ኣቦ ንስድራ ቤቱ ኸም ዝመልሳ ተስፋ ይኣቱ

ንዝመፅእ ትውልዲ ኣብ መፅሓፍ ዝተፅሓፈ ቃላት። እቲ ራዕዲ ናይ ሓቂ እዩ፥ እቲ ቍስሊ ድማ ካብ ኩሉ ሰብኣዊ ፈውሲ ዝሓለፈ እዩ፥ ኮይኑ ግና እቲ ዝወቕዖም ኣቦና ባዕሉ ክፍውሶም፥ ነቲ ኣርዑት ካብ ክሳዶም ክሰብሮ፥ መሊሱ ድማ ኣቦኦም ክኸውን ተመባፂዑ ኣሎ።

ምዕራፍ 30።

እቲ ካብ ኣቦና ናብ ኤርሚያስ ዝመፀ ቃል፦

ኣቦና ናይ እስራኤል ከምዙይ ይብል ኣሎ፦ ኵሉ እቲ ዝተዛረብኩኻ ቃል ኣብ መፅሓፍ ፅሓፎ። እንሆ፥ ኣቦና ይብል ኣሎ፥ ነቲ ምርኮ ህዝበይ እስራኤልን ይሁዳን ዝመልሰሉ መዓልቲታት ይመፅእ ኣሎ፥ ይብል ኣቦና፤ ናብታ ነቦታቶም ዝሃብክዋ ምድሪ ድማ ክመልሶም እየ፥ ንሳቶም ከዓ ክወርስዋ እዮም።

እዚኣቶም እቶም ኣቦና ብዛዕባ እስራኤልን ይሁዳን ዝተዛረቦም ቃላት እዮም፦

ኣቦና ከምዙይ ይብል ኣሎ፦ “ድምፂ ራዕዲ ሰሚዕና፥ ፍርሓት ኣሎ፥ ሰላም ከዓ የለን። ሕዚ ሕተቱ እሞ ርኣዩ፦ ተባዕታይ ድዩ ዝወልድ? ስለምንታይ ደኣ ንነፍሲ ወከፍ ብርቱዕ ሰብኣይ ከም እትሓርስ ሰበይቲ ኣእዳዉ ኣብ ሕቚኡ ዘንበረ፥ ነፍሲ ወከፍ ገፅ ከዓ ዝፀምለወ፥ እርኢ ዘለኹ? እታ መዓልቲ እቲኣ ኽንደይ ዘፍርሕ እያ! ከምኡ ዘሎ የለን። ንያእቆብ ጊዜ ፀበባ እያ፤ ኮይኑ ግና ካብኣ ክድሕን እዩ። በታ መዓልቲ እቲኣ፥ ይብል ኣቦ ሰራዊት ሰማይ፥ ኣርዑት ካብ ክሳድካ ክሰብሮ፥ መእሰሪኻ ድማ ክበጥስ እየ፤ ደቂ ባዕዲ ድማ ደጊም ባሮት ገይሮም ኣይገዝእዎን እዮም። ኣብ ክንድኡ ንኣቦናን ነቲ ኣነ ዘተንስኣሎም ንጉሶም ዳዊትን ከገልግሉ እዮም። ስለዙይ ኣይትፍራሕ፥ ባርያይ ያእቆብ፥ ይብል ኣቦና፥ ኦ እስራኤል ኣይትሸበር ድማ፤ እንሆ፥ ካብ ርሑቕ ከድሕነካ፥ ንደቅኻ ድማ ካብ ምድሪ ምርኮኦም ከድሕኖም እየ እሞ፤ ያእቆብ ናብ ህድኣትን ዕረፍትን ክምለስ እዩ፥ ዘፍርሖ ከዓ ሓደ እኳ ኣይህሉን እዩ። ኣነ ከድሕነካ ምሳኻ እየ እሞ፥ ይብል ኣቦና። ነቶም ኣብ መንጎኦም ፋሕ ዘበልኩኻ ኵሎም ኣህዛብ ፈፂመ እኳ እንተ ኣጥፋእኹዎም፥ ንኣኻ ግና ፈፂመ ኣየጥፍኣካን፤ ብፍትሒ ደኣ ክቐፅዓካ እየ እምበር፥ ፈፂመ ብዘይ ቅፅዓት ኣይሓድገካን እየ።”

