யாத்திராகமம் 28

28 ¹“இஸ்ரவேல் புத்திரரிலிருந்து உன் சகோதரனாகிய ஆரோனையும் அவனுடைய குமாரரையும் எனக்கு ஆசாரிய ஊழியம் செய்யும்படி உன்னிடத்தில் சேர்த்துக்கொள்: ஆரோன், நாதாப், அபியூ, எலெயாசார், இத்தாமார் என்பவர்களே. இவர்களே ஆரோனின் குமாரர். ²உன் சகோதரனாகிய ஆரோனுக்கு மகிமைக்காகவும் அலங்காரத்திற்காகவும் பரிசுத்த வஸ்திரங்களை உண்டுபண்ணு. ³ஆரோனை எனக்கு ஆசாரிய ஊழியம் செய்யும்படி பிரதிஷ்டைபண்ண, அவனுடைய வஸ்திரங்களைச் செய்வதற்காக, நான் ஞானத்தின் ஆவியால் நிரப்பியிருக்கிற திறமையுள்ள யாவரோடும் நீ பேசு. ⁴அவர்கள் செய்யவேண்டிய வஸ்திரங்கள் இவைகளே: மார்ப்பதக்கம், ஏபோத், அங்கி, நெய்யப்பட்ட உள்அங்கி, பாகை, கச்சை என்பவைகளே. உன் சகோதரனாகிய ஆரோனும் அவனுடைய குமாரரும் எனக்கு ஆசாரிய ஊழியம் செய்யும்படி, இந்தப் பரிசுத்த வஸ்திரங்களை அவர்கள் அவனுக்கு உண்டுபண்ணக்கடவர்கள். ⁵அவர்கள் பொன்னையும், இளநீலநூல், இரத்தாம்பரநூல், சிவப்புநூல், மெல்லிய பஞ்சுநூலையும் பயன்படுத்தக்கடவர்கள்.

ஏபோத்

⁶“திறமையுள்ள சித்திரவேலைக்காரன் செய்யும் வேலையாக, பொன்னினாலும், இளநீலநூல், இரத்தாம்பரநூல், சிவப்புநூல், திரித்த மெல்லிய பஞ்சுநூலினாலும் ஏபோத்தை உண்டுபண்ணு. ⁷அதன் இரண்டு ஓரங்களிலும் இணைக்கப்பட்டு, ஒன்றாய்ச் சேர்க்கப்படும் இரண்டு தோள்த்துண்டுகள் அதற்கு இருக்கவேண்டும். ⁸அதன்மேலிருக்கும் கச்சையும் அதற்கு ஒத்திருக்கவேண்டும்: பொன், இளநீலநூல், இரத்தாம்பரநூல், சிவப்புநூல், திரித்த மெல்லிய பஞ்சுநூல் ஆகியவைகளால் ஒரே வேலையாய்ச் செய்யப்படவேண்டும். ⁹இரண்டு கோமேதகக் கற்களை எடுத்து, அவைகளின்மேல் இஸ்ரவேலின் குமாரரின் நாமங்களைப் பொறி. ¹⁰அவர்கள் பிறந்த வரிசைமுறையின்படி, ஒரு கல்லில் ஆறு நாமங்களும், மற்ற இரண்டாம் கல்லில் மற்ற ஆறு நாமங்களும் பொறிக்கவேண்டும். ¹¹இரத்தினம் தைக்கிறவன் முத்திரையைப் பொறிப்பதுபோல, இஸ்ரவேலின் குமாரரின் நாமங்களை அந்த இரண்டு கற்களிலும் பொறித்து, பின்பு அவைகளைப் பொற்குவளைகளில் பதித்துவை. ¹²அந்த இரண்டு கற்களையும் இஸ்ரவேலின் குமாரருக்காக ஞாபகக்கற்களாக ஏபோத்தின் தோள்த்துண்டுகளின்மேல் வை; ஆரோன் அவர்களுடைய நாமங்களை ஞாபகக்குறியாக என் சந்நிதியில் தன் இரண்டு தோள்களின்மேலும் சுமப்பான். ¹³பொற்குவளைகளையும், ¹⁴கயிறுகளைப்போலத் திரிக்கப்பட்ட பசும்பொன்னின் இரண்டு சங்கிலிகளையும் செய்து; திரிக்கப்பட்ட அந்தச் சங்கிலிகளைக் குவளைகளில் மாட்டு.

