Ng'ang'utik Somok che po Kirwooget
Ki ger Amos chereng'endet ak maat, ak ki soom Kwandanyi kong'eny aeng' koinyoiywaat kaat, ak kong'eny aeng' ko yai. Koboorunet ne po somok, porowet, ma kimuuch keterteerta. Kingo ng'at Amaziah ineendet kong'eetee Bethel, ki wol kole ineendet ko aarindet agoi ye ki nam Kwandanyo ineendet.
Ng'alaali Kwandanyo eng' mustarisyek 3, 6, 8–9, 17
7 1Ki uu ni ne ki koboorchan Kwanda ne Toroor: ki chobei chereng'endet che chaang' eng' ye kotoi kobiit rurateet ne igeesunegei—rurateet ne igeesunegei ne kobata keesetap laitoryat. 2Ye kingo kagoibwa koam ingwegap emet, ale, “Kwanda ne Toroor, asoomin inyoiywaat kaat! Imuuchi koton ano Jakobo? Amu ko ming'in miising'!” a a v2 Ye saae maotyot, kogasei Kwandanyo ak kowol kirwooget—muguuldo ne mi toroornatennyi ko riroindo, ma kachamiset ne po kong'em.
3Ki wol Kwandanyo kabwaatutikyik agobo niito. “Ma yaak niito,” kole Kwandanyo.
4Ki uu ni ne ki koboorchan Kwanda ne Toroor: ki guure Kwanda ne Toroor kirwooget eng' maat; koam rirosyek ne oo ak kopeel emet. 5Yeityo ale, “Kwanda ne Toroor, asoomin isiis! Imuuchi koton ano Jakobo? Amu ko ming'in miising'!”
6Ki wol Kwandanyo kabwaatutikyik agobo niito. “Ma yaak niito agine,” kole Kwanda ne Toroor.
7Ki uu ni ne ki koboorchan: ki tonon Kwanda ne Toroor eng' irimeet ne ki teech kolitiit, kotinyei porowet eng' eunnyi. b b v7 Porowet ko sumeek ne tinyei koita ne nyolu, ne temei ngot kotonon irimeet kolitiit—yu ko itoondo ab Kwandanyo ne kwaei ngot ko iman saboondap piikyik.
8Ak koleenjo Kwandanyo, “Igeeri nee, Amos?” Ale, “Porowet.” Yeityo kole Kwanda ne Toroor, “Keero, ande porowet among' piikyuk Israel; ma asiirtoi icheek kogeny agoi.”
9Kong'emaksei kooriigap Isak che mi komoswek che torooreen, ak kong'emaksei oldinwegap Israel che tiliileen, ak ang'eetyee kong'eetya kootap Jeroboam eng' rotweet.
Silem Amaziah Maotyot
10Ki iyookto Amaziah, tisiindetap Bethel, ng'olyoot koit Jeroboam laitoryatap Israel, koleenji: “Kagochaam Amos agaigai inyee eng' kwenutap kootap Israel. Matemenee emet koip ng'aleekyik tugul. 11Ki uu ni ne ki mwa Amos: ‘Kobek Jeroboam eng' rotweet, ak kimut Israel koba iman, kong'eetyee eng' emennyi.’”
12Koleenji Amaziah Amos, “Ui, keerindet! Labat iwe Judah. Cheeng'jigei amitwogik eng' olooto, imaote eng' olooto. 13Ago mat imaote kogeny eng' Bethel, amu ko oldinwetap laitoryat, Hekaluut ne po kaplaitoryat.”
14Kowolji Amos Amaziah, “Ki ma aa maotyot anan weeriitap maotyot, ago ki aa riibotyot ak chiito ne minei taragonik. 15Ago ki imutwaa Kwandanyo eng' isubeetap teekseet, ak koleenjo Kwandanyo, ‘Ui, imaote piikyuk Israel.’ 16Igas nguno ng'olyootap Kwandanyo. Imwae inyee, ‘Mat imaote agaigai Israel, mat iamda agaigai kootap Isak.’
17Ko uu nooto kole Kwandanyo: ‘Koek chweeng'ung' chepkugonio eng' nganaseet, ak kobutyo weeriiguk ak tiibiiguk eng' rotweet, ak kewat emeng'ung' eng' porowet ne kiikwaei, ak ibek inyegei eng' emet ne ng'waan. Ak kimut Israel koba iman, kong'eetyee eng' emennyi.’”