Yeremiya 30 FHB Father's Heart Bible™

30 ¹Fala idabwera kuna Yeremiya kubuluka kuna Baba wathu:

²Izezi ndi pinalonga Baba wathu wa Izarayeli: Lemba m'bukhu mafala onsene adalonga Ine kwa iwe. ³Onani—ntsiku zinabwera, asalonga Baba wathu, zinafika n'dzidzi wakuti Ine ndinadzabwezeresa mwai wa mbumba yanga ya Izarayeli na Yuda, asalonga Baba wathu, mbandiabwezera ku dziko idapasa Ine ambuya awo, mbaitambira iwo.

⁴Awa ndi mafala adalonga Baba wathu thangwi ya Izarayeli na Yuda:

⁵Izezi ndi pinalonga Baba wathu: “Tabva kulira kwa kugopa—kudzudzumika, nkhabe ntendere. ⁶Bvundzisani cincino mbamuona: kodi mamuna anakwanisa kubala? Thangwi yanji Ine ndisaona amuna onsene akuwanga akuphatirira manja awo pa ciuno ninga nkazi ali kubala, na nkhope zonsene zafuvira? ⁷Ntsiku ineyi ndi yakugopswa kwakukulu kakamwe! Nkhabepo inango ninga iyo. Ndi n'dzidzi wa nyatwa kwa Yakobe—mbwenye kubuluka mwenemu iye anadzapulumuswa. ⁸Pa ntsiku ineyi, asalonga Baba wa mankhondo a kudzulu, Ine ndinaswa goli ku nsingo wako mbandidula maunyolo ako, na anthu a madziko anango nkhabe kudzam'cita bitcu pontho iye. ⁹Mbwenye iwo anadzatumikira Baba wathu, na Dhavidhi mambo wawo, ule Ine ndinadzam'lamusa thangwi ya iwo. ¹⁰Na tenepo leka kugopa, iwe Yakobe ntumiki wanga, asalonga Baba wathu, pontho leka kudzudzumika, iwe Izarayeli; thangwi onani—Ine ndinakupulumusa kubuluka kutali, na anako kubuluka ku dziko ya ubitcu wawo. Yakobe anadzabwerera ku kupuma na ntendere, nkhabe munthu anadzam'gopesa. ¹¹Thangwi Ine ndiri na iwe toera kupulumusa iwe, asalonga Baba wathu. Maseze ndifudze mwakumaliratu mitundu yonsene ya anthu kuna ndamwaza iwe, Ine nkhabe kukufudza mwakumaliratu iwe. Mbwenye Ine ndinakulanga mwakulungama, pontho nkhabe kukusiya wakukhonda langwa mwakukwana.”

¹²Thangwi izezi ndi pinalonga Baba wathu: “Kupweteka kwako nkhabe kupola, cironda cako ndi cikulu kakamwe. ¹³Nkhabepo munthu wakutsidzikiza mulandu wako; cironda cako nkhabe mankhwala, nkhabe kupola kwa iwe. ¹⁴Onsene anakufuna iwe aduwala iwe; iwo nkhabe kukutsalakana. Thangwi Ine ndakumenya ninga munakumenyera nyamalwa, na cilango ca munthu waukali, thangwi kudawa kwako ndi kukulu, na madawo ako ndi mazinji. ¹⁵Thangwi yanji usalira thangwi ya kupweteka kwako? Kutsukwala kwako nkhabe kupola. Thangwi kudawa kwako ndi kukulu, na madawo ako ndi mazinji, Ine ndakucitira pinthu ipi. ¹⁶Na tenepo onsene anakudya iwe anadzadyiwambo, na anyamalwa ako onsene—m'bodzi na m'bodzi—anadzaenda ku ubitcu; ale anakubira iwe anadzabiriwambo, na onsene anakuphata iwe ninga nyama, Ine ndinadzaapereka ninga nyama.” ¹⁷Thangwi Ine ndinadzabwezeresa thanzi yako mbandipolesa pironda pyako, asalonga Baba wathu, thangwi iwo akucemera iwe wakuthaiwa: “Uyu ndi Sioni—nkhabe munthu anan'tsalakana.”

¹⁸Izezi ndi pinalonga Baba wathu: “Onani—Ine ndinadzabwezeresa mwai wa matenti a Yakobe mbandibvera ntsisi nyumba zace; nzinda unadzamangwa pontho pa cikwa cace, na nyumba ya umambo inadzalimira pa mbuto yace yakuthema. ¹⁹Kubuluka muna iwo munadzabwera kutenda na magwagwa a kukondwa. Ine ndinadzaathimiza, iwo nkhabe kudzakhala akucepa; ndinadzaalemedza, iwo nkhabe kudzakhala ang'ono. ²⁰Ana awo anadzakhala ninga mukhakhalira iwo kale, na mpingo wawo unadzakhazikiswa pamaso panga, na Ine ndinadzalanga onsene anaathabusa. ²¹Ntsogoleri wawo anadzabuluka pakati pawo ene, na ntongi wawo anadzabuluka muna iwo. Ine ndinadzan'fendedzera, iye anadzabwera cifupi na Ine—thangwi mbani ule angalimbe ntima kutaya umaso wace toera kufenderera Ine? asalonga Baba wathu. ^a a v21 Ntongi ule ekha anafendedzerwa toera kubwera cifupi na Baba wathu asalozera Yezu, ule anafungula njira yakuenda kuna Baba kwa anace onsene. ²²Na imwe munadzakhala ana anga, na Ine ndinadzakhala Baba wanu.”

²³Onani—cimphepo ca Baba wathu! Ukali wabuluka, conondo cikulu cakupukuta; cinadzazungulira mbacigwa pa nsolo wa anyakuipa. ²⁴Ukali wakupisa wa Baba wathu nkhabe kudzabwerera nduli mpaka iye amale kucita na kukwanirisa pinafuna ntima wace. Mu ntsiku zinadzabwera imwe munadzabvesesa pyenepi.