Kayomsei Kwanda Koweechi Kaanyi
Ng'aleek che kisiirtoi eng' bukuit agobo ibinda ne nyonei. Iman rimeet, ak mami kerichet ne po chii ne muuchi kosar kergeet, ago Kwandanyo ne ki pir icheek kaamwa kole richi icheek ineegei, ak kole tilei suumeegap kaatikwak, ak kole kaek kogeny Kwandakwak.
Ng'alaali Kwandanyo eng' mustarisyek 2–3, 5–22
30 1Ng'olyoot ne ki konyoonji Jeremiah ne kibunu Kwandanyo:
2Mwaei Kwandanyo ne po Israel kole: Siir eng' bukuit ng'aleek tugul che ki amwaun. 3Keero—piitu peetuusyek, mwaei Kwandanyo, ye tuun aweechi luuleetap piignyo Israel ak Judah, mwaei Kwandanyo, ak aweekta icheek koba emet ne ki agoochi kwanisyekwak, ak kotiny icheek.
4Chu ng'aleek che ki mwa Kwandanyo agobo Israel ak Judah:
5Mwaei Kwandanyo kole: “Kigas echeek keele ne po kamuiset—kwong'eet, ma mi kaalyeet. 6Teeb nguno ak igeer: tos imuuchi muren kosich lakweet? Amune anyun ageer murenik tugul che kiim kotinyei eunekyik korosyegwaik ko uu kwony ne mi sigeet, ak kolelach togeekwak tugul? 7Nyigiis miising' peetuunooto! Ma mi ne kergei ineendet. Ko sait ne po nyalilda ne po Jakobo—ago kesar ineendet eng' nooto. 8Eng' peetuunooto, mwaei Kwanda ne po lugosyegap kipsengwet, alelekta chogit koistoegei kaating'ung' ak atil ratuutiguk, ak ma ratotiin toek ineendet kogeny. 9Ago otei Kwandanyo, ak Daudi laitoryannywa, ne tuun ang'etunjin icheek. 10Amearageni anyun, Jakobo kiboityonnyu, mwaei Kwandanyo, ak ametang'any, ee Israel; amu keero—asarin eng' ole loo, ak lagoguk eng' emet ne ki kiluulei. Week Jakobo ketebi kaalyeet ak sigeet, ak ma mi ne imuuchi koiywei ineendet. 11Amu ami kobootin asarin inyee, mwaei Kwandanyo. Agot aiyoor pororyosyek tugul che ki aiyeste inyee, ma aiyoor inyee. Ago atigonin eng' imanda, ak ma aistoin eng' ng'oogisto tugul.”
12Amu mwaei Kwandanyo kole: “Kuutyeng'ung' ma kimuuchi kisoobun, pireeng'ung' ne ng'waan. 13Ma mi ne ibesyeiyin ng'aleekyuk; ma mi keruuwogik che po pireeng'ung', ma mi soobunet eng' inyee. 14Kagiutye chaamiyeguk tugul inyee; ma mage icheek inyee. Amu kaapirin ko uu ye pirei puunyoot, eng' katigonetap chii ne koroom, amu oo ngelelnateng'ung' ak chaang' tengekwogiguk. 15Amune iriir agobo kuutyeng'ung'? Ma kimuuchi kisoobun ng'wanindang'ung'. Amu oo ngelelnateng'ung' ak tengekwogiguk che chaang', kayaun tuguuchu. 16Nooto anyun che amei inyee kiame icheek, ak puunikyuk tugul—age tugul eng' icheek—koba luuleet; che luulei inyee kiluul icheek, ak che oorei inyee agoochi koek logeet.” 17Amu aweechin chametapkei ak asoobi pirutiguk, mwaei Kwandanyo, amu kagiguurin ne kiisto: “Zion ni—ma mi ne mage ineendet.”
18Mwaei Kwandanyo kole: “Keero—aweechi luuleetap emaisyegap Jakobo ak arirenji meng'otosyekyik; keteech nganaseet eng' karurugutyonnyi, ak tonon korgoreet eng' ole kanyoolu. 19Konyooru eng' icheek kagoochinet ak keelyegap boiboiyet. Atese icheek, ak ma egu che ng'ering'; akonji ineet konyit, ak ma egu che meng'ech. 20Egu lagoguk ko uu ye ki mi keny, ak kigimit porotennywa eng' tai anee, ak abir tugul che oussei icheek. 21Koek kirwoogindennywa age eng' icheek, ak konyo laitoryannywa eng' kwenigwak. Aibu ineendet koneegit, ak koriikyi anee— amu ng'oo ne imuuch kotyach saboondanyi koriikyi anee? mwaei Kwandanyo. a a v21 Laitoryat ne kiibu konegit ineegei kityo si koriik Kwandanyo, koboorchigei Jeso, ineendet ne yoocho oreet koba Kwanda agobo lagok tugul. 22Ak oegu lagoguk, ak aek Kwandang'wong'.”
23Keero, kipchurchuryetap Kwandanyo! Kagoba angeet, kipchurchuryet ne maaluuchei; kobutyi eng' metitap kiptengeginik. 24Ma weektegei let angeetap Kwandanyo ne pichiien agoi koyai ak kosulda mogutigap muguleldanyi. Eng' peetuusyek che nyoo, oguiye niito.