U-Izaya 34

34 ¹Sondelani, nina zizwe, nilalele; qaphelani, nina bantu! Umhlaba mawuzwe, nakho konke okuwugcwalisayo, izwe, nakho konke elikuvezayo. ²Ngokuba uBaba wethu ugcwele intukuthelo ngazo zonke izizwe, nolaka lwakhe lumelene nawo onke amabutho azo. Uzinikele ekubhujisweni, wazinikela ekuhlatshweni. ³Ababuleweyo bazo bayakulahlwa ngaphandle, iphunga lezidumbu zazo liyakwenyuka, nezintaba ziyakugeleza ngegazi lazo. ⁴Zonke izinkanyezi zezulu ziyakubola, namazulu ayakugoqwa njengomqulu. Lonke lelo butho lezinkanyezi liyakubuna, njengecembe libuna liwa emvinini, njengomkhiwane obunileyo owa esihlahleni somkhiwane.

⁵Lapho inkemba yami isiphuze yanela emazulwini, bheka—iyehla ukwahlulela phezu kuka-Edomi, phezu kwabantu engibanikele ekubhujisweni. ⁶UBaba wethu unenkemba; isisuthi igazi, igcwele amanoni, igazi lamawundlu nelezimbuzi, namanoni ezinso zezinqama. Ngokuba uBaba wethu unomhlatshelo eBozra, ukuhlatshwa okukhulu ezweni lika-Edomi. ⁷Izinkunzi zasendle ziyakuwa kanye nazo, namathole ezinkunzi kanye nezinkunzi ezinamandla. Izwe lazo liyakuphuza igazi lanele, nomhlabathi wazo uyakugcwaliswa amanoni. ⁸Ngokuba uBaba wethu unosuku lokwahlulela, umnyaka wokuphindisela ngenxa yecala laseZiyoni. ⁹Imifula yase-Edomi iyakuphenduka ibe yithiyela, nomhlabathi wayo ube yisibabule, nezwe layo liyakuba yithiyela elivuthayo. ¹⁰Ubusuku nemini ngeke kucinywe; intuthu yalo iyakwenyuka kuze kube phakade. Kusukela esizukulwaneni kuya esizukulwaneni liyakuba yincithakalo; akekho oyakudabula kulo kuze kube phakade. ¹¹Isikhova sasehlane nesikhova esimemezayo ziyakulidla ifa lalo; isikhova esikhulu negwababa ziyakuhlala kulo. UBaba wethu uyakwelula intambo yokulinganisa yesiyaluyalu phezu kwalo, nentambo yokuqondisa yobuze. ¹²Izikhulu zalo aziyikuba nalutho lapho ezingalubiza ngokuthi umbuso, nawo onke amakhosana alo ayakuphelela ezeni. ¹³Ameva ayakumila ezinqabeni zalo, imbabazane namakhakhasi ezinqabeni zalo ezivikelekile. Liyakuba yindawo yezimpungushe, ikhaya lezintshe. ¹⁴Amakati asendle ayakuhlangana nezimpisi, nezimbuzi zasendle ziyakubizana; lapho futhi isidalwa sasebusuku siyakuzinza sizitholele indawo yokuphumula. ¹⁵Lapho isikhova siyakwakha isidleke sizalele amaqanda aso, siwachamusele, sibuthe amaphuphu aso ngaphansi kwethunzi laso; lapho futhi oklebe bayakubuthana, ngamunye neqabane lawo.

¹⁶Funani emqulwini kaBaba wethu nifunde: akukho noyedwa kulezi oyakusweleka, akekho noyedwa oyakuswela iqabane lakhe. Ngokuba umlomo wakhe uyalile, noMoya wakhe uzibuthile. ¹⁷Uzenzele inkatho; isandla sakhe sizabele isabelo sazo ngentambo. Ziyakulidla ifa kuze kube phakade, zihlale khona isizukulwane ngesizukulwane.