शुद्धिकरणको निम्ति खोलिएको एउटा मूल

पाप धोइदिन एउटा मूल खोलिन्छ, मूर्तिहरू र झूटा अगमवक्ताहरू हटाइन्छन्, र गोठालालाई प्रहार गरिन्छ अनि भेडाहरू छरपस्ट हुन्छन्। एक तिहाइलाई आगोबाट पार गराएर शुद्ध पारिन्छ, जबसम्म उहाँ भन्नुहुन्न, यिनीहरू मेरा सन्तान हुन्, र तिनीहरू भन्छन्, हाम्रा पिता।

अध्याय 13।

त्यस दिन दाऊदको घराना र यरूशलेमका मानिसहरूलाई पाप र अशुद्धताबाट शुद्ध पार्न एउटा मूल खोलिनेछ।

त्यस दिन, स्वर्गका सेनाहरूका पिता घोषणा गर्नुहुन्छ, म देशबाट मूर्तिहरूका नाउँ काटिदिनेछु, र ती फेरि सम्झना गरिनेछैनन्; अनि म अगमवक्ताहरू र अशुद्धताको आत्मालाई देशबाट हटाइदिनेछु।

यदि कसैले अझै अगमवाणी गर्छ भने, त्यसलाई जन्माउने बुबा र आमाले त्यसलाई भन्नेछन्, “तैँले मर्नैपर्छ, किनभने तैँले हाम्रा पिताको नाउँमा झूट बोलेको छस्।” अनि जब त्यसले अगमवाणी गर्छ, त्यसलाई जन्माउने त्यसका बुबा र आमाले त्यसलाई छुरा हान्नेछन्।

त्यस दिन हरेक अगमवक्ताले अगमवाणी गर्दा आफ्नो दर्शनदेखि लज्जित हुनेछ; न त तिनीहरूले छल गर्न रौँ भएको खास्टो पहिरिनेछन्।

तर त्यसले भन्नेछ, “म अगमवक्ता होइन; म त किसान हुँ, किनभने जवानीदेखि नै यो जमिन मेरो सम्पत्ति भएको छ।” यदि कसैले त्यसलाई सोध्छ, “तिम्रा हातहरूका बीचमा भएका यी घाउहरू के हुन्?” त्यसले भन्नेछ, “म मेरा मित्रहरूको घरमा घाइते भएको थिएँ।” ^a

गोठालोलाई प्रहार, भेडाहरू तितरबितर

हे तरवार, मेरो गोठालोको विरुद्धमा, मेरो नजिक उभिने मानिसको विरुद्धमा जाग्, स्वर्गका सेनाहरूका पिता घोषणा गर्नुहुन्छ। गोठालोलाई प्रहार गर्, र भेडाहरू तितरबितर हुनेछन्; अनि म साना जनहरूको विरुद्धमा आफ्नो हात फर्काउनेछु। ^b अनि सारा देशमा, हाम्रा पिता घोषणा गर्नुहुन्छ, दुई-तिहाइ काटिनेछन् र नष्ट हुनेछन्, तर एक-तिहाइ त्यसमा जीवित रहनेछन्। त्यो अन्तिम एक-तिहाइलाई म आगोमा हाल्नेछु; म तिनीहरूलाई चाँदीलाई झैँ खार्नेछु, सुनलाई झैँ जाँच्नेछु। तिनीहरूले मेरो नाउँ पुकार्नेछन्; म तिनीहरूलाई जवाफ दिनेछु। तब म भन्नेछु, “तिनीहरू मेरा सन्तान हुन्,” र तिनीहरूले भन्नेछन्, “हाम्रा पिता।”