Kiguure Aron ak Weeriikyik Korubat
Ngoroigap tisiindet che kiyai eng' toroornatet ak korooronindo, ak che kiip piik: kainaik taman ak aeng' che po Israel che kisir eng' koigap tegisto che kiguure soam, ak ortinwek taman ak aeng' che po koik eng' pireneet, ne kila eng' moetap Aron ye chuut. Eng' taiyeennyi naaryeet ne po thahabu ne sire kole, Tiliilit ne po Kwanda.
Ng'alaali Kwandanyo eng' mustarisyek 1–43
28 1“Imut tupcheng'ung' Aron kolabat inyee, kobooto weeriikyik, kobunu kwenutap piigap Israel, si koegu tisiigenyu: Aron, Nadap, Abiu, Eleazar ak Ithamar. Chu ko weeriigap Aron. 2Yachi Aron tupcheng'ung' ngoroik che tiliileen, che po toroornatet ak korooronindo. 3Ng'alalchin piik tugul che tinye ng'omnateet, che kang'onyi sabeetap ng'omnateet, si koyai ngoroigap Aron si kitabaan ineendet, si koek tisiinyu. 4Chu ko ngoroik che keyae: ngoryeetap tegeet, ephod, ngoryeet ne kiroochegei, ngoryeet ne kooi ne kila, naaryeet, ak pireneet. Keyachi tupcheng'ung' Aron ak weeriikyik ngoroichu che tiliileen, si koegu tisiigenyu. 5Keboisyee thahabu, ak che buluu, che arusen ne piriir, che piriireen, ak katanit ne karaaran.
Ephod
6“Yai ephod eng' thahabu, che buluu, che arusen ne piriir, che piriireen, ak katanit ne ki kileet, poisyetap musogindet ne ng'oom. 7Ingotinye kebeberwegap tigigoik aeng', che ki kiropchin eng' luukwekyik aeng', ne kituiyo tugul. 8Pireneet ne po kerme ne mi kioto ingonyoljin ak ineendet: thahabu, che buluu, che arusen ne piriir, che piriireen, ak katanit ne ki kileet, ne ki kiyai koek agenge. 9Nam koik aeng' che kiguure soam, ak isirchi kainaigap piigap Israel. 10Kainaik lo eng' koita agenge, ak lo alak eng' koita ne po aeng', ko uu ortinwegap sigeet nywa. 11Ko uu ye sirei kitang'indet ng'ookset, isirchi koik aeng' kainaigap piigap Israel, yeityo inde koik kelongonigap thahabu che ki kitogul. 12Konde koik aeng' tuguuk kebeberwegap tigigoigap ephod, koek koigap kabwaatet che po piigap Israel; koibei Aron kainaikwak eng' taitanyu eng' tigigoikyik aeng' koek kabwaatet. 13Yai morik che po thahabu che ki kitogul, 14ak sirimwek aeng' che po thahabu che tiliileen, che ki kilet ko uu rogoonik; ak iriikyi sirimwek che ki kilet morichooto.
