Chinamei Kümbü Lemshang
Laang kibü chinameibü lemshang kho khongmanga ngaida, thangtet nei hoba chandinameibü yuklep thaonyu shuongei kailepan, yungkük che kibü kishang, khünei lembü shuong hapla thükbü. Israelei bamangbü oliv onang sungan, Aron hoba haoeibü shousi shuongei chasem kaje ngeyang sühko wanthung longtikushi.
27 1“Nyi lemshang kho akasia buei kümashi; tousüng iknop ngao, hoba khaang iknop ngao, chemnyek lei aenei jeteitei, hoba suokla iknop sem. 2Khoeibü chemnyek lei aenei laang kümashi; laang shuong kho khüto jeteitei ong yinglabü; hoba khonei chinamei khanglepashi. 3Khoeibü tap apla shanga chak, suokjin, phau, pheyaüjin, hoba wankak kipjin kümashi; khoeibü peisilei pendou kho chinamei kümashi. 4Khoeibü shanga chinameibü hinseibü che kümashi; hinseibü thüka khoeibü chemnyek lei aenei chinameibü chikom lei kümashi. 5Hinseibü kho lemshang lom sühko longla shanga, kho lemshang chakshon phanga phoashi. 6Lemshang shanga kaang, akasia buei kaang kümashi, hoba khonei chinamei khanglepashi. 7Kho lengla shanga lemshang jiji penyi napheinei chikom khonei kaang shuong jinashi. 8Kho shempheiei kuokjung adan kümashi; ka la shongha lenbü phatko, haoenei kho tegü kümjan.
Khongmang
9“Lemshang neichem khongmang kümashi; chaa aenei khongmang thangtet kho shenbü phembanei maibüei, kho phei shanga iknop saongao süng kilabü. 10Khübü kho thaonyu saoche, hoba chinameibü yuklep thaonyu saoche kilabü; chandinameibü khübü juetbü hoba kaithetbü yaükabü kilabü. 11Yungkük ae ham thangtet iknop saongao süng, thaonyu saoche, chinameibü yukleplabü saoche, hoba thaonyu shanga chandinamei juetbü hoba kaithetbü kilabü. 12Khongmang chanep aenei khaang shanga thangtet iknop anjinsem süng, thaonyu an, hoba yukleplabü an kilabü. 13Chaangbou aenei chanyu longshang ae, khongmang khaang kho iknop anjinsem kilabü. 14Koukhün jipheinei thangtet kho iknop anthükngao, thaonyu sem hoba yukleplabü sem kilabü. 15Jiphei lubüa thangtet kho iknop anthükngao, thaonyu sem hoba yukleplabü sem kilabü. 16Khongmang koukhün shanga thangjin kho iknop saoche, pilaü, nakthüngan sakbü, saklangbü hoba shenbü phembanei maibüei noksa jinan kümbü, hoba thaonyu lei hoba yukleplabü lei kilabü. 17Khongmang kaijembo thaonyu pendou kho chandinamei kaingaibü, haoeneibü juetbü chandinam, hoba yukleplabü chinam kilabü. 18Khongmang kho süng iknop saongao, hoba khaang kho jembü pendoua iknop anjinsem, hoba suokla iknop ngao kikei; shenbü phembanei maibüei kümbü, hoba hanleplabü kho chinam kikei. 19Lemshang neichem shanga peisilei pendou, khübü ai kümsilei shangabü ong, hoba khübü jaangbü pendou, hoba khongmang jaangbü pendou kho chinamei kümbü kikei.
Athakko Longbü Wanthung shanga Onang
20“Athakko wanthung jiktian phola shanga, ngesakbü shanga lanbü oliv onang nitbü ka jungto sungbatila Israel shousi shuong to sakkushi. 21Kamshang neichema, ngühkhüm thedanga kibü thangtet thüka, Aron si haoeibü shousi shuongei kho chasem ka ngeyang sühko seneibü Bou thedanga jiktian phokulabü; Israel shousi shuong shanga haoen meten sünga ho ponpen shanga ngühkhüm che kilabü.” a a v21 ‘Ngühkhüm’ dogo laubü ho kho theyolanyobü Busen maanga küpjeman phobü langkei lung lai shuong shangabü ki.
