Pitri pora Tar laga poribar ke aru bhal kori dibole vachan di ase
Pichete aha ekta pidhi nimite kitab te likhi diya kotha khan. Bhoi tu hosa ase aru ghao tu manu laga kunu dawai pora bhi bhal hobole napare, tinehoile bhi taikhan ke mara amar Pitri pora nijor he taikhan ke bhal kori dibo, taikhan laga gola pora juwal bhangi dibo, aru aru ekbar taikhan laga Pitri hobo koi kene kotha diye.
30 1Amar Pitri pora Jeremiah logot te aha kotha tu:
2Israel laga amar Pitri pora eneka koi ase: Moi tumi ke koa sob kotha khan tu ekta kitab te likhibi. 3Sabi—din khan ahhi ase, amar Pitri pora koi ase, jitia Moi laga manuh Israel aru Judah laga bhal din khan aru wapas kori dibo, amar Pitri pora koi ase, aru taikhan laga purbo-pitri khan ke diya desh te taikhan ke wapas anibo, aru taikhan eitu ke adhikar koribo.
4Eitu khan amar Pitri pora Israel aru Judah laga bishoy te koa kotha khan ase:
5Amar Pitri pora eneka koi ase: “Amikhan bhoi laga chikar hunise—dar, shanti nai. 6Etiya hudibi aru sabi: ekjon mota pora bacha jonom dibo pare? Tenehole kele Moi sob takot thaka manuh ke bacha jonom diya mahila nisena tar hat tar komor te rakhi kene, aru sob chehera feka hoi juwa dikhi ase? 7Hei din tu kiman bhoyankar ase! Eitu nisena dusra eku bhi nai. Eitu Jacob nimite dukh laga homoi ase— kintu eitu pora tar ke bachai lobo. 8Hei din te, sorgo laga sena khan laga Pitri pora koi ase, Moi tumar gola pora joad bhangi dibo aru tumar bandhan khan tukra kori dibo, aru bidexi khan pora tar ke aru kitia bhi guti nabonabo. 9Hoile bhi taikhan amar Pitri laga sewa koribo, aru taikhan laga raja David laga sewa koribo, jun ke Moi taikhan nimite uthai dibo. 10Etu karone bhoi nakoribi, Moi laga noukar Jacob, amar Pitri pora koi ase, aru mon chutu nakoribi, Israel; kilemane sabi—Moi tumi ke dur pora bachai anibo, aru tumar bacha khan ke taikhan bondi thaka desh pora. Jacob shanti aru aram te wapas ahhibo, aru kun bhi tar ke bhoi nadibo. 11Kilemane Moi tumi ke bachabole tumar logot te ase, amar Pitri pora koi ase. Moi tumi ke ephale-uphale kori diya sob desh khan ke pura khotom korile bhi, tumi ke to Moi pura khotom nakoribo. Kintu Moi tumi ke niyai pora sidha koribo, aru tumi ke eku saja nadikena to nacharibo.”
12Kilemane amar Pitri pora eneka koi ase: “Tumar chot tu bhal kori naparibo, tumar ghaw bisi dangor ase. 13Tumar kotha koi dibole kun bhi nai; tumar ghaw nimite dawai nai, tumar nimite bhal huwa bhi nai. 14Tumar sob morom-kora khan tumi ke pahori jaise; taikhan tumar nimite eku chinta nakore. Kilemane Moi tumi ke dushman pora mara nisena marise, ekjon tan-mon manuh laga saja pora, kilemane tumar golti dangor ase aru tumar paap khan bisi ase. 15Tumi kele tumar chot nimite chikar kori ase? Tumar bish bhal kori naparibo. Kilemane tumar golti dangor ase aru tumar paap khan bisi ase, Moi tumi ke eitu khan korise. 16Etu karone kun pora tumi ke khai, taikhan sob ke khai dibo, aru tumar sob dushman khan—taikhan sob jon— bondi hoi jabo; kun pora tumi ke lutise, taikhan ke bhi lutibo, aru kun pora tumar ke shikar kore, Moi taikhan ke shikar nisena di dibo.” 17Kilemane Moi tumar shorir bhal kori dibo aru tumar ghaw khan bhal kori dibo, amar Pitri pora koi ase, kilemane taikhan tumi ke pheki diya manuh koi mati se: “Eitu Zion ase—kun bhi tai nimite chinta nakore.”
18Amar Pitri pora eneka koi ase: “Sabi—Moi Jacob laga tombu khan laga bhal din aru wapas anibo aru tar ghor khan uporte morom koribo; sheher tu tar nijor tila uporte aru notun kori bonabo, aru raja laga mahal tu tar thik jagate khara hobo. 19Taikhan pora dhanyavaad aru khushi laga awaj ulabo. Moi taikhan ke bisi kori dibo, aru taikhan komti nahobo; Moi taikhan ke sonman dibo, aru taikhan chutu nahobo. 20Taikhan laga bacha khan age din nisena hobo, aru taikhan laga sabha Moi laga age te thik hoi thakibo, aru kun pora taikhan ke dukh di ase, Moi taikhan sob ke saja dibo. 21Taikhan laga cholawta tu taikhan majot pora ekjon hobo, aru taikhan laga raj-kora manuh taikhan majot pora ulabo. Moi tar ke usorte anibo, aru tar Moi laga usorte ahhibo—kilemane nohole kun pora Moi laga usorte ahhibole tar nijor jibon ke bipod te dibole himmot koribo? amar Pitri pora koi ase. a a v21 Kun raj-kora manuh ke ekla usorte ani kene amar Pitri logot te usor kori diye, tai age te Jisu ke dikhai ase, jun pora Tar laga sob bacha khan nimite Pitri logot te juwa rasta khuli diye. 22Aru tumikhan Moi laga bacha khan hobo, aru Moi tumar Pitri hobo.”
23Sabi—amar Pitri laga dhamaka! Gusa ulai jaise, sob kiba udai niya dangor hawa; eitu paapi manuh laga matha uporte ghuri-ghuri giri jabo. 24Amar Pitri laga joliya gusa wapas nahobo jitia tak Tai Tar mon laga itcha khan kori kene pura nakore. Aha din khan te tumikhan eitu bujibo.