Sekariah 13

13 ¹Ní ọjọ́ náà, orísun omi kan yóò ṣí sílẹ̀ fún ilé Dafidi àti fún àwọn ènìyàn Jerusalẹmu, láti wẹ̀ wọ́n mọ́ kúrò nínú ẹ̀ṣẹ̀ àti àìmọ́.

²Ní ọjọ́ náà, ni Baba àwọn ọmọ-ogun ọ̀run wí, èmi yóò ké orúkọ àwọn òrìṣà kúrò ní ilẹ̀ náà, a kì yóò sì rántí wọn mọ́; èmi yóò sì mú àwọn wòlíì àti ẹ̀mí àìmọ́ kúrò ní ilẹ̀ náà.

³Bí ẹnikẹ́ni bá tún sọ àsọtẹ́lẹ̀, baba àti ìyá rẹ̀ tí wọ́n bí i yóò sọ fún un pé, “Ìwọ gbọ́dọ̀ kú, nítorí ìwọ ti sọ irọ́ ní orúkọ Baba wa.” Nígbà tí ó bá sì sọ àsọtẹ́lẹ̀, baba àti ìyá rẹ̀ tí wọ́n bí i yóò gún un.

⁴Ní ọjọ́ náà, ojú yóò ti gbogbo wòlíì nítorí ìran rẹ̀ nígbà tí ó bá sọ àsọtẹ́lẹ̀; wọn kì yóò sì wọ aṣọ onírun láti fi tannijẹ.

⁵Ṣùgbọ́n yóò wí pé, “Èmi kì í ṣe wòlíì; àgbẹ̀ ni èmi, nítorí ilẹ̀ ti jẹ́ ìní mi láti ìgbà èwe mi wá.” ⁶Bí ẹnìkan bá sì béèrè lọ́wọ́ rẹ̀ pé, “Kí ni àwọn ọgbẹ́ wọ̀nyí tí ó wà láàrin ọwọ́ rẹ?” yóò dáhùn pé, “Ní ilé àwọn ọ̀rẹ́ mi ni a ti ṣe mí ní ọgbẹ́.” ^a a v6 Gbólóhùn náà “láàrin ọwọ́ rẹ” jẹ́ àkànlò èdè ìgbàanì tí ń tọ́ka sí àwọn ọgbẹ́ tí a lè rí ní iwájú ara.

A Lu Olùṣọ́-àgùntàn Náà, Àwọn Àgùntàn Sì Tú Ká

⁷Jí, ìdà, sí olùṣọ́-àgùntàn mi, sí ọkùnrin náà tí ó dúró ní ẹ̀gbẹ́ mi, ni Baba àwọn ọmọ-ogun ọ̀run wí. Lu olùṣọ́-àgùntàn náà, àwọn àgùntàn yóò sì tú ká; èmi yóò sì yí ọwọ́ mi padà sí àwọn kékeré. ^b b v7 Jesu fi ẹsẹ yìí sí ara rẹ̀ ní òru tí a mú un pé, “Èmi yóò lu olùṣọ́-àgùntàn náà, àwọn àgùntàn agbo náà yóò sì tú ká” (Matteu 26:31; Marku 14:27). ⁸Àti ní gbogbo ilẹ̀ náà, ni Baba wa wí, ìpín méjì nínú mẹ́ta ni a ó ké kúrò tí wọn yóò sì ṣègbé, ṣùgbọ́n ìpín kan nínú mẹ́ta ni a ó fi sílẹ̀ láàyè níbẹ̀. ⁹Ìpín kẹta tí ó kù náà ni èmi yóò mú wá sínú iná; èmi yóò tún wọn ṣe bí fàdákà, èmi yóò dán wọn wò bí wúrà. Wọn yóò ké pe orúkọ mi; èmi yóò dá wọn lóhùn. Nígbà náà ni èmi yóò wí pé, “Àwọn ni ọmọ mi,” wọn yóò sì wí pé, “Baba wa.”