ኣቦና ከምዙይ ይብል ኣሎ፦ “ቍስልኻ ዘይሓዊ እዩ፥ መውጋእትኻ ከዓ ብርቱዕ እዩ። ነገርካ ዝማጐተልካ የለን፤ ንቍስልኻ ፈውሲ የለን፥ መሕወዪ ድማ የብልካን። ኵሎም ፈተውትኻ ረሲዖምኻ፥ ብዛዕባኻ ግዲ የብሎምን። ፀላኢ ኸም ዝወቅዕ ጌረ ወቒዐካ እየ፥ ብቕፅዓት ጨካን ሰብ፥ በደልካ ዓብዪ፥ ሓጢኣትካ ድማ ብዙሕ ስለ ዝኾነ። ስለምንታይ ብዛዕባ ቍስልኻ ትጭርሕ ኣለኻ? ቃንዛኻ ዘይሓዊ እዩ። በደልካ ዓብዪ፥ ሓጢኣትካ ድማ ብዙሕ ስለ ዝኾነ፥ እዙይ ገይረልካ ኣለኹ። ስለዙይ ኵሎም እቶም ዝበልዑኻ ክብልዑ እዮም፥ ኵሎም ፀላእትኻ ድማ ነፍሲ ወከፎም ተማሪኾም ክኸዱ እዮም፤ እቶም ዝዘምቱኻ ክዝመቱ እዮም፥ ኵሎም እቶም ዝማርኹኻ ድማ ንምርኮ ኣሕሊፈ ክህቦም እየ።” ጥዕናኻ ክመልሰልካ፥ ቍስልኻ ድማ ከሕውየልካ እየ እሞ፥ ይብል ኣቦና፤ ስዱድ ኢሎም ፀዊዖምኻ እዮም፥ “እዛ ፅዮን እኳ ዝሓትታ የለን” ኢሎም እዮም።

ኣቦና ከምዙይ ይብል ኣሎ፦ “እንሆ፥ ነቲ ምርኮ ድንኳናት ያእቆብ ክመልሶ፥ ንኣባይቱ ድማ ክርህርሀሎም እየ፤ እታ ኸተማ ኣብ ኩምራኣ ክትሃነፅ እያ፥ እቲ ኣዳራሽ ድማ ኣብ ቦታኡ ክቐውም እዩ። ካብኣቶም ምስጋናን ድምፂ ታሕጓስን ክወፅእ እዩ። ከብዝሖም እየ፥ ውሑዳት ከዓ ኣይኮኑን፤ ከኽብሮም እየ፥ ናእሽቱ ከዓ ኣይኮኑን። ደቆም ከም ቀደም ክኾኑ እዮም፥ ጉባኤኦም ድማ ኣብ ቅድመይ ክፀንዕ እዩ፥ ንዅሎም እቶም ዝጨቍኑዎም ድማ ክቐፅዖም እየ። መራሒኦም ካብኣቶም ክኸውን እዩ፥ ገዛእኦም ድማ ካብ ማእኸሎም ክወፅእ እዩ። ኣነ ከዓ ከቕርቦ እየ፥ ንሱውን ናባይ ክቐርብ እዩ፤ እንተ ዘይኮነ፥ ህይወቱ ኣብ ሓደጋ ኣእትዩ ናባይ ክቐርብ ዝደፍር መን እዩ? ይብል ኣቦና። ^a “ንስኻትኩም ውሉደይ ክትኮኑ ኢኹም፥ ኣነ ድማ ኣቦኹም ክኸውን እየ።”

እንሆ፥ ንፋስ ኣውሎ ኣቦና! ቍጥዓ ወፂኡ ኣሎ፥ ዝፀራርግ ህቦብላ፤ ኣብ ርእሲ እቶም ረሲኣን ተዀሊሉ ክወድቕ እዩ። ብርቱዕ ቍጥዓ ኣቦና፥ ሓሳብ ልቡ ክሳዕ ዝገብሮን ዝፍፅሞን ኣይምለስን እዩ። ኣብተን ዝመፃ መዓልቲታት ነዙይ ከተስተውዕልዎ ኢኹም።