Hiak swak thang rwe
Chongdip

To Bathiangnu Lang Lat Thangnu Tui Phum

Noh to bathiang thang lang tui phum khat lat thanglune, milai nameng le leng thiamting nun ding talei ram bina lou swak thanglune, khatle zaosiannupa ding thou damlune, atiga zao nun chai imphaang lune. Thiraang khat ding mei sung bi lat swakluga barop bathiang thanglune, Maanna, bani ga Asa rwan gaye, diga rin dam basaan, khatle banina, ani Pa, diga rinlune.

Ani Pa na chongkhak hei bing bi kabia nge 1–9

Bung 13.

Haba ni bi David inkhun le Jerusalem mi nun ding noh le bathiang maknu bina to bathiang thang lang, tui phum khat lat thanglune.

Haba ni bi, diga kraanmi rwan om Pa na rinne, Eina milai bing om nameng ding talei ram bina kapak chat thanglune, atiga bani ga leng baningsu laye; atiga thiamting rwan le bathiang maknu katha le ding talei ram bina Eina lou swak thanglune.

Tudannuna leng ri chong rin swak ting nge dabe, bating pon thangnu bapa le banu na bakhou rinlune, “Nang thi ding nge, balangbe nangna ani Pa meng bi kakoinu chong rin damme.” Atiga maanna ri chong rin swaknu kaan bi, bating pon thangnu bapa le banu na bating sun thanglune.

Haba ni bi thiamting mi khangna ri chong rin swaknu kaan bi baom pi mu thangnu ding kazaklune; atiga minamnu lang sam amnu pwan le sinlaye.

Atiyeda maanna rinlune, “Ei thiamting make; Ei loumi gaye, balangbe talei ga ei naosen badona aom ka am rwe.” Mi khatna bakhou, “Nakut taram bi am hei bazam bing ga pa-aambo?” diga ngaiye dabe, maanna rinlune, “Abaan rwan om in bi ei bazam ngaake.” a a v6 “Nakut taram bi” dinu chong ga, pum om kamanu bi indaonu bazam bing lang ongnu meithaan om chong bazei gaye.

Zaosiannupa Ding Bweinu, Zao Nun Chai Imphaang Thangnu

Kachaak chem, Aom zaosiannupa ding, Ating banai han ongnu mi ding thouwo, diga kraanmi rwan om Pa na rinne. Zaosiannupa ding bweiyo, atiga zao nun ga chai imphaang thanglune; atiga Eina kasinnu nun ding Akut tumut satlune. b b v7 Jisu na Bating bazung thangnu zingpha ga, hei chong ding Baraanto lang suiye: “Eina zaosiannupa ding bwei thanglune, atiga zao hup om zao nun ga chai imphaang thanglune” (Matthew 26:31; Mark 14:27). Atiga talei ram pum bi, diga ani Pa na rinne, thiraang kani ga kapak chat thangluga braanlune, atiyeda thiraang khat ga haba bi ringga kik taat thanglune. Haba thiraang lwaknu ding Eina mei bi kalwang hunglune; tangka to bathiangnu danga Eina bani ding to bathiang thanglune, kachaak tamphaangnu danga bani ding tamphaanglune. Banina Ameng ding koulune; Eina bani ding katak thanglune. Habei ga Eina rinlune, “Bani Ami nun gaye,” atiga banina rinlune, “Ani Pa.”