Jeremiah 30

30 ¹Ithumwui Avāwui eina Jeremiahli rāhāng tui china:

²Israelwui ithumwui Avāna hithāda hānga: Ina nali hāngkahai tui saikora lairik akhali kapihailu. ³Yanglu, atambing rāki jiura, da ithumwui Avāna hānga, chitharan ina iwui mibing Israel eina Judahwui lan hanmiluishitra, da ithumwui Avāna hānga, kala athumwui avāngarā ina mikahai ngalei chili ina athumli khuilatungmira, kala athumna chili shimlui khuira.

⁴Hi Israel eina Judahwui pongli ithumwui Avāna hāngkahai tuibingna:

⁵Ithumwui Avāna hithāda hānga: "Ithumna khangacheewui khavao chi shāhaira; khangachā lei, chingri kahai maleimana. ⁶Ara ngahānlaga yanglu: mayarnaona nao pharāshaprala? Chithākha khisāda mayarnao pang kahai saikorali, sha̱nao naokhara̱ kachot thai eina apāng akashānli somida, kala amai saikora thengcheng ngasāda, ina theikhala? ⁷Chithang chi kayākha khangacheekhala! Chi thāda akhala maleimana. Chi Jacobwui vang ningkachot atamna; kha chiwui eina ana kahui samphangra. ⁸Chithanghon, da saikorawui Avāna hānga, ina nakahung eina kharit chi sātekmihaora, kala nawui khalap kahai chi ngalāhaora, kala yur kateibingna ali raonao masāluimara. ⁹Kha athumna ithumwui Avāli, kala ina athumwui vang ngatar ngasakmira athumwui awunga Davidli otram ngatha̱ra. ¹⁰Chiwui vang eina mangacheealu, iwui rao Jacob, da ithumwui Avāna hānga, kala maningkhariklu, O Israel; kaja yanglu, ina nali katāva̱ eina, kala nawui nao ngarāli athumwui narkahai ngalei eina huikhuira. Jacobna va̱ri kala pamphupli latungra, kala khipākhala ali mangachee ngasakmara. ¹¹Kaja ina nali huikhui khavai nali ngaso, da ithumwui Avāna hānga. Ina nali kashamyāng kahai miyur saikorali shimānchao ngasaklala, ina nali mashimānchao ngasakmara. Kha ina nali mashun eina hāngmachinra, kala ina nali tandi mami eina chao mahorhaimara."

¹²Kaja ithumwui Avāna hithāda hānga: "Nawui sākaza̱ chi maraikapaiyana, nawui khamā marlakhaira. ¹³Nawui vang nganingmi khavai akhala maleimana; nawui khamāwui vang ari maleimana, nali raikhami maleimana. ¹⁴Nawui leikashebing saikorana nali malaihaira; athumna nali khikhala mayangmimana. Kaja nawui khayonkhamāng kharei kala nawui morei kachungkhawui vang, ina nali yangkashe akhana sāthai thada, sāshi kahai miwui kharāk eina sāthata. ¹⁵Nawui sākaza̱wui pongli khisāda na vaokhala? Nawui khangashei maraikapaiyana. Nawui khayonkhamāng kharei kala nawui morei kachungkhawui vang, ina nali ot hi saikora sākahaina. ¹⁶Chiwui vang eina nali shai kachiva̱ saikora chi shaihaora, kala nawui yangkashebing saikora khalatta tukthuiserhaora; nali sākazam kachiva̱ saikorali sākazamngasakhaora, kala nali sāshaina sā kachiva̱ saikorali ina sāshaina horsangmira." ¹⁷Kaja ina nawui phasākaphā hanmiluishitra, kala nawui khamā raimira, da ithumwui Avāna hānga, khikhalajila athumna nali horkahai da hohaira: "Hi Zionna; ali yangmi khipākha maleimana."

¹⁸Ithumwui Avāna hithāda hānga: "Yanglu, Jacobwui kachonshimwui lan ina hanmiluira kala awui shimbingli lumashanmira; keinung chi awui khamongtungli sakāluishitra, kala konung chi awui pamli nganingra. ¹⁹Athumwui eina ningkashi kala khamathānkhonbing shokra. Ina athumli mataisangmira, kala athum kateo ngasakmara; ina athumli khayāshira, kala athum khangazan ngasakmara. ²⁰Athumwui naomayarabing kharewui thāda ngasāra, kala athumwui yarui kazip iwui mangāli sakāmira, kala athumli kakasham kasābing saikorali ina tandi mira. ²¹Athumwui kathāna chi athum khalattawui akha ngasāra, kala athumwui khamunga chi athumwui alungwui eina shokra. Ina ali nganai ngasakra, kala ana ili samphangra; kaja awui manglā hamlaga ili samphang khavai khipā leirakhala? da ithumwui Avāna hānga. ^a a v21 Ithumwui Avā ngalemli suikhavai atongana nganai khangasak kahai khamunga chi Jishuwui vang phongchithei, ana awui naomayara saikorawui vang Avā ngalemli vākhavai lam shomi kahai mi china. ²²Kala nathum iwui naongarā ngasāra, kala I nathumwui Avā ngasāra."

²³Yanglu, ithumwui Avāwui siphan zingrot! Malungkhavāt shokhaira, sur khaningkazata; makhayāwui kuili chi ngawokkhaira. ²⁴Ithumwui Avāwui malung kasā, awui ningli sāki kaji chi sāda makup kala ungshungranglakha eina tangda, masuitālakmara. Naoda atam rārāli nathumna hi theishingkhuinaora.