ንሰንበት ዝኸውን መዝሙር
መዝሙር። ንመዓልቲ ሰንበት ዝኸውን መዝሙር።
መዝሙር ሰንበት ብዛዕባ ዝተፈላለየ ጊዜታት። ሓጥኣን ከም ሳዕሪ ቀልጢፎም ይበቕሉ ይጠፍኡ ድማ፤ ፃድቃን ግና ቀስ ኢሎም ከም ተምርን ዝግባን ይዓብዩ፥ ኣብ እርጋኖም ገና ፍረ እናፈረዩ ልሙዓት ኮይኖም ይነብሩ፥ ኣብ ኣፀድ ኣቦና ስለ ዝተኸሉ።
92 1ንኣቦና ምምስጋን፥ ኦ ልዑል፥ ንስምካ ድማ ምዝማር ፅቡቕ እዩ፥ 2ምሕረትካ ብጊሓት፥ ሓቅነትካ ድማ ብለይቲ ምንጋር፥ 3ብዓሰርተ ኣውታር ዘለዎ መሳርሕን ብበገናን፥ ብዜማ መሰንቆ። 4ኦ ኣቦና፥ ብግብርኻ ኣሐጒስካኒ ኢኻ እሞ፤ ብግብሪ ኣእዳውካ ብሓጐስ እዝምር ኣለኹ። 5ኦ ኣቦና፥ ግብርኻ ኽንደይ ዓብዪ እዩ! ሓሳባትካ የመና ዓሚቝ እዩ! 6እቲ ዘይለባም ሰብ ኣይፈልጥን፥ ዓሻ ድማ ነዙይ ኣየስተውዕሎን፦
7ሓጥኣን ከም ሳዕሪ እኳ እንተ በቘሉ፥ ኵሎም ዓመፀኛታት ድማ እንተ ዓንበቡ፥ ንዘለኣለም ንጥፍኣት ተፈሪዶም እዮም። 8ንስኻ ግና፥ ኦ ኣቦና፥ ንዘለኣለም ኣብ ላዕሊ ኢኻ። 9ኦ ኣቦና፥ እንሆ ፀላእትኻ፥ እንሆ ፀላእትኻ ክጠፍኡ እዮም፤ ኵሎም ዓመፀኛታት ድማ ክብተኑ እዮም። 10ንቀርነይ ግና ከም ናይ ሓርሽ ልዕል ኣበልካ፤ ብሓድሽ ዘይቲ ተቐቢአ ኣለኹ። 11ኣዒንተይ ነቶም ዝፀናተዉኒ ፀላእተይ ረኣያ፤ ኣእዛነይ ድማ ጥፍኣት እቶም ዝለዓሉኒ ሓጥኣን ሰምዓ። 12ፃድቕ ከም ተምሪ ይዕምብብ፤ ከምቲ ኣብ ሊባኖስ ዘሎ ዝግባ ይዓቢ። 13ኣብ ቤት ኣቦና ዝተኸሉ፥ ኣብ ኣፀድ ኣቦና ይዕምብቡ። 14ገና ፍረ ይፈርዩ፤ ኣብ እርጋን ርሱናትን ልምሉማትን ኮይኖም ይነብሩ፥ 15ኣቦና ቅኑዕ ምዃኑ ንምንጋር፤ ንሱ ኸውሐይ እዩ፥ ኣብኡ ድማ ዓመፃ የለን።
