Shongzā 28

28 ¹"Athumna pāngmon sāda ili otram ngatha̱mi khavai, nawui achinā Aaron kala anaomayarabing Nadab, Abihu, Eleazar, Ithamarli Israelnaobingwui ngachaili eina nawui nganaili hokhuilu. Hibing hi Aaronwui naomayarabingna. ²Masot khavai kala khamathā khavai, nawui achinā Aaronwui vang kathara sāribing sākhuilu. ³Ina thangkhamei manglā eina chipemmi kahai kashapa kachiva̱ saikorali hānglu: Aaronna pāngmon sāda ili otram ngatha̱mi khavai, ali tharchigatmi khavai athumna awui sāribing sāranu. ⁴Athumna thikhom, ephod, phahon, rakkakhui katuma phahon, kuitei, kala shānneira̱ sākhuira. Athumna pāngmon sāda ili otram ngatha̱mi khavai, athumna nawui achinā Aaron kala anaomayarabingwui vang hibing kathara sāribing sākhuira. ⁵Athumna sinā, kala khamayinga, hungrisi, kala hungshi kahai kazaira̱, kala manakta hākakhui kazaira̱ khuiphungra.

Ephod

⁶"Sinā, khamayinga, hungrisi, kala hungshi kahai kazaira̱, kala manakta hākakhui kazaira̱ eina ephod chi them kathema eina sākhuilu. ⁷Chiwui amarei khani chili pānkhui kahai yārtui khara̱ khani sāra. ⁸Chiwuitungli khalapshān khavai chonsā chi ngaraichāra: sinā, khamayinga, hungrisi, hungshi kahai kazaira̱, kala manakta hākakhui kazaira̱ eina, asā akha eina sākhuira. ⁹Onyx ngalung khani khuilu, kala Israelwui naomayarabingwui aming chi ngalung chiwuitungli ruksangra. ¹⁰Athumwui kapharā athishurda, ngalung akhali aming tharuk, kala khangatei ngalung kakhaneli aming tharuk ruksangra. ¹¹Ngalung kashana mina seali rukkasang thāda, ngalung khani chili Israelwui naomayarabingwui aming ruksangra, chiwui thili sinā rukshān khavai apengli haira. ¹²Israelwui naomayarabingwui phaningung khavaiwui ngalung sāda, ngalung khani chi ephodwui yārtuiparli hailu; kala Aaronna iwui mangāli phaningung khavai athumwui aming chi ayartui khanili ngava̱ra. ¹³Sinā eina rukshān khavai apeng sākhuilu, ¹⁴kala khamaron thāda kashirei sinā kachanga eina khara̱ khani sākhuilu; kala kashirei khara̱ chi rukshān khavai apeng chili pānkhuira.

