቲ ወዱ እንተ ደቀሰ፥ ክልቲኦም ይቀተሉ፤ ነውሪ ገይሮም እዮም፤ ደሞም ኣብ ርእሶም ይኹን።

¹³“ሓደ ሰብ ከምቲ ምስ ሰበይቲ ዝድቅስ ምስ ሰብኣይ እንተ ደቀሰ፥ ክልቲኦም ርኽሰት ገይሮም እዮም፤ ፈፂሞም ይቀተሉ፤ ደሞም ኣብ ርእሶም ይኹን።

¹⁴“ሓደ ሰብ ሰበይትን ነኖኣን እንተ ኣእተወ፥ እዙይ እከይ እዩ፤ ኣብ ማእኸልኩም እከይ ከይተርፍ፥ ንእኡን ንኣታተንን ብሓዊ ኣቃፀልዎም።

¹⁵“ሓደ ሰብ ምስ እንስሳ እንተ ተራኸበ፥ ይቀተል፤ ነቲ እንስሳ ድማ ቅተልዎ።

¹⁶“ሰበይቲ ናብ ዝኾነ እንስሳ ክትራኸቦ ኢላ እንተ ቐረበት፥ ነታ ሰበይትን ነቲ እንስሳን ቅተልዎም፤ ክልቲኦም ይቀተሉ፤ ደሞም ኣብ ርእሶም ይኹን።

¹⁷“ሓደ ሰብ ንሓፍቱ፥ ጓል ኣቦኡ ወይ ጓል እኖኡ፥ እንተ ኣእተወ እሞ ብግብረ ስጋ እንተ ተራኸቡ፥ እዙይ ውርደት እዩ፤ ኣብ ቅድሚ ህዝቦም ድማ ተፈሊዮም ይጥፍኡ። ሕፍረት ሓፍቱ ቐሊዑ እዩ እሞ፥ በደሉ ይፆር።

¹⁸“ሓደ ሰብ ምስ ሰበይቲ ብእዋን ፅገኣ እንተ ደቀሰ፥ ንምፍሳስ ደማ ቐሊዑ፥ ንሳ ኸዓ ፈልፋሊ ደማ ቐሊዓ እያ፤ ክልቲኦም ካብ ማእኸል ህዝቦም ተፈሊዮም ይጥፍኡ።

¹⁹“ምስ ሓፍቲ እኖኻ ወይ ምስ ሓፍቲ ኣቦኻ ብግብረ ስጋ ኣይትራኸብ፤ እዙይ ንቐረባ ዘመድ የዋርድ እዩ፤ በደሎም ክፆሩ እዮም። ²⁰ምስ ሰበይቲ ሓወቦኡ ዝደቀሰ ሰብ ንሓወቦኡ የዋርዶ፤ ሓጢኣቶም ክፆሩ፥ ውሉድ ዘይብሎም ድማ ክሞቱ እዮም።

²¹“ሓደ ሰብ ሰበይቲ ሓዉ እንተ ኣእተወ፥ ርኽሰት እዩ፤ ሕፍረት ሓዉ ቐሊዑ እዩ፤ ውሉድ ዘይብሎም ክኾኑ እዮም።

²²“ኵሉ ሕግጋተይን ኵሉ ትእዛዛተይን ሓልዉ፥ ግበርዎውን፤ እታ ኽትነብሩላ ዘእትወኩም ዘለኹ ምድሪ ምእንቲ ኸይትተፍአኩም። ²³ነቲ ኣነ ኻብ ቅድሜኹም ዘሳጕጎ ዘለኹ ህዝቢ ስርዓቱ ኣይትኽተሉ፤ ንሳቶም እዝ ዅሉ ገይሮም እዮም እሞ፥ ኣነ ድማ ፀላእክዎም። ²⁴ኣነ ድማ፥ ንስኻትኩም ንምድሮም ክትወርሱ ኢኹም፤ ኣነ ባዕለይ ክትወርስዋ ክህበኩም እየ፥ ፀባን መዓርን እተውሕዝ ምድሪ ኸዓ፥ ኢለ ነጊረኩም ኣለኹ። ኣነ ካብ ህዝብታት ዝፈለኹኹም ኣቦኻትኩም እየ።

²⁵“እምበኣር ኣብ መንጎ ንፁህን ዘይንፁህን እንስሳ፥ ኣብ መንጎ ርኹስን ንፁህን ኣዕዋፍ ፈልዩ። ነቲ ኣነ ኸም ርኹስ ዝፈለኽኹሞ ዝኾነ እንስሳ ወይ ዒፍ ወይ ኣብ ምድሪ ዝልመም ነገር ንርእስኹም ርኹሳት ኣይትግበሩ። ²⁶ኣነ ኣቦኻትኩም ቅዱስ እየ እሞ፥ ንኣይ ቅዱሳን ኩኑ፤ ናተይ ክትኮኑ ድማ ካብ ህዝብታት ፈለኹኹም።

²⁷“ፀዋዒ መናፍስቲ ወይ ጠንቋሊ ዝኾነ ሰብኣይ ወይ ሰበይቲ ፈፂሙ ይቀተል፤ ብእምኒ ይቀጥቀጡ፤ ደሞም ኣብ ርእሶም ይኹን።”