Yongmenyin Tenladak
Tekolak den yongmenyin tenladak ka kinük pezüsülen nung noktak, kinük pezüsülenji teyindangba sü silep juiba tongshi nung tongshiba menja; ait kati ka den tenem, tenlatem angutsü mapang. Israeli tiplena adokba oliv tsük agütsü, anungji Aron aser par jabasotemi kishi nungi nikongdang anepdang tashi milen tendang.
27 1“Nai akashia süng agi tenladak ka yangluang; ibaji kinük pezüsülen kasasa, metong nungji süklep pungu, aser lenten nungjia süklep pungu; aser iba touchiji süklep asem asütsüla. 2Kinük pezüsülenji tezü ka ka yangluang, tezütemji iba sabang denji ka dang asütsü; aser idakji yongmenyin yanglokang. 3Iba aut endoktsü asoshi chipo, tateptsü, susa, shijok aser mijepru yangluang; iba osettsüset ajakji yongmenyin agi yanglutsüla. 4Iba asoshi yongmenyin menja ka yangluang; menja manung iba kinük pezüsülenji yongmenyin tayi pezü yangluang. 5Menja aji tenladak tom ka tashi atongtsü asoshi, aji tenladak satem telunglen ayutsüla. 6Tenladak asoshi süngra, akashia süng agi süngra yangluang, aser idakji yongmenyin yanglokang. 7Aji abentsü asoshi, tenladak tetsünglen ana tayi nungji süngra enokang. 8Aji süngtsük agi küroka yangluang; ne dang tenem nung sayuba ama, parnoki aji yanglutsüla.
Kima
9“Tekülemdak süki kima yangluang: anüolentip tsütsü temechiba kümpa sü tajung agi teyindangba sü, aji tip asoshi süklep noklang ka mesanga ayutsüla. 10Tongshi metsü den yongmenyin tesembangtsü metsü; tongshi jui aser tenaidangbaji taribi alitsü. 11Yamaji anüdoklentip tsütsü, teyindangba sü süklep noklang ka mesanga, tongshi metsü, yongmenyin tesembangtsü metsü, aser tongshi asoshi taribi jui aser tenaidangba alitsü. 12Kima anüolen tsütsü lenten asoshi: teyindangba sü süklep tenem mesanga, tongshi ter, aser tesembangtsü ter. 13Kima anüdoklen tsütsü, anü adok leni, lentenji süklep tenem alitsü. 14Kikümbang külen ka tsütsü teyindangba sü süklep terpungu, tongshi asem, aser tesembangtsü asem. 15Tanga tip tsütsüji teyindangba sü süklep terpungu, tongshi asem den tesembangtsü asem alitsü. 16Kima kikümbang asoshi tetongdangba: süklep metsü, anüng sentsü, nakrema meremba, tezüng sü temerem aser temechiba kümpa sü tajung agi noksa enoka mechiba, tongshi pezü aser tesembangtsü pezü den. 17Kima meketa tongshi ajakji taribi agi naitepa, jui taribi, aser tesembangtsü yongmenyin alitsü. 18Kimaji metong nung süklep noklang ka, lenten nung süklep tenem, aser touchi nung süklep pungu—temechiba kümpa sü tajung, yongmenyin tesembangtsü. 19Tekülemdak süki osettsüset ajak, iba mapa ajak nung amshiba, iba tasongtsü ajak, aser kima tasongtsü—ajakji yongmenyin agi yangluba alitsü.
Teti Tsükloka aliba Milen asoshi Totzü
20“Milen asoshi temenüngzükba oliv totzü tajungtiba ne nem bener arung ta Israel nunger nem melaang, angji milenji teti tsükloka alitsü. 21Sentep süki nung, Ozüng madang teyindangba sü temalen, Aron aser pa jabasotemi aji nikongdang nungi anepdang tashi Tebu madang tendangtsü—Israel nunger indang, parnok putu ajak nung teti ozüng ka alitsü.” a a v21 ‘Ozüng’ ta aji Tezüngzüktepba Süngden telung nung ayuba ozüng lung tapaktem jembir.