Zechariah 13

13 ¹Chithang, morei kala makatharwui eina athumli tharmi khavai, David shimkhurwui vang kala Jerusalemwui khaleibingwui vang ura̱ akha shohaira.

²Chithang, da saikorawui Avāna hānga, ina ngalei chiwui eina meoma̱bingwui aming katathaora, marāza̱luimara; kala ina marānbing kala makathar manglā chi ngalei chiwui eina khuithuihaora.

³Kachikathā mi akhana aruila marānakha, ali pharākakhui avā kala ava̱va̱na ali hāngra, "Na thiphalungra, kaja nana ithumwui Avāwui ming eina kakapik tui hānghaira." Kala ana marānda, ali pharākakhui awui avā kala ava̱va̱na ali kāpza̱ra.

⁴Chithang, marān kachiva̱na marānda awui khamahāwui pongli khayakra; kala athumna minam khavai ahā zarshun kachon mangavaipaimara.

⁵Kha ana hāngra, "I marān maningmana; I luikhavā mi akhana, kaja nganuilakhawui eina thuida ngalei chi iwui sāman ngasāhaira." ⁶Kachikathā akhana ali ngahānakha, "Nawui pāng ngachaili khalei khamā hi khikhala?" ana hāngra, "Iwui ngasotnaobingwui shimli ina khamā za̱haira." ^a a v6 "Nawui pāng ngachaili" da tui hi phasāwui maishongli theisamphang khamābingwui pongli hāngkahai khareva̱ khamatui akhana.

Yaokahoma Shaokahai, Yaobing Kashamyāng

⁷Ngakarthuilu, raighai, iwui yaokahomali mamayāla, ili ngavapnāda nganinga mipāli mamayāla, da saikorawui Avāna hānga. Yaokahomali shaolu, kala yaobing china kashamyānghaora; kala kateobing chili ina pāng parra. ^b b v7 Ali tukkhuihai ngayāshongli Jishuna hi tui chi akhalattawui pongli hānga, "Ina yaokahomali shaora, kala yaoshangwui yaobing china kashamyānghaora" (Matthew 26:31; Mark 14:27). ⁸Kala ngalei tongali, da ithumwui Avāna hānga, samkaphang kathumwui samkhani chi katattāhaida shimānhaora, kha samkaphang kathumwui samakha chi chiwui alungli kharing eina taira. ⁹Samkaphang kathumwui samakha khanaowa chi ina meiwui alungli khuirāra; ina athumli lupāsā thāda samathākhuira, athumli sinā thāda chāng tamyangra. Athumna iwui mingli ngakaora; ina ngahānkāra. Chieina ina hāngra, "Athum iwui naongarāna," kala athumna hāngra, "Ithumwui Avā."