Ngoryeetap Tegeet
15“Yai ngoryeetap tegeet ne po kiruok: poisyetap musoknateet, ne ki kiyai ko uu poisyetap ephod—thahabu, che buluu, che arusen ne piriir, che piriireen, ak katanit ne ki kileet. 16Ingoaechin tebeesindo ak koindo, ak kiliich koek aeng', olo po sendimita tiptem ak aeng' eng' koindo ak olo po sendimita tiptem ak aeng' eng' tebeesindo. 17Itet kioto ortinwek ang'wan che po koik. Ooreet ne po tai ingoek sardio, topasio, ak berulo; 18ooreet ne po aeng' ingoek sumaragdo, sapphire, ak yaholom; 19ooreet ne po somok ingoek huakinto, sebu, ak ametusto; 20ak ooreet ne po ang'wan ingoek berulo, soam, ak jasipi. Keroogot koik kelongonigap thahabu che ki kitogul. 21Koik taman ak aeng', age tugul kainetap piigap Israel—kisirchi koita age tugul kainennyi ko uu waetap ng'ookset, kobee ortinwek taman ak aeng' che po piigap Israel. 22Napchi ngoryeetap tegeet sirimwek che po thahabu che tiliileen, che ki kilet ko uu rogoonik. 23Yachi ngoryeetap tegeet peteinik aeng' che po thahabu, ak iriikyi peteinik aeng' luukwekyik aeng'. 24Yeityo iriikyi sirimwek aeng' che po thahabu peteinik aeng' che mi luukwegap ngoryeetap tegeet. 25Nam komoswek aeng' alak che po sirimwek, iriikyi morik aeng' che ki kitogul, yeityo ituiye ak kebeberwegap tigigoigap ephod eng' ole tabanu tai. 26Yai peteinik aeng' che po thahabu; konde luukwek aeng' che po ngoryeetap tegeet, eng' luuta ne mi kween ole neegitee ephod. 27Yai kogeny peteinik aeng' che po thahabu ak inapchi kebeberwegap tigigoigap ephod aeng' eng' ole po keel, ole tabanu tai eng' ole neegitee ye kituiye, eng' paragutap pireneet ne po ephod. 28Keratyi ngoryeetap tegeet peteinikyik koek konyolji peteinigap ephod eng' rogoet ne buluu, si kobiit kotebee eng' paragutap pirenetap ephod, ak si ma koruech kong'etee ephod. 29Koibei Aron kainaigap piigap Israel eng' muguleldanyi eng' ngoryeetap tegeet ne po kiruok ye chut olo tiliil, koek kabwaatet ne po kotugul eng' taitanyu. 30Konde ngoryeetap tegeet ne po kiruok Urim ak Tumim, si kotebee eng' muguleldap Aron ye chut taitanyu. Koibei Aron kiruogap piigap Israel eng' muguleldanyi eng' taitanyu koigeny. a a v30 Urim ak Tumim ko ki tuguuk che tiliileen che ki ibe tisiindet ne oo eng' ngoryeetap tegeet, si konai alenetap Kwandanyo che po piikyik.
Ngoryeet ak Komostap Thahabu
31“Nap ngoryeet ne po ephod, ne buluu konyalilit. 32Ingotinye kakwautyet ole chutei metit eng' kwenunnyi, ak kigurman kong'ata ne kila ko uu ngoryeetap lugeet, si ma kereer. 33Napchi tabandap keel logoek che buluu, che arusen ne piriir, ak che piriireen, ak cheptingilook che po thahabu koyiem. 34Cheptingilyetap thahabu ak logoiyat, cheptingilyetap thahabu ak logoiyat, eng' tabandap keel po ngoryeet komugul. 35Ingolaach Aron ye poisyei. Kegas kergeennyi ye chut ak ye mang'u eng' olo tiliil eng' taitanyu, si ma kome.
36“Yai komostap thahabu che tiliileen; isir kong'ata ko uu waetap ng'ookset kole, ‘Tiliil eng' Kwanda.’ 37Iriikyi eng' naaryeet eng' rogoet ne buluu, ole tabanu tai eng' naaryeet. 38Ingotebee togetap Aron; koibei ineendet ngeleldap tuguuk che tiliileen che tabaan piigap Israel koek kaautisyekwak che tiliileen. Ingotebee togeennyi kot koigeny, si kochamin eng' taitanyu. 39Nap ngoryeet ne kooi ne po katanit ne karaaran, iyai naaryeet ne po katanit ne karaaran, ak iyai pireneet, poisyetap nabiindet ne ng'oom. 40Yachi weeriigap Aron ngoroik che kooen, pirenaik, ak chepkuloik, che po toroornatet ak korooronindo. 41Ilaakyi Aron tupcheng'ung' ak weeriikyik che mi ak ineendet, ilse icheek, itabaan icheek, itoroorchi icheek, si koboisyeiwo koek tisiik. 42Yachi icheek sulwalisyek che po katanit, si kotuch borwekwak che aach ngor, che koit kobunu kounda agoi keel. 43Ingolaach Aron ak weeriikyik chooto ye chut emait ne kituiyechin, anan ye neegitee kaptisisyet si koboisyee eng' ole tiliil, si matiny lelutyet ak kome. Niito ng'atuutyet ne po agoi eng' ineendet ak logoekyik che isubu ineendet.”