出埃及記 27

27 ¹「你要用皂莢木做祭壇:長七呎半,闊七呎半,係四方嘅,高四呎半。 ²喺祭壇四角做四隻角,角同祭壇要係一整塊;要用銅包住個祭壇。 ³又要做收灰嘅盆、鏟、盤、肉叉同火盆;所有器具都要用銅做。 ⁴要為祭壇做一個銅網;喺網嘅四角做四個銅環。 ⁵將個網安喺祭壇下面嘅圍邊底下,使個網去到祭壇一半嘅高度。 ⁶要為祭壇做槓,用皂莢木做,又用銅包住。 ⁷要將槓穿過個環,槓就喺祭壇兩邊,用嚟抬佢。 ⁸要用木板做成中空嘅祭壇;要照住喺山上指示你嘅樣式去做。

院子

⁹「你要做會幕嘅院子:南邊嘅帷子要用撚成嘅細麻做,呢一邊長約一百五十呎。 ¹⁰帷子要有二十條柱,二十個銅座;柱上嘅鈎同箍都要用銀做。 ¹¹北邊都一樣,帷子長一百五十呎,有二十條柱,二十個銅座,柱上嘅鈎同箍都要用銀做。 ¹²院子西邊嘅闊度:帷子長七十五呎,有十條柱,十個座。 ¹³院子東邊,向住日出嗰邊,闊約七十五呎。 ¹⁴門口一邊嘅帷子:約二十二呎半,有三條柱,三個座。 ¹⁵另一邊嘅帷子:二十二呎半,有三條柱,三個座。 ¹⁶院子門口嘅簾:三十呎,要用藍色、紫色、朱紅色嘅線同撚成嘅細麻,以刺繡做成,有四條柱,四個座。 ¹⁷院子四圍所有嘅柱都要用銀箍箍住,鈎係銀嘅,座係銅嘅。 ¹⁸院子:長約一百五十呎,通處闊七十五呎,高七呎半——要用撚成嘅細麻,座係銅嘅。 ¹⁹會幕一切嘅器具,無論係做乜嘢用嘅,連同會幕所有嘅橛同院子嘅橛,都要用銅做。

長明燈嘅油

²⁰「你要吩咐以色列人,將搾出嚟嘅純清橄欖油攞畀你點燈,使燈常常點住。 ²¹ 喺會幕入面,喺法櫃前面嘅幔子外邊,亞倫同佢啲仔要喺我哋嘅父面前,由晚到朝睇住盞燈。呢個係以色列人世世代代永遠嘅定例。」 ^a a v21 「法」係指存放喺約櫃入面刻住律法嘅石版。