Mi eng' bukuit

Komong'u 27 FHB Father's Heart Bible™

Kiistoi 15% eng' kiy ne iale korook →
Bukuit

Kaptisisyet ne po Sugunwet

Kaptisisyet ne po sugunwet ne tinyei kong'iik kotonon eng' seremut ne kigeer angook che po katanit ne karaaran eng' lumeiywek che kigol fedha, komosta ne tinyei kurgeet agenge, ole kogeere kagoochinosyek. Koonu Israel mwaniitap zeituni ne kibil si koriip Aron ak weeriikyik taachat koleel kobooch kemeut agoi mornet.

Ng'alaali Kwandanyo eng' mustarisyek 1–21

Sura 27.

“Iyae kaptisisyet eng' keetiigap chebitoik: ingoek koindonyi mitainik tisap ak kebeber, ak tebeesindanyi mitainik tisap ak kebeber, ingoaechin koindonyi ak tebeesindanyi, ak ingoek tononennyi mitainik ang'wan ak kebeber. Iyae kuinoik eng' luukwekyik ang'wan, kuinoik che namgei ak ineendet; iliige sugunwet. Iyae tereenik che kirame oreekyik, kechigosyek, taabook che mengeechen, kariik che sogotiin, ak taabook che ki ibe maat; itaany tuguukyik tugul eng' sugunwet. Iyachi kioto ne kireger, regereiywot ne po sugunwet; ak eng' regereiywot iyae peteinik ang'wan che po sugunwet eng' luukwekyik ang'wan. Inde eng' kapkelyenutap mireiywotap kaptisisyet, si komuurmuur regereiywot, kot koit kebebertap kaptisisyet. Iyachi kaptisisyet keetiik che ki ibe, keetiigap chebitoik, ak iliige sugunwet. Irooch keetiik peteinik, eng' komoswegap kaptisisyet aeng', si keibe ineendet. Iyae koek moinget oriit, ak pagoinik, ko uu ye ki kiboorun inyee eng' tulweet; ingoyai icheek ko uu nooto.

Seremut

“Iyae seremutap emaitap Kamuktaindet: angook che po katanit ne karaaran ne ki kileet eng' murot tai, koindonyi mitainik artam ak ang'wan eng' murot nooto. Lumeiywek tiptem ak kong'iik tiptem che po sugunwet; ireusyegap lumeiywek ak rateiywekwak, che po fedha. Ko uu nooto eng' murot kaataam, angook che koindonyi mitainik artam ak ang'wan, ak lumeiywek tiptem, kong'iik tiptem che po sugunwet, ak ireusyek ak rateiywek che po fedha che po lumeiywek. Eng' tebeesindap seremut ne tokyingei cherongo: angook che yamei mitainik tiptem ak aeng', lumeiywek taman, kong'iik taman. Tebeesindap seremut eng' komostap kong'asiis, ole po kong'asiis, ko mitainik tiptem ak aeng'. Angook eng' murot agenge ne po kurgeet: mitainik tiptem ak aeng' ak kebeber, ak lumeiywek somok ak kong'iik somok. Eng' murot age, angook che mitainik tiptem ak aeng' ak kebeber, lumeiywek somok, kong'iik somok. Angeet ne po kurgeetap seremut: mitainik sogool, che buluu, che arusen ne piriir, ak che piriireen kobooto katanit ne karaaran ne ki kileet, poisyetap chiito ne nabei kondai lelesta, ak lumeiywek ang'wan ak kong'iik ang'wan. Lumeiywek tugul che yiemei seremut: kituiye fedha rateiywekwak, ireusyekwak che po fedha, kong'iikwak che po sugunwet. Seremut: koindonyi mitainik artam ak ang'wan, tebeesindanyi mitainik tiptem ak aeng' eng' tugul, tononennyi mitainik tisap ak kebeber—katanit ne karaaran ne ki kileet, kong'iik che po sugunwet. Tuguuk tugul che po emaitap Kamuktaindet, eng' poisyennywa tugul, ak tigongenikyik tugul, ak tigongenigap seremut—che po sugunwet tugul.

Mwaita ne po Tait ne Lalei Kotugul

“Ng'at piigap Israel si koguchin inyee mwaita ne tiliil ne kituei ne po mseituni, koek lapkeiyet, si koriip tait kolal kotugul. Eng' emait ne kituiyechin, eng' saang'utap angeet ne mi taitap Neetunet, ingochobei Aron ak weeriikyik eng' koskoleny kot mornet eng' taitap Kwandanyo—ng'atuutyet ne po koigeny eng' ibinwekwak, agobo piigap Israel.” a a v21 'Neetunet' ko boorunei taarisyek che po koikwek che po ng'atutyet, che ki kirip oriitap Sandukutap Arorutyet.