Shongzā 27

27 ¹"Nathumna hanphut chi acaciathing eina sākhuira: asān khuining phangā, aret khuining phangā, asān-aret ngaraichāda, kala kachui khuining kathumna. ²Nana chiwui achithek matili angaji mati sāsangra, angaji chi asā akha ngasakra; kala chi pithrai eina heirorra. ³Chiwui hotlā khuithui khavai hamnao, meiyaikhong, khongsai, marik-kapei, kala khāng sākhuira; chiwui khorkhong saikora pithrai eina sākhuira. ⁴Chiwui vang komkhavai yākrei, pithrai khalen sākhuira; khalen chili achithek matili pithrai akhui mati sāsangra. ⁵Khalen chi hanphutwui ngahunshingli tāshung khavai, chi hanphut akongnā azingli haira. ⁶Hanphut chiwui vang acaciathing eina thingphān sākhuilaga chi pithrai eina heirorra. ⁷Chi ngava̱ khavai, thingphān chi hanphutwui arāp khaninili khalei akhui chili ruisangra. ⁸Chi chikhai eina sāda alung masai ngasakra; kaphungli nali chithei kahai athishurda, chithāda athumna sāra.

Yāngkhup

⁹"Tabernaclewui yāngkhup sākhuira; azingshongwui vang manakta hākakhui kazaira̱ eina kasā chonsā chonrān, arāp chiwui asān khuining shākha sānga. ¹⁰Pākra̱ maga̱ kala pithrai eina kasā aphei maga̱ leira; pākra̱wui hokkhui khavai kala masa̱ khavai chi lupāsā eina sāra. ¹¹Atungshongwui chonrān asān khuining shākha, pākra̱ maga̱, pithrai eina kasā aphei maga̱, kala pākra̱wui hokkhui khavai kala masa̱ khavai chi lupāsāna. ¹²Yāngkhupwui zingtunshong aretwui vang chonrān asān khuining hangphangā, pākra̱ tharā kala aphei tharā leira. ¹³Zingshoshong mangāwui vang yāngkhupwui aret khuining hangphangāna. ¹⁴Ngavei arāp akhavākwui vang rānkhavai chonrān khuining tharāda phangā, pākra̱ kathum kala aphei kathum leira. ¹⁵Lākhashongla rānkhavai chonrān khuining tharāda phangā, pākra̱ kathum, aphei kathum leira. ¹⁶Yāngkhupwui ngaveiwui chonrān chi asān khuining maga̱, khamayinga, hungrisi, hungshi kahai kala manakta hākakhui kazaira̱ eina kasā chonsā eina, kapim eina aphor yekkasanga; chiwui pākra̱ mati kala aphei matina. ¹⁷Yāngkhup kuimareida khalei pākra̱ saikora lupāsā eina masa̱khui khavai sāra; chiwui hokkhui khavai lupāsāna, kala aphei chi pithraina. ¹⁸Yāngkhup chiwui asān khuining shākha, aret khuining hangphangā peichaoda, kala kajui khuining phangā ngasāra; chi manakta hākakhui kazaira̱ chonsā eina sāda apheibing chi pithrai eina sāra. ¹⁹Tabernaclewui thongthāng saikora, chiwui otram saikorali, kala chiwui thingshun saikora, kala yāngkhupwui thingshun saikora pithrai eina sāsera.

Machatlakla Leishon Kaji Thaomeiwui Vang Thao

²⁰"Thaomei chi matam khavaili shārda leikhavai, kahorwui vang shungkakhui kashenga olive thao chi naphaoli khuirāmi khavai Israelnaobingli kasolu. ²¹Kazip khavai kachonshimli, ningkhami oko haikhavai mairār ayarli, Aaron eina anaomayarabingna ngazin eina ngathor eina tangda ithumwui Avāwui mangāli thaomei chi ngachamda haira. Hi Israelnaobingwui vang athumwui thot-thot vāshungda mayonki kaji shiyan-chikanna." ^a a v21 'Ningkhami' china, kadharawui oko alungli haikahai ainwui lung chapbing chi kahāngna.