மார்ப்பதக்கம்

¹⁵“நியாயத்தீர்ப்பின் மார்ப்பதக்கத்தையும் திறமையான வேலையாக உண்டுபண்ணு; ஏபோத்தின் வேலையைப்போல, பொன், இளநீலநூல், இரத்தாம்பரநூல், சிவப்புநூல், திரித்த மெல்லிய பஞ்சுநூல் ஆகியவைகளால் அதைச் செய். ¹⁶அது சதுரமாகவும் இரட்டையாகவும், ஏறக்குறைய ஒரு சாண் நீளமும் ஒரு சாண் அகலமுமாய் இருக்கவேண்டும். ¹⁷அதிலே நாலு வரிசைக் கற்களைப் பதி. முதலாம் வரிசை பத்மராகம், புஷ்பராகம், மாணிக்கம்; ¹⁸இரண்டாம் வரிசை மரகதம், இந்திரநீலம், வச்சிரம்; ¹⁹மூன்றாம் வரிசை கெம்பு, வைடூரியம், சுகந்தி; ²⁰நாலாம் வரிசை படிகப்பச்சை, கோமேதகம், யஸ்பி. இவைகள் பொற்குவளைகளில் பதிக்கப்படவேண்டும். ²¹இஸ்ரவேலின் குமாரரின் நாமங்களின்படி பன்னிரண்டு கற்கள் இருக்கவேண்டும்—ஒவ்வொன்றும் முத்திரையைப்போல அதனதன் நாமத்தால் பொறிக்கப்பட்டு, பன்னிரண்டு கோத்திரங்களுக்கும் ஏற்றதாய் இருக்கவேண்டும். ²²மார்ப்பதக்கத்திற்குக் கயிறுகளைப்போலத் திரிக்கப்பட்ட பசும்பொன்னின் சங்கிலிகளைச் செய். ²³மார்ப்பதக்கத்திற்கு இரண்டு பொன் வளையங்களைச் செய்து, அந்த இரண்டு வளையங்களையும் அதன் இரண்டு ஓரங்களிலும் மாட்டு. ²⁴பின்பு அந்த இரண்டு பொன் திரிகளையும் மார்ப்பதக்கத்தின் ஓரங்களிலிருக்கும் இரண்டு வளையங்களில் மாட்டு. ²⁵திரிகளின் மற்ற இரண்டு நுனிகளையும் இரண்டு பொற்குவளைகளில் மாட்டி, ஏபோத்தின் தோள்த்துண்டுகளின் முன்பக்கத்தில் இணைத்துவை. ²⁶இரண்டு பொன் வளையங்களைச் செய்து, அவைகளை மார்ப்பதக்கத்தின் இரண்டு நுனிகளில், ஏபோத்தை நோக்கிய அதன் உட்புறத்து ஓரத்தில் வை. ²⁷இன்னும் இரண்டு பொன் வளையங்களைச் செய்து, அவைகளை ஏபோத்தின் இரண்டு தோள்த்துண்டுகளின் முன்பக்கத்தில் தாழவும், அதன் இணைப்புக்குச் சமீபமாய், அதன் நெய்யப்பட்ட கச்சைக்கு மேலாகவும் மாட்டு. ²⁸மார்ப்பதக்கம் ஏபோத்தின் நெய்யப்பட்ட கச்சையின்மேல் நிலைத்திருந்து, ஏபோத்திலிருந்து விலகிப்போகாதபடிக்கு, அதன் வளையங்களை ஏபோத்தின் வளையங்களோடே ஓர் இளநீல திரியினால் கட்டவேண்டும். ²⁹ஆரோன் பரிசுத்த ஸ்தலத்திற்குள் பிரவேசிக்கும்போது, இஸ்ரவேலின் குமாரரின் நாமங்களை நியாயத்தீர்ப்பின் மார்ப்பதக்கத்தில் தன் இருதயத்தின்மேல், என் சந்நிதியில் நித்திய ஞாபகக்குறியாகச் சுமப்பான். ³⁰ஊரீம் தும்மீம் என்பவைகளை நியாயத்தீர்ப்பின் மார்ப்பதக்கத்தில் வை; அப்பொழுது ஆரோன் என் சந்நிதியில் வரும்போது அவைகள் அவனுடைய இருதயத்தின்மேல் இருக்கும். ஆரோன் இஸ்ரவேலின் குமாரரின் நியாயத்தீர்ப்பை என் சந்நிதியில் தன் இருதயத்தின்மேல் எப்பொழுதும் சுமப்பான். ^a a v30 ஊரீம் தும்மீமென்பவைகள் தமது ஜனத்திற்காக எங்கள் பிதாவின் தீர்மானங்களை அறிந்துகொள்ளும்படி பிரதான ஆசாரியன் மார்ப்பதக்கத்தில் சுமந்துவந்த பரிசுத்த பொருள்களாயிருந்தன.

