Ncera wa Madzi Wakufungulwa toera Kucenesa

Tsime isafungulwa toera kusuka madawo, nkhuni na aprofeta authambi asabulusiwa, na mbusa asamenyiwa toera mabira amwazike. Cigawo cacitatu cisapitiswa mu moto mbacicenesa, mpaka iye alonge kuti ndi ana anga na iwo alonge, Baba wathu.

Kapitulu 13.

Pa ntsiku ineyi ncera wa madzi unadzafunguka toera nyumba ya Dhavidhi na anthu a ku Yerusalemi, toera kuacenesa ku madawo na kupswipa.

Pa ntsiku ineyi, asalonga Baba wa mankhondo a kudzulu, Ine ndinadzagwanda madzina a milungu ya uthambi m'dziko, toera akhonde kukumbukwa pontho; pontho ndinadzabulusa aprofeta na nzimu wakupswipa m'dziko.

Munthu angapitiriza kucita uprofeta, baba na mai adan'bala anadzan'panga kuti: “Iwe usafunika kufa, thangwi walonga uthambi mu dzina ya Baba wathu.” Na mu ndzidzi unacita iye uprofeta, baba na mai adan'bala anadzan'baya.

Pa ntsiku ineyi profeta m'bodzi na m'bodzi anadzakhala na manyadzo a masomphenya ace mu ndzidzi unacita iye uprofeta; nee anadzabvala nguwo ya mudzisi toera kunyengeza.

Mbwenye iye anadzalonga tenepa: “Ine sine profeta; ndine nyakulima, thangwi mataka ndi upfumi wanga kutomera mu uphale wanga.” Munthu angan'bvundza kuti: “Pironda pyenepi pya pakati pa manja ako ndi pyanji?” iye anadzatawira tenepa: “Ndavulazwa ku nyumba ya axamwali anga.” ^a

Nkumbizi Wamenywa, Mabira Amwazika

Lamuka, supada, kutsutsana na nkumbizi wanga, kutsutsana na mamuna ule anaima pafupi na Ine, asalonga Baba wa mankhondo a kudzulu. Menya nkumbizi, mabira anadzamwazika; Ine ndinadzazungunusa djanja yanga kuna anang'ono. ^b Na m'dziko mwonsene, asalonga Baba wathu, mbali ziwiri za zitatu zinadzagwandwa mbazifa, mbwenye mbali ibodzi ya zitatu inadzasiyiwa mbikhala na umaso. Mbali ineyi yakumalisa ya zitatu Ine ndinadzaipitisa pa moto; ndinadzaicenesa ninga parata, ndinadzaiyesera ninga ouro. Iwo anadzacemera dzina yanga; Ine ndinadzaatawira. Penepo Ine ndinadzalonga kuti: “Iwo ndi ana anga,” iwo anadzalonga kuti: “Baba wathu.”