ዘፀአት 27

27 ¹“መሠዊያውን ከግራር እንጨት ሥራ፤ ርዝመቱ ሰባት ጫማ ተኩል፣ ስፋቱ ሰባት ጫማ ተኩል ይሁን፤ አራት ማዕዘን ይኑረው፤ ቁመቱም አራት ጫማ ተኩል ይሁን። ²በአራቱ ማዕዘኖቹ ላይ ቀንዶች ሥራ፤ ቀንዶቹም ከእርሱ ጋር አንድ ወጥ ይሁኑ፤ በናስም ለብጠው። ³አመዱን ለማንሣት ማሰሮዎች፣ መጫሪያዎች፣ ገንዳዎች፣ ሹካዎችና የእሳት መቅጃዎች ሥራ፤ ዕቃዎቹንም ሁሉ ከናስ አድርግ። ⁴ለእርሱም የናስ መርበብ የሆነ ፍርግርግ ሥራ፤ በመርበቡም በአራቱ ማዕዘኖቹ ላይ አራት የናስ ቀለበቶች አድርግ። ⁵መርበቡ እስከ መሠዊያው እኩሌታ እንዲደርስ፣ ከመሠዊያው ጠርዝ በታች አኑረው። ⁶ለመሠዊያው መሎጊያዎች፣ ከግራር እንጨት የሆኑ መሎጊያዎች ሥራ፤ በናስም ለብጣቸው። ⁷መሠዊያውን ለመሸከም መሎጊያዎቹ በሁለቱ ጐኖቹ ባሉት ቀለበቶች ውስጥ ይገቡ። ⁸በተራራ ላይ እንደ ተገለጠልህ፣ በሰሌዳዎች ውስጡ ባዶ አድርገህ ሥራው፤ እንደዚሁ ይሥሩት።

አደባባዩ

⁹“የማደሪያውን ድንኳን አደባባይ ሥራ፤ በደቡብ በኩል በጥሩ ጥምዝ በፍታ የተሠሩ መጋረጃዎች ይኑሩ፤ ለዚያ ወገንም ርዝመታቸው አንድ መቶ አምሳ ጫማ ያህል ይሁን። ¹⁰ሃያ ምሰሶዎችና ሃያ የናስ መቀመጫዎች ይኑሩት፤ የምሰሶዎቹ መንጠቆዎችና ማሰሪያዎች ከብር ይሁኑ። ¹¹እንደዚሁም በሰሜን በኩል ርዝመታቸው አንድ መቶ አምሳ ጫማ የሆኑ መጋረጃዎች ይኑሩ፤ ከሃያ ምሰሶዎች፣ ከሃያ የናስ መቀመጫዎችና ለምሰሶዎቹ ከብር መንጠቆዎችና ማሰሪያዎች ጋር ይሁኑ። ¹²ለአደባባዩ የምዕራብ ስፋት፦ ርዝመታቸው ሰባ አምስት ጫማ የሆኑ መጋረጃዎች፣ ዐሥር ምሰሶዎችና ዐሥር መቀመጫዎች ይሁኑ። ¹³በምሥራቅ በኩል ወደ ፀሓይ መውጫ ያለው የአደባባዩ ስፋት ሰባ አምስት ጫማ ያህል ነው። ¹⁴ለበሩ አንደኛው ወገን መጋረጃዎች ሃያ ሁለት ጫማ ተኩል ያህል ይሁኑ፤ ከሦስት ምሰሶዎችና ከሦስት መቀመጫዎች ጋር ይሁኑ። ¹⁵በሌላኛውም ወገን መጋረጃዎች ሃያ ሁለት ጫማ ተኩል፣ ሦስት ምሰሶዎችና ሦስት መቀመጫዎች ይሁኑ። ¹⁶የአደባባዩ በር መጋረጃ፦ ሠላሳ ጫማ ይሁን፤ ከሰማያዊ፣ ከሐምራዊና ከቀይ ክር በጥሩ ጥምዝ በፍታ የተጠለፈ ይሁን፤ ከአራት ምሰሶዎችና ከአራት መቀመጫዎች ጋር ይሁን። ¹⁷በአደባባዩ ዙሪያ ያሉት ምሰሶዎች ሁሉ በብር የታሰሩ ይሁኑ፤ መንጠቆዎቻቸው ከብር፣ መቀመጫዎቻቸውም ከናስ ይሁኑ። ¹⁸አደባባዩ፦ ርዝመቱ አንድ መቶ አምሳ ጫማ ያህል፣ በሁሉም ስፍራ ስፋቱ ሰባ አምስት ጫማ፣ ቁመቱም ሰባት ጫማ ተኩል ይሁን፤ ከጥሩ ጥምዝ በፍታ የተሠራ፣ መቀመጫዎቹም ከናስ ይሁኑ። ¹⁹ለማደሪያው ድንኳን አገልግሎት የሚውሉት ዕቃዎች ሁሉ፣ ለማንኛውም ሥራ የሚውሉ፣ ችካሎቹ ሁሉና የአደባባዩ ችካሎች ሁሉ ከናስ ይሁኑ።

ዘወትር ለሚነድ መብራት የሚሆን ዘይት

²⁰“ዘወትር መብራት እንዲነድ፣ ለብርሃኑ የሚሆን ጥሩና የተወቀጠ የወይራ ዘይት እንዲያመጡልህ እስራኤላውያንን እዘዛቸው። ²¹በመገናኛው ድንኳን ውስጥ፣ በምስክሩ ፊት ካለው መጋረጃ ውጭ፣ አሮንና ልጆቹ ከማታ እስከ ጥዋት በአባታችን ፊት ያዘጋጁት፤ ይህም ስለ እስራኤላውያን ለልጅ ልጆቻቸው የዘላለም ሥርዐት ይሁን።” ^a a v21 “ምስክሩ” የሚለው በቃል ኪዳኑ ታቦት ውስጥ የተቀመጡትን የሕግ ጽላቶች ያመለክታል።