Rwĩmbo rwa Thabatũ

Thaburi. Rwĩmbo rwa mũthenya wa Thabatũ.

Rwĩmbo rwa Thabatũ rwĩgiĩ mahinda mataiganaine. Andũ aaganu mameraga na ihenya ta nyeki, magathira; andũ arĩa athingu makũraga kahora, ta mũkĩndũ na mũtarakwa, na o na magĩkũrĩte no maciaraga maciaro na magatũũra marĩ maruru nĩ ũndũ wa harĩa maahaandirwo — njainĩ cia Ithe witũ.

Gĩcunjĩ 92.

Nĩ wega gũcookeria Ithe witũ ngaatho, na kũinĩra rĩĩtwa rĩaku nyĩmbo cia kũgooca, wee Ũrĩa-ũrĩ-Igũrũ, kuumbũra ũtugi waku wa kĩrĩĩkanĩro rũũciinĩ, naguo wĩhokeku waku matukũinĩ mothe, na kĩnanda kĩa nga ĩkũmi, o na kĩnanda kĩa mũgeeto, hamwe na mũgambo mwega wa kĩnanda. Amu nĩũũkenetie, wee Ithe witũ, nĩ ũndũ wa wĩra waku; nĩngenaga ngĩinaga nĩ ũndũ wa ciĩko cia mooko maku. Kaĩ ciĩko ciaku irĩ nene-ĩ, wee Ithe witũ! Meciiria maku nĩ marikĩru mũno! Mũndũ ũtarĩ ũũgĩ ndamenyaga, o na mũkĩĩgu ndataũkagĩrwo nĩ ũndũ ũyũ:

O na gũtuĩka andũ aaganu nĩ kũmera mamera ta nyeki, nao eeki ũũru oothe makagaacĩra, no nĩmatuĩrĩirwo kũniinwo nginya tene. No wee, Ithe witũ, ũrĩ igũrũ nginya tene. Nĩgũkorwo ta kĩone, thũ ciaku, wee Ithe witũ—ta kĩone, thũ ciaku nĩigathira; eeki ũũru oothe nĩmakaahurunjwo. No wee nĩũtũgĩrĩtie rũhĩa rwakwa na igũrũ ta rwa ndegwa ya gĩthaka; na niĩ nĩndĩhakĩtwo maguta maerũ. Maitho makwa nĩmoonete thũ ciakwa iria incũthagĩrĩria; namo matũ makwa nĩmaiguĩte ũrĩa andũ aaganu arĩa manjũkĩrĩire makaaniinwo. Andũ arĩa athingu nĩmagaacagĩra ta mũkĩndũ; makũraga ta mũtarakwa wa Lebanoni. Mahaandĩtwo nyũmbainĩ ya Ithe witũ, makagaacĩra njainĩ cia Ithe witũ. O na magĩkũrĩte nĩmaciaraga maciaro; matũũraga marĩ merũ na maruru, nĩguo monanie atĩ Ithe witũ nĩ mũrũngĩrĩru; nĩ we ihiga rĩakwa, na gũtirĩ ũndũ mũũru thĩinĩ wake.