ሙሴን ዓበይትን ተዛረቡ

ፈለግ ዮርዳኖስ ስገር፥ ዓበይቲ ኣእማን ብመሬት ለቕልቕ፥ ነዝ ሕጊ እዙይ ድማ ኣብኣቶም ኣግሂድካ ፅሓፍ፤ መሰውኢ ኣቦኻ ኻብ ዘይተወቕረ ኣእማን ስራሕ፥ ኣብኡ ኸዓ መስዋእቲ ምስጋና ብላዕ። ሽዑ ድማ ሽዱሽተ ነገድ ኣብ ገሪዛን፥ ሽዱሽተ ኸዓ ኣብ ጌባል፥ እቶም ሌዋውያን ዓሰርተ ኽልተ መርገም እናኣወጁ፥ ኵሉ እቲ ህዝቢ ድማ ‘ኣሜን’ ይብል።

ምዕራፍ 27።

ሙሴን ዓበይቲ እስራኤልን ነቶም ህዝቢ ኸምዙይ ኢሎም ኣዘዝዎም፦ “ነዝ ኣነ ሎሚ ዝእዝዘኩም ዘለኹ ኵሉ ትእዛዝ ሓልዉ። ናብታ ኣቦኹም ዝህበኩም ዘሎ ምድሪ ፈለግ ዮርዳኖስ ምስ ሰገርኩም፥ ዓበይቲ ኣእማን ኣቚምኩም ብመሬት ለቕልቕዎም። ምስ ሰገርኩም፥ ናብታ ኣቦኹም ዝህበኩም ምድሪ፥ ከምቲ ኣቦና ተስፋ ዝኣተወልኩም ናብታ ፀባን መዓርን እተውሕዝ ምድሪ ምእንቲ ኽትኣትዉ፥ ነዝ ኵሉ ቓል ሕጊ እዙይ ኣብኣቶም ፅሓፉ። ፈለግ ዮርዳኖስ ምስ ሰገርኩም፥ ነዞም ኣእማን እዚኣቶም ከምቲ ሎሚ ዝእዝዘኩም ዘለኹ ኣብ እምባ ጌባል ኣቚምኩም ብመሬት ለቕልቕዎም። ^a ኣብኡ ድማ ንኣቦኹም መሰውኢ፥ መሰውኢ ኣእማን ስርሑ፤ ዝኾነ ሓፂን ኣቕሓ ኣይንከኣዮም። ንመሰውኢ ኣቦኹም ካብ ዘይተወቕረ ኣእማን ስርሑ፤ ኣብ ልዕሊኡ ድማ ንኣቦኹም ዝቃፀል መስዋእቲ ኣቕርቡ። መስዋእቲ ምስጋና ሰዊእኹም ኣብኡ ብልዑ፤ ኣብ ቅድሚ ኣቦኹም ከዓ ተሓጐሱ። ነዝ ኵሉ ቓል ሕጊ እዙይ ኣብቶም ኣእማን ኣፀቢቕኩም ኣግሂድኩም ፅሓፍዎ።”

ህዝቡ ኢኹም

ሙሴን እቶም ሌዋውያን ካህናትን ንዅሉ እስራኤል ከምዙይ በልዎም፦ “ኦ እስራኤል፥ ስቕ ኢልኩም ስምዑ። ሎሚ ህዝቢ ኣቦኹም ኮይንኩም ኣለኹም። ነዝ ሎሚ ዝእዝዘኩም ትእዛዛቱን ሕግጋቱን እናሓሎኹም ንኣቦኹም ተኣዘዝዎ።”

ሙሴ ኸዓ በታ መዓልቲ እቲኣ ነቶም ህዝቢ ኸምዙይ ኢሉ ኣዘዞም፦ “ፈለግ ዮርዳኖስ ምስ ሰገርኩም፥ እዚኣቶም ነቲ ህዝቢ ኽምርቑ ኣብ እምባ ገሪዛን ደው ይበሉ፦ ስምኦን፥ ሌዊ፥ ይሁዳ፥ ይሳኮር፥ ዮሴፍ፥ ብንያም። እዚኣቶም ከዓ ነቲ መርገም ኣብ እምባ ጌባል ደው ይበሉ፦ ሮቤል፥ ጋድ፥ ኣሴር፥ ዛብሎን፥ ዳን፥ ንፍታሌም። እቶም ሌዋውያን ድማ ንዅሎም ደቂ እስራኤል ዓው ብዝበለ ድምፂ ኸምዙይ ኢሎም ይእውጁ፦ ‘እቲ ንኣቦና ፍንፉን ዝኾነ፥ ብኢድ በዓል ሞያ ዝተሰርሐ ምስሊ ጣዖት ዝቐርፅ ወይ ዘፍስስ፥ ብስዉር ከዓ ዘቑም ሰብ ርጉም ይኹን።’ ኵሉ ህዝቢ ድማ ‘ኣሜን’ ኢሉ ይመልስ።”

“ነቦኡ ወይ ንኖኡ ዘቃልል ሰብ ርጉም ይኹን።” ኵሉ ህዝቢ ድማ “ኣሜን” ይበል።

“ደረት ብፃዩ ዝደፍእ ሰብ ርጉም ይኹን።” ኵሉ ህዝቢ ድማ “ኣሜን” ይበል።

“ንዕዉር ኣብ መንገዲ ዘስሕት ሰብ ርጉም ይኹን።” ኵሉ ህዝቢ ድማ “ኣሜን” ይበል።

“ንስደተኛ፥ ንደኽታም፥ ወይ ንመበለት ፍርዲ ዘቐይን ሰብ ርጉም ይኹን።” ኵሉ ህዝቢ ድማ “ኣሜን” ይበል።

ምስ ሰበይቲ ኣቦኡ ዝድቅስ ሰብ፥ ንድቃስ ኣቦኡ ኣነዊሩ እዩ እሞ፥ ርጉም ይኹን። ኵሉ ህዝቢ ድማ “ኣሜን” ይበል።

“ምስ ዝኾነ እንስሳ ዝድቅስ ሰብ ርጉም ይኹን።” ኵሉ ህዝቢ ድማ “ኣሜን” ይበል።

“ምስ ሓፍቱ፥ ጓል ኣቦኡ ወይ ጓል ኖኡ፥ ዝድቅስ ሰብ ርጉም ይኹን።” ኵሉ ህዝቢ ድማ “ኣሜን” ይበል።

“ምስ ሓማቱ ዝድቅስ ሰብ ርጉም ይኹን።” ኵሉ ህዝቢ ድማ “ኣሜን” ይበል።

“ንብፃዩ ብስዉር ዝቐትል ሰብ ርጉም ይኹን።” ኵሉ ህዝቢ ድማ “ኣሜን” ይበል።

“ንፁህ ሰብ ክቐትል ጉቦ ዝቕበል ሰብ ርጉም ይኹን።” ኵሉ ህዝቢ ድማ “ኣሜን” ይበል።

“ነዝ ቓል ሕጊ እዙይ ዘይድግፍን ዘይእዘዝን ሰብ ርጉም ይኹን።” ኵሉ ህዝቢ ድማ “ኣሜን” ይበል። ^b