அங்கியும் பொற்பட்டமும்

³¹“ஏபோத்தின் அங்கியை முழுவதும் இளநீலநூலினால் உண்டுபண்ணு. ³²அதின் நடுவில் தலை நுழையும்படி ஒரு துவாரம் இருக்கவேண்டும்; அது கிழியாதபடிக்கு, மார்க்கவசத்தின் கழுத்துப்பட்டையைப்போல, சுற்றிலும் நெய்யப்பட்ட ஓரம் அதற்கு இருக்கவேண்டும். ³³அதின் விளிம்பைச் சுற்றிலும் இளநீலநூல், இரத்தாம்பரநூல், சிவப்புநூலினால் மாதளம்பழங்களையும், அவைகளின் இடையிடையே பொன் மணிகளையும் செய். ³⁴பொன் மணியும் மாதளம்பழமும், பொன் மணியும் மாதளம்பழமுமாய், அங்கியின் விளிம்பைச் சுற்றிலும் இருக்கவேண்டும். ³⁵ஆரோன் ஊழியம் செய்யும்போது அதை அணிந்திருக்கவேண்டும். அவன் என் சந்நிதியில் பரிசுத்த ஸ்தலத்திற்குள் பிரவேசிக்கும்போதும் புறப்படும்போதும், அவன் சாகாதபடிக்கு, அதின் சத்தம் கேட்கப்படும்.

³⁶“பசும்பொன்னினால் ஒரு பட்டத்தைச் செய்து, முத்திரை பொறிப்பதுபோல அதிலே: ‘பிதாவுக்குப் பரிசுத்தம்’ என்று பொறி. ³⁷அதை ஓர் இளநீல திரியினால் பாகையிலே, பாகையின் முன்பக்கத்தில் மாட்டு. ³⁸அது ஆரோனுடைய நெற்றியின்மேல் இருக்கும்; இஸ்ரவேல் ஜனங்கள் தங்கள் பரிசுத்த காணிக்கைகளாகப் பிரதிஷ்டைபண்ணும் பரிசுத்த வஸ்துக்களின் அக்கிரமத்தை அவன் சுமப்பான். அவைகள் என் சந்நிதியில் அங்கீகரிக்கப்படும்படிக்கு, அது எப்பொழுதும் அவனுடைய நெற்றியின்மேல் இருக்கவேண்டும். ³⁹மெல்லிய பஞ்சுநூலினால் உள்அங்கியை நெய்து, மெல்லிய பஞ்சுநூலினால் பாகையைச் செய்து, சித்திரத்தையல் வேலையாகக் கச்சையையும் செய். ⁴⁰ஆரோனுடைய குமாரருக்கும் மகிமைக்காகவும் அலங்காரத்திற்காகவும் உள்அங்கிகளையும், கச்சைகளையும், குல்லாக்களையும் செய். ⁴¹அவைகளை உன் சகோதரனாகிய ஆரோனுக்கும் அவனோடேகூட அவனுடைய குமாரருக்கும் உடுத்தி, அவர்களை எனக்கு ஆசாரிய ஊழியம் செய்யும்படி, அவர்களை அபிஷேகம்பண்ணி, அவர்களைப் பிரதிஷ்டைபண்ணி, அவர்களைப் பரிசுத்தப்படுத்து. ⁴²அவர்களுடைய நிர்வாணமான மாம்சத்தை மூடும்படி, இடுப்புமுதல் தொடைமட்டும் எட்டுகிற சணல்நூல் உள்ளாடைகளை அவர்களுக்குச் செய். ⁴³ஆரோனும் அவனுடைய குமாரரும் ஆசரிப்புக் கூடாரத்திற்குள் பிரவேசிக்கும்போதாவது, பரிசுத்த ஸ்தலத்தில் ஊழியம்செய்ய பலிபீடத்தண்டையில் சேரும்போதாவது, அவர்கள் அக்கிரமத்தைச் சுமந்து சாகாதபடிக்கு, அவைகளை அணிந்திருக்கவேண்டும். இது அவனுக்கும் அவனுக்குப்பின் அவனுடைய சந்ததிக்கும் நித்திய கட்டளையாய் இருக்கக்கடவது.”