Nounyet shanga Chia
Chia che. Nounyet chalou shanga chia che.
Noubü Chalou chia che, phatbü akibü jih shuong shanga. Amaibü shuong sang tegü tongde pungan thonlabü; saopobü shuong yenko yenko pungda, pünglong hoba cedar bu tegü, baushila ka toukei hek sepeian hoba shomenbü ong kida, aishanga haoen leibü lam shanga—seneibü Bou shemjang shuong.
92 1Seneibü Bou la nyensang kula, hoba O Thükkabou, kaibü nyen shanga chia laula kho maibü ki, 2ngeyang ka kaibü üeisanou lenla, hoba langyang pendoua kaibü maanglemenbü lenla, 3laubük anbü kongkin si kongkin thüka, laangkip kongkin tuokbü langei. 4Aishanga O Bou, nyi kaibü kümsilei danko ngeibü maang haiko kua; kaibü ikkümiklei to ngo olinko chia laulabü. 5O Bou, kaibü kümsilei lai yaangbü ki! Kaibü thounoubü aeibou haübü ki! 6Sensimaang mütei angeda, hoba ngoubüloubü mütei ho aditenda:
7Amaibü shuong sang tegü pungasikei, hoba amai kümbü pendou pungasikei, haoen ponpen thon akiko mautilabü. 8Lausikei O Bou, nyi ponpen thükaeto kia. 9Aishanga chühashi, O Bou, kaibü dangbou shuong—chühashi, kaibü dangbou shuong maulabü; amai kümbü pendou lintilabü. 10Lausikei nyi ngeibü hau yamkabü ngou tegü yaangentikei; ngo onang haanbüei naangkukei. 11Ngeibü nyekei ngo mangsenbü dangbou shuong hapa; ngeibü nouei ngo khulimbo longbü amaibü shuongeibü mautilabü ditkua. 12Saopobü müt pünglong tegü pungda; haoen Lebanon kabü cedar bu tegü pungda. 13Seneibü Bou chema libü, haoen seneibü Bou shemjang ka pungda. 14Haoen toukei hek sepeida, jailean sühko; haoen haanbü hoba shomenbü ong kida, 15Bou kho tangbü ki dogo lenla; hao ngeibü laang ki, hoba hao thea shedbü aying.
