موسىٰ او مشران خبرې کوى

له اردن څخه تېر شئ، لويې ډبرې په ګچو پټې کړئ، او دا شريعت پرې په روښانه توګه وليکئ؛ د خپل پلار قربانګاه له نه تراشل شويو ډبرو جوړه کړئ او هلته د سلامتۍ نذرانې وخورئ. بيا شپږ قبيلې پر ګريزيم او شپږ پر عيبال، په داسې حال کې چې لاويان دولس لعنتونه په لوړ غږ وايي او ټول خلک آمين ځواب ورکوي.

څپرکی 27.

موسىٰ او د اِسرائيل مشرانو خلقو ته حُکم وکړو چې، ”هر هغه حُکم چې زۀ نن تاسو ته درکوم، هغه ومنئ. کله چې تاسو د اُردن نه پورې وتلئ هغه مُلک ته چې ستاسو پلار يې درکوى، نو لوئ لوئ ګټې ودروئ او په چُونو يې اوبۀ کړئ. کله چې تاسو پورې وځئ، نو د دې شريعت ټول کلام پرې وليکئ، دې دپاره چې هغه مُلک ته ننوځئ چې ستاسو پلار يې درکوى، هغه مُلک چې د شيدو او شاتو وياله پکښې بهيږى، لکه څنګه چې ستاسو سره زمونږ پلار وعده کړې وه. کله چې تاسو د اُردن نه پورې وځئ، نو دا ګټې د عيبال په غر باندې ودروئ، لکه څنګه چې زۀ نن تاسو ته حُکم کوم، او په چُونو يې اوبۀ کړئ. ^a هلته د خپل پلار دپاره يو قربان‌ګاه جوړ کړئ، د ګټو قربان‌ګاه؛ د اوسپنې کوم اوزار دې ورته لاس ونۀ رسوى. د خپل پلار قربان‌ګاه د نۀ تراشلو ګټو نه جوړ کړئ، او پرې خپل پلار ته سوزيدونکى قربانۍ وړاندې کړئ. تاسو هلته د سلامتۍ قربانۍ وکړئ او هغه هلته وخورئ، او د خپل پلار په حضور کښې خوشحالى وکړئ. او تاسو د دې شريعت ټول کلام په دغو ګټو باندې ډېر صاف وليکئ.“

تاسو د هغۀ قوم يئ

موسىٰ او د لاوى اِمامانو ټول اِسرائيل ته ووئيل چې، ”اے اِسرائيله، چپ شه او واوره. نن ورځ تۀ د خپل پلار قوم شوې. د خپل پلار حُکم ومنه، او د هغۀ هغه حُکمونه او قانُونونه وساته چې زۀ يې نن تا ته حُکم کوم.“

په هم هغه ورځ موسىٰ خلقو ته حُکم وکړو چې، ”د اُردن نه د پورې وتو نه پس به دا خلق د ګرزيم په غر باندې خلقو ته د برکت ورکولو دپاره ولاړ وى: شمعون، لاوى، يهوداه، اِشکار، يوسف او بنيامين. او دا به د لعنت دپاره د عيبال په غر باندې ولاړ وى: روبين، جاد، آشر، زبولون، دان او نفتالى. او لاويان به په اُوچه آواز د اِسرائيل ټولو خلقو ته آواز وکړى چې، ’لعنت دې وى په هر هغه چا باندې چې بُت تراشى يا والوى — چې زمونږ پلار ترې نفرت کوى، د کوم کاريګر د لاسونو جوړ کړے شوے — او هغه په پټه ودروى.‘ ټول خلق دې جواب ورکړى چې، ’آمين.‘“

’لعنت دې وى په هر هغه چا باندې چې د خپل پلار يا مور بې عزتى کوى.‘ ټول خلق وائى چې، ’آمين.‘

’لعنت دې وى په هر هغه چا باندې چې د خپل ګاونډى د سرحد نښه خوزوى.‘ او ټول خلق دې ووائى چې، ’آمين.‘

’لعنت دې وى په هر هغه چا باندې چې يو ړوند سړے په لار کښې بې لارې کوى.‘ ټول خلق دې ووائى چې، ’آمين.‘

’لعنت دې وى په هر هغه چا باندې چې د پردى، د يتيم يا د کونډې حق پايمالوى.‘ ټول خلق به ووائى چې، ’آمين.‘

لعنت دې وى په هر هغه چا باندې چې د خپل پلار د ښځې سره هم‌بستره کيږى، ځکه چې هغۀ د خپل پلار د نکاح بې حُرمتى وکړله. ټول خلق دې ووائى چې، ’آمين.‘

’لعنت دې وى په هر هغه چا باندې چې د کوم ځناور سره هم‌بستره کيږى.‘ او ټول خلق دې ووائى چې، ’آمين.‘

’لعنت دې وى په هر هغه چا باندې چې د خپلې خور سره هم‌بستره کيږى، چې هغه د هغۀ د پلار لور يا د مور لور وى.‘ ټول خلق دې ووائى چې، ’آمين.‘

’لعنت دې وى په هر هغه چا باندې چې د خپلې خواښې سره هم‌بستره کيږى.‘ او ټول خلق دې ووائى چې، ’آمين.‘

’لعنت دې وى په هر هغه چا باندې چې خپل ګاونډے په پټه وژنى.‘ او ټول خلق دې ووائى چې، ’آمين.‘

’لعنت دې وى په هر هغه چا باندې چې د يو بې ګناه سړى د وژلو دپاره رشوت اخلى.‘ ټول خلق وائى چې، ’آمين.‘

’لعنت دې وى په هر هغه چا باندې چې د دې شريعت کلام نۀ منى او نۀ عمل پرې کوى.‘ ټول خلق دې ووائى چې، ’آمين.‘ ^b