Thikhom

¹⁵"Them kathema eina ephod kasā thāda bichar thikhom akha sākhuilu; chi sinā, khamayinga, hungrisi, hungshi kahai kazaira̱, kala manakta hākakhui kazaira̱ eina sāra. ¹⁶Chi asān-aret ngarithida ngapho sāra, asān pangmayākha, kala aret pangmayākha jira. ¹⁷Chiwuitungli apeng mati ngalung ruksangra. Khare apengli cornelian, topaz, kala beryl; ¹⁸pengkakhaneli, emerald, sapphire, kala hirā; ¹⁹kakathuma apengli, jacinth, agate, kala amethyst; ²⁰kala khamate apengli, beryl, onyx, kala jasper; ngalung saikora sinā rukshān khavai apengli haira. ²¹Ngalung tharāda khani chi Israelwui naomayarabingwui aming athishurda ava̱va̱ leira; shang tharāda khaniwui vang, ava̱va̱li mahor namkhavai khutop thāda awui aming yeksangra. ²²Kala thikhomwui vang khara̱ kashirei hokkhui khamaron thāda sinā khamathinga eina sākhuira. ²³Kala thikhomwui vang sinā akhui khani sākhuilu, kala akhui khani chi thikhomwui achithek khanili pānshāra. ²⁴Kala thikhom mareiwui akhui khani chili sinā peng khani chi hokkhuira. ²⁵Kala peng khaniwui khangatei amarei khani china sinā rukshān kahai khanili pānra; chithāda sāda ephodwui yārtuiparli mangāshong hokthāngra. ²⁶Kala sinā akhui khani sākhuilu, kala chi ephod ngalemli, thikhomwui achithek khani chiwui alungshong sāshānra. ²⁷Kala luishit sinākhui khani sākhuilu, kala chi ephodwui yārtuipar khaniwui azing mangāshong, thāngkhavai ephodwui themlāk eina rakkakhui chonsāwui atunglila sāshānra. ²⁸Thikhom chi ephodwui rakkakhui chonsātungli napshānda ephodwui eina mangacho khavai, thikhomwui akhui chi ephodwui akhuili khamayinga khara̱ eina khalapra. ²⁹Iwui mangāli machatlakla phaningungching khavai, Aaronna katharapamli akazang tharan Israelwui naomayarabingwui aming chi bichar thikhomtungli awuklung mangāshong ngava̱ra. ³⁰Bichar thikhomli Urim eina Thummim hokthāngra, chithāda sāda iwui mangāli arā tharan chi Aaronwui wuklung mangāshong pamra. Chithāda sāda Aaronna Israelwui naomayarabingwui bichar chi iwui mangāli atam kachida awuklung mangāshong ngava̱ra. ^a a v30 Urim eina Thummim chi kathara otbing sai; pāngmon kathānana awui mibingwui vang ithumwui Avāwui kaphaning chi theikhavai, chibing chi thikhomli ngava̱sai.

Phahon eina Sināhon

³¹"Ephodwui phahon chi khamayingamāng eina rakkhuira. ³²Chiwui alungthungli akui vang sākaphut akha leira; makāk khavai, chiwui kuimareida katuma phahonwui kahung thāda rakkakhui akom akha leira. ³³Katuma phahon amarei kuimareida khamayinga, hungrisi, kala hungshi kahai kazaira̱ eina kabothei yeksangra, kala chibingwui angachai-chaili sinā kantā hokthāngra. ³⁴Sinā kantā akha, kabothei akha, sinā kantā akha, kabothei akha da, katuma phahon amarei kuimareida peida sāsangra. ³⁵Otram ngatha̱ tharan Aaronna chi ngavaira; kala ana iwui mangāli katharapamli kazang tharan kala kashok tharan chiwui akhon shāra, chithākha a mathira.

³⁶"Nana sinā kachanga eina hon akha sākhuilu, kala chiwuitungli khutopli rukkasang thāda, "Avāli Tharmathengranu" da kapisanglu. ³⁷Chi khamayinga khara̱ akha eina kuiteiwui mangāshongla shipshānlu. ³⁸Hi Aaronwui khaveili leira; kala Israelnaobingwui athumwui kathara lemmet sāda kachigat kathara otbingwui khayon chi ana phungra. Hi awui khaveili atam kachida leishona, chithākha athum iwui mangāli khuisangpai. ³⁹Khamanaka chonsā eina katuma phahon chi rakkhuilu, khamanaka eina kuitei sākhuilu, kala shānneira̱ chi kapim eina aphor phorsangra. ⁴⁰Masotwui vang kala khamathāwui vang, Aaronwui naomayarabingwui vang coat, shānneira̱, kala kuinei sākhuilu. ⁴¹Nawui achinā Aaron kala ashi awui naomayarabingli sāribing ngavaimida, athumli thao neomilu, tharchisinmira, kala tharchigatmilu, chithākha athum pāngmon sāda ili otram ngatha̱mira. ⁴²Ngahunwui eina khaishāngli tāshung khavai, athumwui asāmsai phasā fakham khavai athumli khamanaka kongkarao sākhuilu. ⁴³Aaron kala anaomayarabingna kazip khavai kachonshimli kazang tharan, lah katharapamli otram ngatha̱ khavai hanphutli rā tharan chi ngavaira, chithākha athum morei maphungla mathira. Hi ali kala awui thili awui ara̱-azāwui vang katang mavaila shiyan sāra."