ሰለስተ ራእይ ፍርዲ

ኣሞፅ ኣንበጣን ሓውን ረአየ፥ ክልተ ጊዜ ኣቦኡ ይቕረ ክብል ለመኖ፥ ክልተ ጊዜ ድማ ተነሰሐ። እቲ ሳልሳይ ራእይ፥ መዐቀኒ ገመድ፥ ዝስረዝ ኣይኮነን። ኣማስያ ኻብ ቤቴል ክወፅእ ምስ ኣዘዞ፥ ኣቦና ክሳዕ ዝወስዶ ጓሳ ከም ዝነበረ ኢሉ መለሰ።

ምዕራፍ 7።

ጐይታ ኣቦ ኸምዙይ ኣርኣየኒ፦ እቲ ዳሕረዋይ በቝሊ ክበቍል ምስ ጀመረ፥ ዕስለ ኣንበጣ ይሰርሕ ነበረ፤ እቲ ዳሕረዋይ በቝሊ ኸዓ ድሕሪ ዓፀድ ንጉስ ዝነበረ እዩ። ንበቝሊ እታ ምድሪ በሊዖም ምስ ወድኡ ድማ “ኦ ጐይታ ኣቦ፥ በይዛኻ ይቕረ በል! ያእቆብ ከመይ ኢሉ ደው ክብል ይኽእል? ኣዝዩ ንእሽተይ እዩ እሞ!” በልኩ። ^a

ኣቦና በዙይ ተነሰሐ። “ኣይኸውንን እዩ” በለ ኣቦና።

ጐይታ ኣቦ ኸምዙይ ኣርኣየኒ፦ ጐይታ ኣቦ ብሓዊ ንፍርዲ ፀውዐ፤ ንሱ ኸዓ ነቲ ዓብዪ መዓሙቕ በልዖ፥ ነታ ምድሪ ኸዓ ይበልዕ ነበረ። ሽዑ ድማ “ኦ ጐይታ ኣቦ፥ በይዛኻ ደው በል! ያእቆብ ከመይ ኢሉ ደው ክብል ይኽእል? ኣዝዩ ንእሽተይ እዩ እሞ!” በልኩ።

ኣቦና በዙይ ተነሰሐ። “እዝውን ኣይኸውንን እዩ” በለ ጐይታ ኣቦ።

ንሱ ኸምዙይ ኣርኣየኒ፦ ጐይታ ኣቦ፥ መዐቀኒ ገመድ ኣብ ኢዱ ሒዙ፥ ኣብ ጥቓ ቐጥ ኢሉ ዝተነድቀ መንደቕ ደው ኢሉ ነበረ። ^b

ኣቦና ድማ “ኦ ኣሞፅ፥ እንታይ ትርኢ ኣለኻ?” በለኒ። ኣነ ኸዓ “መዐቀኒ ገመድ” በልኩ። ሽዑ ጐይታ ኣቦ “እንሆ፥ ኣብ ማእኸል ህዝበይ እስራኤል መዐቀኒ ገመድ ኣንብር ኣለኹ፤ ደጊም ከቶ ኣይሓልፎምን እየ” በለ።

መስገዲ ቦታታት ይስሓቅ ክባድማ እየን፥ መቕደሳት እስራኤል ድማ ክፈርሳ እየን፤ ኣብ ልዕሊ ቤት ኢዮርብዓም ድማ ብሰይፊ ክትስእ እየ።

ኣማስያ ነቲ ነቢይ የፅምሞ

ካህን ቤቴል ኣማስያ ድማ ናብ ኢዮርብዓም ንጉስ እስራኤል ከምዙይ ኢሉ ለኣኸ፦ “ኣሞፅ ኣብ ውሽጢ ቤት እስራኤል ኣባኻ ተመሳጠረ፤ እታ ምድሪ ንዅሉ ቃላቱ ክትፆሮ ኣይትኽእልን እያ። ኣሞፅ ከምዙይ ይብል ኣሎ እሞ፦ ‘ኢዮርብዓም ብሰይፊ ክመውት እዩ፥ እስራኤል ድማ ካብ ምድሩ ተማሪኹ ብርግፅ ናብ ምርኮ ክኸይድ እዩ።’ ”

ኣማስያ ድማ ንኣሞፅ “ኪድ፥ ኦ ረኣዪ! ናብ ይሁዳ ህደም፤ ኣብኡ እንጀራኻ ብላዕ፥ ኣብኡ ተነበ። ኣብ ቤቴል ግና ደጊም ከቶ ኣይትነበ፤ ናይ ንጉስ መቕደስ፥ ናይ መንግስቲ ቤተ መቕደስ እዩ እሞ።”

ኣሞፅ ድማ ንኣማስያ ኢሉ መለሰሉ፦ “ኣነ ጓሳን ሳግላ ዘልምዕን ደኣ እየ ነይረ እምበር፥ ነቢይ ኮነ ወዲ ነቢይ ኣይነበርኩን። ኣቦና ግና ካብ ምስዓብ መጓሰ ወሰደኒ፤ ኣቦና ድማ ‘ኪድ፥ ንህዝበይ እስራኤል ተነበ’ በለኒ። ሕዚ ድማ ቃል ኣቦና ስማዕ። ንስኻ ‘ኣብ ልዕሊ እስራኤል ኣይትነበ፥ ኣብ ልዕሊ ቤት ይስሓቅ ኣይትስበኽ’ ትብል ኣለኻ።

ስለዙይ ኣቦና ከምዙይ ይብል ኣሎ፦ ‘ሰበይትኻ ኣብ ከተማ ኣመንዝራ ክትከውን እያ፤ ኣወዳትካን ኣጓላትካን ብሰይፊ ክወድቁ እዮም፤ ምድርኻ ብመዐቀኒ ገመድ ክትመቓቐል እያ፤ ንስኻ ባዕልኻ ኸዓ ኣብ ርኽስቲ ምድሪ ክትመውት ኢኻ፤ እስራኤል ድማ ካብ ምድሩ ተማሪኹ ብርግፅ ናብ ምርኮ ክኸይድ እዩ።’ ”