Yon Sous Dlo Louvri pou Netwaye

Yon sous louvri pou lave peche, yo debarase zidòl ak fo pwofèt, epi yo frape bèje a pou mouton yo gaye. Yon tyè pase nan dife a epi yo rafine, jiskaske li di se pitit mwen yo ye e yo di, Papa nou.

Chapit 13.

Jou sa a yon sous dlo va louvri pou kay David la ak pou moun lavil Jerizalèm yo, pou netwaye yo anba peche ak anba tout sa ki sal.

Jou sa a, se Papa lame syèl la ki pale, m'ap koupe retire non zidòl yo nan peyi a, pesonn p'ap sonje yo ankò; epi m'ap wete pwofèt yo ak lespri ki sal la nan peyi a.

Si yon moun kontinye ap bay mesaj tankou pwofèt, papa l ak manman l ki fè l va di l: “Se pou ou mouri, paske ou pale manti nan non Papa nou.” Epi lè l ap bay mesaj, papa l ak manman l ki fè l va pèse l ak kouto.

Jou sa a chak pwofèt va wont pou vizyon li lè l ap bay mesaj; ni yo p'ap mete yon rad fèt ak pwal pou twonpe moun.

Men l'a di: “Mwen pa yon pwofèt; se yon kiltivatè mwen ye, paske depi lè m te jenn tè a se byen mwen li te ye.” Si yon moun mande l: “Ki sa mak blese sa yo ki ant men ou ye?” l'a di: “Se lakay zanmi m yo yo te blese m.” ^a

Yo Frape Gadò a, Mouton yo Gaye

Leve, nepe, kont gadò mwen an, kont nonm ki kanpe toupre m lan, se Papa lame syèl la ki pale. Frape gadò a, mouton yo va gaye; epi m'ap vire men m kont tipitit yo. ^b Nan tout peyi a, se Papa nou ki pale, de tyè moun yo va koupe wete epi peri, men yon tyè va rete vivan ladan l. Dènye tyè sa a m'ap mete l nan dife a; m'ap netwaye yo tankou ajan, m'ap sonde yo tankou lò. Y'a rele non mwen; m'a reponn yo. Lè sa a m'a di: “Se pitit mwen yo ye,” epi y'a di: “Papa nou.”