Sapha Kora Nimite Ekta Jhorna Khuli Diya
Paap dhuabole ekta jhorna khuli diye, murti khan aru misa bhabobadi khan ke hatai diye, aru mer chorai diya jon ke mari diye aru mer khan bikhori jai. Tin bhag laga ek bhag ke jui te pura kori kene sapha kori diye, jitia tak Tai koi, tarkhan Moi laga bacha khan ase, aru tarkhan koi, Amar Pitri.
13 1Hei din te David laga ghor aru Jerusalem te thaka manuh khan ke paap aru letera pora sapha koribole, ekta jhorna khuli jabo.
2Hei din te, sorgo laga sena khan laga Pitri pora koise, Moi desh pora murti khan laga nam kati phelabo, aru eitu ke kunbi aru yaad nakoribo; aru Moi bhabobadi khan aru letera laga atma ke desh pora hatai dibo.
3Jodi kunba etiya bhi bhabobani kore, tene hole tar ke jonom diya pitri aru ma pora tar ke kobo, “Tumi moribo lage, kilemane tumi amar Pitri laga nam te misa kotha koise.” Aru jitia tai bhabobani kore, tar ke jonom diya pitri aru ma pora tar ke chura pora maribo.
4Hei din te, jitia bhabobadi khan bhabobani kore, taikhan nijor darshan karone sorom pabo; aru taikhan thogai dibole chuli laga chador pindhibo nai.
5Kintu tai kobo, “Moi bhabobadi nohoi; moi kheti kora manuh ase, kilemane moi chutu thaka somoy pora mati to moi laga ase.” 6Jodi kunba tar ke hudibo, “Tumar hath majot te eitu ghau khan ki ase?” tai kobo, “Moi laga sathi khan laga ghor te moi ke ghau korise.” a a v6 Eitu “tumar hath majot te” kowa tu, gaw laga age phale dikhai diya ghau khan karone purana jamana laga ekta kotha ase.
Mer Rokha Manuh ke Marise, Mer Khan Titiri Jaise
7Uthibi, tolwar, Moi laga mer rokha manuh birodh te, Moi laga usor te khara kora manuh birodh te, sorgo laga sena khan laga Pitri pora koise. Mer rokha manuh ke maribi, aru mer khan titiri jabo; aru Moi chutu khan birodh te Moi laga hath ghurai dibo. b b v7 Jisu ke dhori luwa rati te Tai eitu kotha nijor karone cholai loise: “Moi mer rokha manuh ke maribo, aru jhak laga mer khan titiri jabo” (Matthew 26:31; Mark 14:27). 8Aru pura desh te, amar Pitri pora koise, tin bhag pora dui bhag kati phelabo aru khotom hobo, kintu tin bhag pora ek bhag eitu te jinda thakibo. 9Hei bachi juwa tin bhag pora ek bhag ke Moi jui bhitor te anibo; Moi taikhan ke rupa nisena sapha koribo, suna nisena taikhan ke porikha koribo. Taikhan Moi laga nam mati bo; Moi taikhan ke jawab dibo. Tetiya Moi kobo, “Taikhan Moi laga bacha khan ase,” aru taikhan kobo, “Amar Pitri.”